VinFast electric car : ఇండియా మార్కెట్​లోకి మరో కొత్త ఈవీ ప్లేయర్​.. 3 వెహికిల్స్​ రెడీ!

VinFast electric car : అంతర్జాతీయ మార్కెట్​లో టెస్లాకు గట్టిపోటీనిస్తున్న విన్​ఫాస్ట్​ అనే ఎలక్ట్రిక్​ వాహనాల తయారీ సంస్థ.. ఇప్పుడు ఇండియాలో అడుగుపెట్టబోతోంది! వియత్నాంకు చెందిన ఈ సంస్థ నుంచి.. 2024 ఏప్రిల్​లో తొలి మోడల్​.. ఇండియాలో లాంచ్​ అవుతుందని తెలుస్తోంది. ఇండియా మార్కెట్​ కోసం విన్​ఫాస్ట్​ సంస్థ మొత్తం 3 ఈవీలను సిద్ధం చేస్తోందట. వీఎఫ్​ ఈ-34 ఎలక్ట్రిక్​ వెహికిల్​ ముందుగా లాంచ్​కానుందని సమాచారం.

మార్కెట్​లోకి కొత్త ఈవీ..

ఈ వీఎఫ్​ ఈ-34 మోడల్​ని సీబీయూ (కంప్లీట్లీ బిల్ట్​-అప్​) యూనిట్​గా ఇండియాలోకి తీసుకురావాలని సంస్థ చూస్తోంది. దీని తర్వాత వీఎఫ్​6, వీఎఫ్​7 ఎలక్ట్రిక్​ ఎస్​యూవీలు కూడా ఇండియాలో లాంచ్​ అవుతాయి. ఈ ఈవీలతో పాటు రానున్న సంవత్సరాల్లో పెద్ద సైజు సెడాన్​ కూడా దేశంలో ప్రవేశపెట్టాలని సంస్థ ప్లాన్​ చేస్తోంది.

VinFast India : 2022 జూన్​లో విన్​ఫాస్ట్​ వీఎఫ్​8 ఎలక్ట్రిక్​ ఎస్​యూవీ.. తొలిసారిగా ఇండియాలో దర్శనమిచ్చింది. దీని టెస్ట్​ డ్రైవ్​ జరిగిన తర్వాత మళ్లీ కనిపించలేదు. దీని రేంజ్​ 471 కి.మీలు. ఈ ఇంజిన్​ 397 హెచ్​పీ పవర్​ను, 620 ఎన్​ఎం టార్క్​ను జనరేట్​ చేస్తుంది.

ఇండియాలో విన్​ఫాస్ట్​ ఎంట్రీ కోసం వేగంగా పనులు జరుగుతున్నాయి. గురుగ్రామ్​లో ఇప్పటికే ఓ ఆఫీస్​ ఓపెన్​ అయ్యింది. పలువురిని రిక్రూట్​ కూడా చేసుకున్నారు. అన్ని అనుకున్నట్టు జరిగితే.. 2024 ఏప్రిల్​లో సంస్థ నుంచి తొలి ఈవీ బయటకు వస్తుంది. టెస్లాకు పోటీనిస్తుండటంతో.. ఇది కూడా ఒక ప్రీమియం ఎలక్ట్రిక్​ వెహికిల్​గానే ఉంటుందని మార్కెట్​ వర్గాలు భావిస్తున్నాయి.

VinFast India latest news : ఇండియాలోకి టెస్లా ఎంట్రీ ఇవ్వనుందని కొన్ని నెలల ముందు వరకు వార్తలు జోరుగా సాగాయి. ఇప్పుడు పెద్దగా వార్తలు రావట్లేదు. టెస్లా, భారత ప్రభుత్వం కూడా ఈ విషయంపై ఎలాంటి వ్యాఖ్యలు చేయడం లేదు. ఒకవేళ టెస్లా ఎంట్రీ ఇచ్చినా.. పోటీని తట్టుకోవడమే కాకుండా.. మరింత రసవత్తరంగా మార్చే విధంగా విన్​ఫాస్ట్​ సంస్థ చర్యలు తీసుకుంటున్నట్టు తెలుస్తోంది.

ఇండియా ఆటోమొబైల్​ ఇండస్ట్రీలో ఈవీ సెగ్మెంట్​కు క్రేజీ డిమాండ్​ కనిపిస్తోంది. దీనిని క్యాష్​ చేసుకునేందుకు.. అటు దేశీయ సంస్థలు, ఇటు విదేశీ కంపెనీలు విపరీతంగ పోటీ పడుతున్నాయి. బీవైడీ వంటి దిగ్గజ ఈవీ సంస్థలు కూడా ఇండియాలో అడుగుపెట్టాయి.