Sri Lanka in T20 World Cup Super 12: నెదర్లాండ్స్‌ను మట్టి కరిపించి సూపర్‌ 12కు శ్రీలంక

Sri Lanka in T20 World Cup Super 12: టీ20 వరల్డ్‌కప్‌ సూపర్‌ 12 స్టేజ్‌కు చేరి ఊపిరి పీల్చుకుంది శ్రీలంక. ఈసారి తొలిరౌండ్‌లో ఆడిన తొలి మ్యాచ్‌లోనే నమీబియా చేతుల్లో ఓడిన ఆసియాకప్‌ ఛాంపియన్‌.. ఆ తర్వాత గ్రూప్‌ ఎలో యూఏఈ, నెదర్లాండ్స్‌లపై గెలిచి సూపర్‌ 12 చేరడం విశేషం. గురువారం (అక్టోబర్‌ 20) జరిగిన మ్యాచ్‌లో నెదర్లాండ్స్‌పై 16 రన్స్‌ తేడాతో విజయం సాధించింది.

ఈ కీలకమైన మ్యాచ్‌లో కుశాల్ మెండిస్‌ 44 బాల్స్‌లోనే 79 రన్స్‌తో రాణించడంతో శ్రీలంక 162 రన్స్‌ చేసింది. ఆ తర్వాత నెదర్లాండ్స్‌ కూడా బాగానే పోరాడింది. 20 ఓవర్లలో 9 వికెట్లకు 146 రన్స్‌ చేసింది. ఆ టీమ్‌ ఓపెనర్‌ మ్యాక్స్‌ ఓడౌడ్‌ 53 బాల్స్‌లోనే 71 రన్స్‌ చేసి లంక టీమ్‌కు చెమటలు పట్టించాడు. అయితే వానిందు హసరంగ 3, తీక్షణ 2 వికెట్లు తీసి నెదర్లాండ్స్‌ను కట్టడి చేశారు.

మూడు మ్యాచ్‌లలో రెండు విజయాలతో నాలుగు పాయింట్లు సాధించిన శ్రీలంక.. సూపర్‌ 12కు చేరుకుంది. యూఏఈ, నమీబియా మధ్య మ్యాచ్‌ తర్వాత ఈ గ్రూప్‌ ఎ నుంచి శ్రీలంకతోపాటు వెళ్లే మరో టీమ్‌ ఏదో తెలుస్తుంది. ఈ మ్యాచ్‌లో నమీబియా గెలిస్తే ఆ టీమే వెళ్తుంది. ప్రస్తుతం నెదర్లాండ్స్‌ 3 మ్యాచ్‌లలో రెండు గెలిచి నాలుగు పాయింట్లతో ఉంది. అయితే ఆ టీమ్‌ నెట్‌ రన్‌రేట్‌ -0.162గా ఉంది.

నెదర్లాండ్స్‌ కంటే నమీబియా నెట్‌ రన్‌రేట్‌ (1.277) మెరుగ్గా ఉంది. దీంతో యూఏఈపై గెలిస్తే చాలు నమీబియా సూపర్‌ 12కు అర్హత సాధిస్తుంది. ఆసియాకప్‌లో ఇండియా, పాకిస్థాన్‌ ఫేవరెట్స్‌ షాకిచ్చి విజేతగా నిలిచిన శ్రీలంక ఈ టీ20 వరల్డ్‌కప్‌ తొలి మ్యాచ్‌లోనే నమీబియా చేతుల్లో ఓడిపోయింది. దీంతో కనీసం తర్వాతి రౌండ్‌కైనా అర్హత సాధిస్తుందా అన్న అనుమానం కలిగింది.

అయితే ఆ తర్వాత యూఏఈపై ఘన విజయం సాధించి నెట్‌ రన్‌రేట్‌ను కూడా మెరుగుపరచుకుంది. అయితే ఆ మ్యాచ్‌లో ఏకంగా ముగ్గురు లంక ప్లేయర్స్‌ చమీర, ప్రమోద్‌ మధుషన్‌, ధనుష్క గుణతిలక గాయపడ్డారు. అయినా నెదర్లాండ్స్‌తో మ్యాచ్‌లో పోరాడిన లంక.. చివరికి గెలిచి సూపర్‌ 12 స్టేజ్‌కు చేరుకుంది.