Srisailam Project Gates : శ్రీశైలం ప్రాజెక్టు గేట్లు ఎత్తివేత, పరవళ్లు తొక్కుతున్న కృష్ణమ్మ

భారీ వర్షాలు, ఎగువ నుంచి వస్తున్న వరద నీటితో శ్రీశైలం జలశయం నిండు కుండలా మారింది. ఎగువ నుంచి శ్రీశైలం ప్రాజెక్టుకు వరద ప్రవాహం పెరుగుతుండడంతో ఒక్కొక్క గేటును ఎత్తి నీటిని దిగువకు విడుదల చేస్తున్నారు. 

శ్రీశైలం ప్రాజెక్టు మూడు గేట్లను 10 అడుగుల మేర ఎత్తి నీటిని దిగువకు విడుదల చేశారు అధికారులు. శ్రీశైలం పూర్తిస్థాయి నీటిమట్టం 885 అడుగులు, అయితే ప్రస్తుత నీటిమట్టం 878.40 అడుగులకు చేరుకుంది. 

శ్రీశైలం పూర్తిస్థాయి నీటి నిల్వ సామర్థ్యం 215.80 టీఎంసీలు కాగా, ప్రస్తుతం 179.89 టీఎంసీలు నీటి నిల్వ చేరుకుంది. భారీగా వరద ప్రవాహం వస్తుండటంతో అధికారులు మూడు గేట్లను ఎత్తి నీటిని దిగువకు వదులుతున్నారు. 

ఒక్కో గేటు నుంచి 27 వేల క్యూసెక్కులను విడుదల చేస్తున్నారు. శ్రీశైలం ప్రాజెక్టు 6, 7, 8 గేట్లను ఎత్తడం ద్వారా మొత్తంగా 81 వేల క్యూసెక్కుల వరద నీటిని దిగువకు విడుదల చేశారు. 

కర్నూలు చీఫ్‌ ఇంజినీర్‌ కబీర్‌ బాషా శ్రీశైలం గేట్లను ఎత్తి నీటిని నాగార్జున సాగర్‌కు విడుదల చేశారు. ఈ దృశ్యాలను చూసేందుకు పెద్ద సంఖ్యలో పర్యాటకులు ప్రాజెక్టు వద్దకు చేరుకున్నారు. శ్రీశైలం ప్రాజెక్టు వద్ద పర్యాటకుల సందడి నెలకొంది. 

జూరాల ప్రాజెక్ట్,సుంకేసుల డ్యామ్ రెండింటి నుంచి కృష్ణా నదికి ఇన్ ఫ్లో రావడంతో శ్రీశైలం ప్రాజెక్టు గేట్లను ఎత్తారు నీటిపారుదల శాఖ అధికారులు. శ్రీశైలం జలాశయానికి 4.36 లక్షల క్యూసెక్కులు ఇన్ ఫ్లో వస్తుంది. శ్రీశైలం ఎడమ, కుడి పవర్ హౌస్‌లలో విద్యుత్ ఉత్పత్తిని ప్రారంభించారు.