Nipah virus : కేరళలో మళ్లీ నిపా కలకలం.. ప్రాణాంతక వ్యాధి సోకి ఇద్దరు మృతి!

Nipah outbreak in Kerala : దేశంలో నిపా వైరస్​ కలకలం సృష్టించింది. కేరళలో.. ఈ ప్రాణాంత వ్యాధి సోకి ఇప్పటికే ఇద్దరు మరణించినట్టు ప్రభుత్వం అనుమానం వ్యక్తం చేస్తోంది. ఈ నేపథ్యంలో కొజికోడ్​ జిల్లాలో అలర్ట్​ జారీ చేసింది.

నిపానే కారణమా..?

జ్వరం కారణంగా ఇద్దరు కేరళవాసులు ఓ ప్రైవేట్​ ఆసుపత్రిలో చేరారు. చికిత్స పొందుతూ ప్రాణాలు కోల్పోయారు. ప్రభుత్వం వీటిని అసహజ మరణాలుగా గుర్తించింది. నిపా వైరస్​ కారణంగానే ఈ మరణాలు సంభవించి ఉంటాయని అనుమానాలు వ్యక్తం చేసింది. మృతుల్లో ఒకరి బంధువు కూడా తీవ్ర జ్వరంతో.. ఐసీయూలో చికిత్స పొందుతున్నట్టు తెలుస్తోంది. కేరళలో నిపా కలవరం నేపథ్యంలో.. రాష్ట్ర ఆరోగ్యశాఖ మంత్రి వీనా జార్జ్​.. సోమవారం రాత్రి ఉన్నతస్థాయి సమావేశాన్ని నిర్వహించారు. అధికారులకు పలు కీలక ఆదేశాలు జారీ చేశారు.

Nipah alert in Kozhikode : కేరళలో నిపా వైరస్​ను తొలిసారిగా 2018 మే 19న గుర్తించారు. అప్పటి నుంచి 2021 వరకు అనేకమంది ఈ ప్రాణాంతక వ్యాధి బారిన పడి మరణించారు. గతంలో కొజికోడ్​లోనూ అనేకమందికి ఈ వైరస్​ సోకింది.

డబ్ల్యూహెచ్​ఓ (ప్రపంచ ఆరోగ్య సంస్థ) ప్రకారం.. ఈ నిపా వైరస్​ అనేది ఓ జూనోటిక్​ డిసీజ్​. అంటే.. ఇది జంతువుల నుంచి మనుషులకు పాకుతుందని అర్థం. ఆహారం, భౌతికంగా వేరొకరిని తాకినా.. ఈ వ్యాధి వ్యాపిస్తుంది.

Nipah virus Kerala : నిపా వైరస్​ సోకిన వారు వివిధ అనారోగ్య లక్షణాలతో బాధపడుతుంటారు. ఊపిరి తీసుకోవడం కష్టంగా అనిపిస్తుంది. జ్వరం ఎక్కువగా, ఎక్కువ రోజుల పాటు ఉంటుంది. చివరికి ఎన్సిఫలైటిస్​ కూడా వస్తుంది.

"మనుషులే కాదు. ఈ వ్యాధి జంతువులకు కూడా ప్రమాదకరమే. పందుల్లో దీనిని ఎక్కువగా చూడవచ్చు," అని గతంలో డబ్ల్యూహెచ్​ఓ వెల్లడించింది.

నిపా వైరస్​కు సరైన చికిత్స అంటూ ఇంకా ఏదీ లేకపోవడం ఆందోళనకర విషయం. అయితే ఈ వ్యాధి సోకకుండా కొన్ని జాగ్రత్తలు తీసుకోవచ్చని వైద్యులు చెబుతున్నారు. నేల మీద పడిన పండ్లు తినొద్దని, వీధుల్లోని పందుల దగ్గరకు వెళ్లొద్దని సూచిస్తున్నారు.