Hyderabad Cafe Bahar Biryani : మూతపడిన 50 ఏళ్ల నాటి ‘కేఫ్ బహార్’…! పరేషాన్ లో బిర్యానీ లవర్స్

హైదరాబాద్ పేరు వింటే చాలు ఫుడ్ లవర్స్ అందరికీ దమ్ బిర్యానీ గుర్తొస్తుంది. ఇక హైదరాబాదీల వీకెండ్​ మెనూ కార్డ్​లో ముక్క ఉండి తీరాల్సిందే. వరల్డ్ వైడ్ గా కూడా మన బిర్యానీకి ప్రత్యేకంగా గుర్తింపు ఉంటుంది.నగరంలోని ఏ గల్లీకి వెళ్లిన హోటళ్లలో బిర్యానీ దొరుకుతుంటుంది. 

హైదరాబాద్ నగరంలో ఎన్నో బిర్యానీ సెంటర్లు, రెస్టారెంట్లు, హోటళ్లు ఉన్నప్పటికీ… కొన్ని ప్లేసులకు మాత్రం తిరుగులేని పేరుంది. నగరంలో బిర్యానీకి 10 - 15 టాప్ రెస్టారెంట్లు ఉండగా.. అందులో ఒకటి కేఫ్ బహార్. ఇది హైదర్ గూడలో ఉంటుంది. 

కేఫ్ బహార్ కు ఎంతో చారిత్రక నేపథ్యం ఉంది. దీన్ని 1973లో స్థాపించారు. ఇప్పటికి 50 ఏండ్లు పూర్తి చేసుకుంది. తొలినాళ్లలో ఇరానీ ఛాయ్​ స్టాల్​తో ప్రారంభమైన ఈ ప్లేస్…ఆ తర్వాత బిర్యానీ సెంటర్ గా మారిపోయింది. ఇప్పటికీ ఇక్కడ దొరికే ఇరానీ చాయ్ చాలా స్పెషల్.

నిత్యం జనాలతో కిటకిటలాడే  ఈ రెస్టారెంట్.. కొద్దిరోజులుగా ఓపెన్ కావటం లేదు. దాదాపు పది రోజులు దాటిపోయింది. ఆ ప్రాంతమంతా కూడా బోసిపోయినట్లుగా మారిపోయింది. ​అయితే కుటుంబ సభ్యుల మధ్య ఏర్పడిన ఆస్తి తగాదాలే మూసివేతకు కారణమని తెలుస్తోంది. 

హుస్సేన్​ బొలూకి అనే వ్యక్తి కేఫ్ బహార్ ను స్థాపించారు. మొదట్లో ఇరానీ చాయ్ మాత్రం దొరికేది. తర్వాత రెస్టారెంట్ స్థాయికి ఎదిగింది. కరోనా సమయంలో యాజమాని చనిపోవటంతో… ఫ్యామిలిలో ఆస్తి తగాదాలు తెరపైకి వచ్చినట్లు తెలుస్తోంది. ఈ క్రమంలోనే ఈ కేఫ్ తాళాలతో దర్శనమిస్తోంది. అయితే త్వరలోనే కేఫ్ బహార్ ఓపెన్ అవుతోందని తెలుస్తోంది.

కేఫ్ బహార్ లో ఫిష్ బిర్యానీ చాలా ఫేమస్. చికెన్ బిర్యానీతో పాటు ఫిష్ బిర్యానీకి ఎక్కువ ప్రాధాన్యత ఇస్తుంటారు.