8th Pay Commission Date: కొత్త వేతన సంఘం అమలు ఎప్పుడు? డీఏ ఎప్పుడు పెంచుతారు?

8వ వేతన సంఘం ఎప్పుడు అమల్లోకి వస్తుందనే ప్రశ్న కేంద్ర ప్రభుత్వ ఉద్యోగుల నుంచి వినిపిస్తోంది. దీనిపై వివిధ వర్గాల నుంచి భిన్న వాదనలు వినిపిస్తున్నాయి. 8వ వేతన సంఘం ఎప్పుడు ఏర్పడుతుందో పశ్చిమబెంగాల్ రాష్ట్ర ప్రభుత్వ ఉద్యోగుల సమాఖ్య కాన్ఫెడరేషన్ ఆఫ్ స్టేట్ గవర్నమెంట్ ఎంప్లాయీస్ ప్రధాన కార్యదర్శి మలయ్ ముఖర్జీ వివరించారు. 

7వ వేతన సంఘం 2016 జనవరి 1 నుంచి అమల్లోకి వచ్చింది. జూలై 1, 2016 నుంచి జనవరి 1, 2024 వరకు కేంద్ర ప్రభుత్వం మొత్తం 50 శాతం డీఏను 17 వాయిదాల్లో చెల్లించింది. మరో మూడు విడతల డీఏ రావాల్సి ఉంది. ఆ మూడు విడతల్లో డీఏ చెల్లించిన తర్వాత 8వ వేతన సంఘం అమల్లోకి వస్తుంది. 

కేంద్ర ప్రభుత్వ ఉద్యోగులకు 2024 జూలై 1, 2025 జనవరి 1, 2025 జూలై 1 తేదీల్లో డీఏ చెల్లిస్తారని కాన్ఫెడరేషన్ ఆఫ్ స్టేట్ గవర్నమెంట్ ఎంప్లాయీస్ ప్రధాన కార్యదర్శి తెలిపారు. 8వ వేతన సవరణ సంఘం జనవరి 1, 2026 నుంచి అమల్లోకి వస్తుందని తెలిపారు.

ప్రస్తుతానికి కేంద్ర ప్రభుత్వ ఉద్యోగులు జూలై నెల డియర్నెస్ అలవెన్స్ పెంపు కోసం ఆసక్తిగా ఎదురుచూస్తున్నారు. ఈసారి డియర్నెస్ అలవెన్స్ ఎంత శాతం పెంచుతారనే దానిపై ఆరా తీస్తున్నారు. డీఏను నాలుగు శాతం పెంచనున్నట్లు కొన్ని నివేదికలు పేర్కొన్నాయి. ఐదు శాతం చొప్పున డీఏను పెంచనున్నట్లు కూడా కొన్ని నివేదికలు పేర్కొన్నాయి.