WhatsApp: వాట్సాప్ లో త్వరలో మరో ఫీచర్; ఇక ఆ మెసేజెస్ కు చెక్ పెట్టొచ్చు..
ఎప్పటికప్పుడు వినియోగదారుల అవసరాలకు అనుగుణంగా కొత్త ఫీచర్స్ ను అందుబాటులోకి తీసుకువచ్చే వాట్సాప్.. మరో రెండు లేటెస్ట్ ఫీచర్స్ ను యూజర్ల ముందుకు తీసుకురానుంది. వీటిలోని ఒక ఫీచర్ తో గుర్తు తెలియని నంబర్ల నుంచి మెసేజెస్ రాకుండా బ్లాక్ చేసేయొచ్చు. మరో ఫీచర్ తో ఇతర యూజర్ల స్టేటస్ ను లైక్ చేయొచ్చు.
మెటా యాజమాన్యంలోని వాట్సాప్ రెండు కొత్త ఫీచర్లను పరీక్షిస్తోంది. త్వరలో ఆండ్రాయిడ్ స్మార్ట్ఫోన్ వినియోగదారుల కోసం వాటిని విడుదల చేయనుంది. గుర్తుతెలియని కాంటాక్ట్ ల నుంచి వచ్చే మెసేజ్ లను బ్లాక్ చేయడం అందులో ఒక ఫీచర్. ఇతరుల స్టేటస్ లను నేరుగా లైక్ చేసే అవకాశం మరో ఫీచర్ కల్పిస్తుంది.
ఆ మెసేజెస్ ను బ్లాక్ చేసేయండి..
వాట్సాప్ కు యూజర్లలో విస్తృతమైన రీచ్, పాపులారిటీ ఉంది. ఇది కొంత ఇబ్బందులను కూడా తీసుకువస్తోంది. గుర్తు తెలియని నంబర్ల నుంచి, అవసరం లేని మెసేజ్ లు మనల్ని చాలా సార్లు డిస్టర్బ్ చేస్తుంటాయి. అంతేకాదు, గుర్తుతెలియని నంబర్ల నుంచి మెసేజెస్ ను పంపించి, సైబర్ స్కామ్స్ కు కూడా పాల్పడుతుంటారు. అలాంటి సైబర్ నేరగాళ్ల, ఆటగట్టించేలా, అవసరం లేని మెసేజ్ ల తలనొప్పి లేకండా ఉండేలా.. వాట్సాప్ ఒక పరిష్కారాన్ని వెతికింది. త్వరలో గుర్తు తెలియని నంబర్ల నుంచి వచ్చిన మెసేజ్ లను బ్లాక్ చేసేలా వాట్సాప్ కొత్త ఫీచర్ ను విడుదల చేయనుంది. ఈ ఫీచర్ పేరు "“Block messages from unknown senders”. ఇది సేవ్ చేయని కాంటాక్ట్ ల నుండి వచ్చే సందేశాలను బ్లాక్ చేస్తుంది.
నిర్దిష్ట పరిమితి దాటినవి మాత్రమే..
డబ్ల్యూఏబీటాఇన్ఫో అందించిన సమాచారం ప్రకారం ఈ కొత్త ఫీచర్ ఇంకా టెస్టింగ్ దశలోనే ఉంది. ఎంపిక చేసిన సంఖ్యలో పరిమిత వినియోగదారులకు అందుబాటులో ఉంది. ఇది ప్రతి తెలియని సందేశాన్ని బ్లాక్ చేయదు. కానీ సందేశాలు ఒక నిర్దిష్ట పరిమితిని దాటిన పంపినవారిని మాత్రమే బ్లాక్ చేస్తుంది. వాట్సాప్ లో ఆండ్రాయిడ్ వెర్షన్ 2.24.17.24 కోసం బీటాలో ఈ ఫీచర్ అందుబాటులో ఉంది. ఈ ఫీచర్ ప్రారంభించిన తరువాత, ఒక నిర్దిష్ట పరిమితిని దాటిన గుర్తుతెలియని కాంటాక్ట్ లు పంపిన అన్ని సందేశాలు ఆటోమేటిక్ గా బ్లాక్ అవుతాయి.
సెక్యూరిటీలో మరో అడుగు
బెదిరింపులు, స్పామ్ సందేశాల నుంచి యూజర్లను అప్రమత్తం చేసే టూల్స్ ఇప్పటికే వాట్సాప్ (whatsapp) లో ఉన్నాయి. భద్రతా ఉల్లంఘనల నుండి వినియోగదారులను రక్షించడంలో ఈ కొత్త ఫీచర్ ఒక అడుగు ముందుకేసింది. ఫిషింగ్, స్కామ్ లు, సున్నితమైన సమాచారం, డివైజ్ భద్రతకు ముప్పు కలిగించే ఏదైనా ఇతర అసురక్షిత కార్యకలాపాల వంటి సైబర్ దాడుల నుండి వినియోగదారులను రక్షించడానికి ఈ ఫీచర్ ఉపయోగపడుతుంది.
కొత్త 'లైక్స్ రియాక్షన్' ఫీచర్
వాట్సాప్ మరో కొత్త క్విక్ రియాక్షన్ ఫీచర్ ను అభివృద్ధి చేస్తున్నట్లు డబ్ల్యూఏబీటాఇన్ఫో నివేదించింది. స్టేటస్ ట్యాబ్ లోని రిప్లై బటన్ పక్కన ఈ ఫీచర్ ఉంటుంది. స్టేటస్ వీక్షకుల జాబితాలోని యూజర్లు తమ అప్డేట్ ను ఓపెన్ చేసినప్పుడల్లా స్టేటస్ లో ఉన్న లైకులు కనిపిస్తాయి. కావాలనుకుంటే, ఈ ఫీచర్ ను మ్యూట్ చేసుకోవచ్చు. ఇన్స్టాగ్రామ్ స్టోరీస్ లో లభించే లైక్ రియాక్షన్స్ తరహాలో ఈ ఫీచర్ ఉంటుంది. వాట్సాప్ కొంతకాలంగా ఈ ఫీచర్ పై పనిచేస్తోంది. వాట్సాప్ బీటా వెర్షన్ 2.24.17.21లో ఈ ఫీచర్ ను పరీక్షిస్తున్నారు.
