Cinema Chettu : 150 ఏళ్ల చరిత్ర, 300 సినిమాల షూటింగ్స్-నేలకొరిగిన సినిమా చెట్టు

150 ఏళ్ల సినిమా చెట్టు నేలకొరిగింది. సుమారు 300 సినిమాల్లో చాలా సన్నివేశాల్లో కనిపించిన ఈ మహా వృక్షం గోదావరిలో కూలిపోయింది. గోదావరి ఒడ్డున 150 ఏళ్ల పాటు ఎన్నో జీవులకు నీడ నిచ్చిన చెట్టు గోదావరి కోతతో నీటిలో ఒరిగిపోయింది. 

1975లో విడుదలైన పాడిపంటలు సినిమా నుంచి రామ్ చరణ్ రంగస్థలం వరకు ఎన్నో వందల సినిమాల్లో ఈ చెట్టు కనిపించింది. గోదావరి ఒడ్డునున్న ఈ చెట్టు వద్ద సినిమా సీన్ తీస్తే హిట్టు పక్కా అనే నమ్మకం స్థానికంగా ఉంది.  

తూర్పుగోదావరి జిల్లా కొవ్వూరు మండలం కుమారదేవం గ్రామంలో గోదావరి నది ఒడ్డునున్న 150 ఏళ్ల చరిత్ర కలిగిన మహా వృక్షం కూలిపోయింది. సుమారు 300లకు పైగా సినిమాల్లోని సన్నివేశాలు ఈ చెట్టు నీడలో తీశారు.  ఈ చెట్టును స్థానికంగా సినిమా చెట్టు అని పిలుస్తుంటారు. 

నిర్మాతలకు, దర్శకులకు వారి సినిమాలో ఈ చెట్టును చూపిస్తే ఈ మూవీ హిట్ అవుతుందన్న ఒక నమ్మకం ఉండేది. వందలాది సినిమాల్లోని సన్నివేశాలు, పాటలు ఇక్కడ తీశారు.  మూగమనసులు, పద్మవ్యూహం, త్రిశూలం, సీతారామయ్య గారి మనవరాలు సినిమాల్లో ఈ చెట్టు కనిపిస్తుంది. 

అలనాటి దర్శనకులు వంశీ, కె.విశ్వనాథ్, జంధ్యాల, బాపు, రాఘవేంద్రరావుకు ఈ సినిమా చెట్టు స్పాట్ చాలా ఇష్టం. వారి సినిమాల్లో కనీసం ఒక్క సీన్ అయినా ఈ చెట్టు వద్ద తీసేవారు. డైరెక్టర్ వంశీ అయితే తన స్నేహితులతో కలిసి అక్కడే భోజనం చేసేవారంట. 

గోదావరి వరద ఉద్ధృతికి ఈ చెట్టు కూలిపోయింది. దీంతో స్థానికులు, ప్రకృతి ప్రేమికులు ఆవేదన వ్యక్తం చేస్తున్నారు.