stock market: గత ఐదు సెషన్లుగా స్టాక్ మార్కెట్ నేల చూపులు; మార్కెట్ పతనానికి 5 ప్రధాన కారణాలు..

stock market: భారత స్టాక్ మార్కెట్ వరుసగా ఐదు సెషన్లలో నష్టాల్లో ముగిసిది. నిఫ్టీ 50 ఇండెక్స్ జూలై 25, గురువారం ఇంట్రాడేలో 24,210 వద్ద కనిష్టాన్ని నమోదు చేసింది. ఈ ఐదు సెషన్లలో 1,866 పాయింట్లు నష్టపోయిన బీఎస్ఈ సెన్సెక్స్ (sensex) గురువారం ఇంట్రాడేలో 79,477 వద్ద కనిష్టాన్ని తాకింది. ఈ రోజు బ్యాంక్ నిఫ్టీ ఇండెక్స్ ఇంట్రాడేలో 50,559 వద్ద కనిష్టాన్ని తాకింది మరియు ఈ ఐదు సెషన్లలో 2,060 పాయింట్లు కోల్పోయింది. అన్ని సెగ్మెంట్ల కంపెనీల షేర్ల ధరలు (share price) పతనమవుతున్నాయి.

భారత స్టాక్ మార్కెట్ ఎందుకు పతనమవుతోంది?

అంతర్జాతీయ ధోరణులు బలహీనంగా ట్రేడవుతుండటంతో గత ఐదు సెషన్లుగా భారత స్టాక్ మార్కెట్ ఒత్తిడిలో ఉందని స్టాక్ మార్కెట్ నిపుణులు చెబుతున్నారు. కేంద్ర బడ్జెట్ 2024పై దలాల్ స్ట్రీట్ భారీ అంచనాలు పెట్టుకుంది. అయినప్పటికీ, మోడీ 3.0 ప్రభుత్వ మొదటి బడ్జెట్ మధ్యంతర బడ్జెట్ పొడిగింపుగా మాత్రమే ఉంది. అలాగే, రికార్డు స్థాయిలో ట్రేడవుతున్న భారత స్టాక్ మార్కెట్ ను ఉత్సాహపరిచే అంశాలేవీ అందులో లేవు. పైగా, ఎల్టీసీజీ, ఎస్టీసీజీల పెంపుతో మార్కెట్ సెంటిమెంట్ దెబ్బతిన్నది. వీటితో పాటు 2024 క్యూ1 ఫలితాలు, ఎఫ్ఐఐలు, డీఐఐల అమ్మకాలు, బలహీనమైన ప్రపంచ మార్కెట్ సెంటిమెంట్లు భారత స్టాక్ మార్కెట్ పై ప్రతికూల ప్రభావం చూపాయి.

భారత స్టాక్ మార్కెట్ పతనానికి టాప్ 5 కారణాలు

1] బడ్జెట్ 2024

లోక్ సభ ఎన్నికలు ఉండడంతో ఫిబ్రవరిలో మధ్యంతర బడ్జెట్ ను ప్రవేశపెట్టారు. దానికి పొడిగింపుగా జూలై 23న పూర్తి స్థాయి బడ్జెట్ (BUDGET 2024) ను ప్రవేశపెట్టారు. కార్పొరేట్ రంగం కాపెక్స్ విస్తరణ ప్రణాళికలకు ఊతమిచ్చే కొన్ని కీలక ప్రకటనలను మార్కెట్ ఆశించింది. కానీ, ఆ దిశగా ప్రకటనలేవీ వెలువడలేదు. పైగా, ఎల్టీసీజీ, ఎస్టీసీజీల పెంపుతో మార్కెట్ సెంటిమెంట్ దెబ్బతిన్నది.మొత్తం 2025 ఆర్థిక సంవత్సరంలో కంపెనీల ఆదాయాలను ఒత్తిడికి గురి చేస్తుందని భావిస్తున్నారు.

2) 2024 క్యూ1 ఫలితాలు

2024- 25 ఆర్థిక సంవత్సరం తొలి త్రైమాసిక (Q1FY25) ఫలితాలను కంపెనీలు ప్రకటిస్తున్నాయి. ఈ ఫలితాలు మార్కెట్ ఆశించిన విధంగా లేవు. మార్కెట్ ఊహించిన దాని కన్నా తక్కువ నికర లాభాలను పలు కంపెనీలు ప్రకటించాయి. వాటిలో కొన్ని బ్లూ చిప్ కంపెనీలు కూడా ఉన్నాయి. ఇదే ధోరణి ఈ ఆర్థిక సంవత్సరం మొత్తం కొనసాగే సంకేతాలు కనిపిస్తున్నాయి.

3) బలహీనమైన ప్రపంచ మార్కెట్ ధోరణులు

యుఎస్ టెక్ దిగ్గజాలు టెస్లా, ఆల్ఫాబెట్ నుండి బలహీనమైన త్రైమాసిక గణాంకాల తరువాత, యుఎస్ స్టాక్ మార్కెట్ బలమైన అమ్మకాల ఒత్తిడిని చూసింది. దీని ప్రభావం ఇతర ప్రపంచ స్టాక్ మార్కెట్లపై పడింది. ఆసియా, యూరోపియన్ మార్కెట్లు కూడా ఒత్తిడికి లోనయ్యాయి. కాబట్టి, బలహీనమైన అంతర్జాతీయ సంకేతాలు కూడా భారత స్టాక్ మార్కెట్ పతనానికి ఒక కారణంగా మారాయి.

4] యాంకర్ల ట్రెండ్ రివర్స్

ఇప్పటి వరకు, డీఐఐలు భారత స్టాక్ మార్కెట్లో యాంకర్లుగా ఉన్నారు. కానీ వారు కూడా ఇప్పుడు అమ్మకాల వైపు దృష్టి సారిస్తున్నారు. ఎఫ్ఐఐలు, డీఐఐలు పెద్ద ఎత్తున అమ్మకాలు కొనసాగిస్తున్నారు. ఇది కూడా భారత స్టాక్ మార్కెట్ పతనానికి ఒక కారణం.

5] ప్రీమియం కొనుగోలుదారుల డిమాండ్ తగ్గింది: గతఆర్థిక సంవత్సరంలో, ప్రీమియం కేర్, ఇతర లగ్జరీ వస్తువుల అమ్మకాలు పెరిగాయి. కానీ ప్రస్తుత ఆర్థిక సంవత్సరం మొదటి త్రైమాసికంలో ఆ అమ్మకాలు కూడా తగ్గాయి. అంటే రికవరీ సంకేతాలు కనిపించిన తర్వాత ప్రీమియం తరగతి కొనుగోలు సామర్థ్యం తగ్గినట్లు కనిపిస్తోంది. ఇది కూడా మార్కెట్ పై ప్రభావం చూపుతోంది.

సూచన: పై అభిప్రాయాలు, సిఫార్సులు వ్యక్తిగత విశ్లేషకులు లేదా బ్రోకింగ్ కంపెనీలవి, హెచ్ టీ తెలుగు వి కావు. ఏదైనా పెట్టుబడి నిర్ణయాలు తీసుకునే ముందు సర్టిఫైడ్ నిపుణులను సంప్రదించాలని మేము పెట్టుబడిదారులకు సలహా ఇస్తున్నాము.