Hanumakonda District : గొర్ల మంద వద్ద గొడవ.. గొడ్డలితో నరికి చంపిన యజమాని

Hanumakonda district Crime News: హనుమకొండ జిల్లా ధర్మసాగర్ మండలం సాయిపేట గ్రామంలో దారుణ హత్య జరిగింది. గొర్ల మంద వద్ద జరిగిన గొడవలో ఓ వ్యక్తిపై గొర్ల యజమాని గొడ్డలితో దాడిచేయడంతో ఆయన అక్కడికక్కడే ప్రాణాలు కోల్పోయాడు. స్థానికులు తెలిపిన వివరాల ప్రకారం.. సాయిపేట గ్రామానికి చెందిన దద్దు రాజయ్య, అతని కొడుకు మహేందర్​, మరికొందరితో కలిసి తమకున్న గొర్లతో పొలం వద్ద మంద పెట్టారు. రోజులాగే మంగళవారం కూడా మంద పెట్టి, రాత్రి 8 గంటల సుమారులో భోజనం కోసం ఇండ్లకు వెళ్లారు. తిరిగి మంద వద్దకు వస్తున్న క్రమంలో గొర్లు బెదురుతూ కనిపించాయి. అప్పటికే గొర్ల కాపరుల కుక్కలు కూడా వారిని చుట్టుముట్టాయి. పరీక్షించి చూడగా.. గొర్ల మంద సమీపంలో ఎల్కతుర్తి గోపాలపూర్​కు చెందిన గండికోట లక్ష్మణ్​, గండికోట శేఖర్​, సూర శ్రీకాంత్​, గండికోట రమేశ్​ అనే నలుగురు వ్యక్తులు కనిపించారు. దీంతో దొంగలుగా అనుమానించి వారిని దద్దు రాజయ్య, అతని కొడుకు మహేందర్ పట్టుకునే ప్రయత్నం చేశారు. కానీ శేఖర్​, శ్రీకాంత్​, రమేశ్​ అక్కడి నుంచి తప్పించుకుని పరారు కాగా.. లక్ష్మణ్​ ఒక్కడే వారికి చిక్కాడు. దీంతో లక్ష్మణ్​, మహేందర్​కు తీవ్ర గొడవ జరిగింది.

గొడవ తీవ్రం కావడం, తన కొడుకుకు దెబ్బలు తగలడంతో మహేందర్​ తండ్రి రాజయ్య తమ వద్ద ఉన్న గొడ్డలితో లక్ష్మణ్ పై దాడి చేశారు. గొడ్డలి లక్ష్మణ్​ తల, గొంతు భాగంలో తగలడంతో తీవ్ర గాయాలై రక్తస్రావం జరిగింది. దీంతో ఆయన ఘటనాస్థలంలోనే ప్రాణాలు కోల్పోయాడు. వెంటనే సమాచారం అందుకున్న పోలీసులు హుటాహుటిన ఘటనా స్థలానికి చేరుకున్నారు. డెడ్​ బాడీని వరంగల్ ఎంజీఎం మార్చురీకి తరలించారు. హత్య అనంతరం రాజయ్య పోలీసుల ఎదుట లొంగిపోయారు. కాగా మృతుడు లక్ష్మణ్​ భార్య కల్యాణి ఇచ్చిన ఫిర్యాదు మేరకు కేసు నమోదు చేసి దర్యాప్తు జరుపుతున్నట్లు ధర్మసాగర్​ పోలీసులు తెలిపారు.

రిపోర్టింగ్ : హిందుస్థాన్ టైమ్స్, వరంగల్ ప్రతినిధి