Hyderabad Hotels : కుళ్లిపోయిన మాంసం.. పాడైన ఉల్లిపాయలు.. మరుగుదొడ్డిలా వంట గది..! ఇంత దారుణమా?

హైదరాబాద్ నగరంలోని ప్రముఖ హోటళ్లలో ఆహారం కల్తీ ఎక్కువైపోతోంది. ఫుడ్ సేఫ్టీ అధికారులు దాడులు చేస్తున్నా.. తీరు మారడం లేదు. కుళ్లిన మాంసం, కూరగాయలను ఉపయోగిస్తూ ప్రజల ఆరోగ్యంతో ఆటలాడుతున్నారు. 

చాలా ప్రముఖ హోటళ్లలో వంట గదులను మరుగుదొడ్డిలా ఉన్నాయి. తుప్పు పట్టిన పాత్రల్లోనే వంట వండుతున్నారు. జీహెచ్‌ఎంసీ ఆరోగ్య విభాగంలోని కొందరు అధికారులే ఇందుకు కారణమనే ఆరోపణలు ఉన్నాయి. హోటళ్లు ఇచ్చే కాసులకు కక్కుర్తి పడి.. ప్రజల ప్రాణాలను పణంగా పెడుతున్నారు.

తాజాగా కొండాపూర్‌ శరత్‌ సిటీ మాల్‌లోని చెట్నీస్‌ హోటల్‌లో ఫుడ్ సేఫ్టీ అధికారులు తనిఖీలు నిర్వహించారు. ఈ సమయంలో వారు అవాక్కయ్యే దృశ్యాలు కనిపించాయి. కంది పప్పు డ్రమ్ములో బొద్దింకలున్నాయి. గోధుమపిండి, రవ్వకు పురుగులు పట్టాయి. ఫినాయిల్‌ డబ్బాలను కిరాణ సరకులను ఒకే చోట నిల్వ చేశారు. 

వంట సామాన్లు పెట్టే గదిలో.. ఉల్లిపాయలు, క్యాబేజీ గడ్డలు కుళ్లిపోయాయి. టిఫిన్ సెంటర్‌లో చెత్త ఘోరంగా ఉంది. మూతల్లేని చెత్త డబ్బాలు ఉండటంతో.. ఈగలు, దోమలు ముసురుతున్నాయి. 

ఫుడ్ సేఫ్టీ అధికారులు దాదాపు 500ల చోట్ల తనిఖీలు నిర్వహించగా.. 90 శాతం కేంద్రాల్లో లోపాలు బయటపడుతున్నాయి. దీంతో నగరవాసులు బయట తినాలంటే వణికిపోతున్నారు. ప్రముఖ హోటళ్లో పరిస్థితి కూడా మరీ దారుణంగా తయారైంది.