స్టాక్‌హోమ్‌: టోక్యో ఒలింపిక్స్‌ ఛాంపియన్‌ నీరజ్‌ చోప్రా రోజురోజుకూ మెరుగవుతూనే ఉన్నాడు. తన రికార్డులను తానే బ్రేక్‌ చేసుకుంటూ.. తన టార్గెట్‌ అయిన 90 మీటర్లకు చేరవవుతున్నాడు. నాలుగేళ్ల తర్వాత డైమండ్‌ లీగ్‌కు తిరిగొచ్చిన నీరజ్‌.. వచ్చీ రావడంతో తన నేషనల్‌ రికార్డును బ్రేక్‌ చేశాడు. గురువారం(జూన్‌ 30) స్టాక్‌హోమ్‌ డైమండ్‌ లీగ్‌లో నీరజ్‌ రెండోస్థానంలో నిలిచాడు.

అయితే జావెలిన్‌ను 89.94 మీటర్ల దూరం విసిరి తన నేషనల్‌ రికార్డును మరింత మెరుగుపరచుకున్నాడు. 2021లో 88.07 మీటర్లతో నీరజ్‌ చోప్రా నేషనల్‌ రికార్డు నెలకొల్పాడు. అయితే ఈ మధ్యే పావో నుర్మి గేమ్స్‌లో 89.30 మీటర్లతో ఆ రికార్డును బ్రేక్‌ చేశాడు. ఇప్పుడా రికార్డును కూడా రోజుల వ్యవధిలోనే మరోసారి అధిగమించడం విశేషం.

స్టాక్‌హోమ్‌ డైమండ్‌ లీగ్‌లో తన టార్గెట్‌ అయిన 90 మీటర్లను దాదాపు అందుకునేలా జావెలిన్‌ విసిరాడు. తన ఫస్ట్‌ అటెంప్ట్‌లోనే 89.94 మీటర్ల దూరం విసిరి రెండోస్థానంలో నిలిచాడు. ప్రస్తుత వరల్డ్‌ ఛాంపియన్‌ ఆండర్సన్‌ పీటర్స్‌ 90.31 మీటర్లతో తొలి స్థానంలో నిలిచాడు. అయితే డైమండ్‌ లీగ్‌లో నీరజ్‌చోప్రా టాప్‌ 3లో నిలవడం మాత్రం ఇదే తొలిసారి.

అతడు తన ఆరు త్రోలలోనూ 84 మీటర్లకు తగ్గకుండా జావెలిన్‌ విసిరాడు. నీరజ్‌ వరుసగా 89.94, 84.37, 87.46, 84.77, 86.67, 86.84 మీటర్ల దూరం జావెలిన్‌ విసరడం విశేషం. తన తొలి అటెంప్ట్‌లోనే నేషనల్‌ రికార్డు బ్రేక్ చేసినా.. తర్వాత ఆ స్థాయిలో విసరలేకపోయాడు. ఇక టోక్యో ఒలింపిక్స్‌ సిల్వర్‌ మెడలిస్ట్‌ జూలియన్‌ వెబర్‌ 89.08 మీటర్లతో మూడోస్థానంలో నిలిచాడు.