Dasara 2024 : వరంగల్ రంగలీల మైదానంలో రావణ వధ.. ఈసారి ప్రత్యేకత ఏంటో తెలుసా?

వరంగల్‌లోని రంగలీలా మైదానంలో రావణ వధ ఘనంగా నిర్వహించారు. రావణుడి భారీ దిష్టిబొమ్మను తయారి చేసి.. బాంబులతో పేల్చి బూడిద చేశారు. ఈ రావణ వధను చూసేందుకు 2 లక్షల మందికి పైగా ప్రజలు వచ్చారని నిర్వాహకులు చెప్పారు. 

100 ఏళ్లకు పైగా ఈ సంప్రదాయం వరంగల్‌లో కొనసాగుతోంది. 1920లలో రావణుడి పోస్టర్‌ను దహనం చేయడంతో మొదలైంది. స్వాతంత్య్రానంతరం బట్టలతో చేసిన దిష్టిబొమ్మను దహనం చేశారు. 

10 తలల రావణుడి ప్రతిమను తయారుచేయడానికి రూ. 15 లక్షలకు పైగా ఖర్చయింది. రావణ దహనం సమయంలో అద్భుతమైన ప్రదర్శన జరిగేలా క్రాకర్స్ ఏర్పాటు చేశారు. నెల్లూరు నుండి నిపుణులను రప్పించి.. దిష్టిబొమ్మకు లోపల క్రాకర్స్‌ను చాలా జాగ్రత్తగా ఏర్పాటు చేశారు. 

ఈ వేడుకల్లో రావణ దహనం తోపాటు క్రాకర్ షో, సాంస్కృతిక కార్యక్రమాలు ఆకట్టుకున్నాయి. రాష్ట్రంలోని వివిధ ప్రాంతాల నుంచి ప్రజలు రావడంతో.. కట్టుదిట్టమైన బందోబస్తు ఏర్పాటు చేశారు. వందలాది మంది పోలీసులను మోహరించారు. 

మంత్రి కొండా సురేఖ, రాజ్యసభ సభ్యులు బండా ప్రకాష్, రావణ వధలో పాల్గొన్నారు. జిల్లా కలెక్టర్, వరంగల్ పోలీస్ కమిషనర్, జీడబ్ల్యూఎంసీ కమిషనర్, ఉన్నతాధికారులు రావణ వధలో పాల్గొన్నారు.