ఒడిలో చెల్లికి లాలి పాటలు.. స్కూల్​లో అక్షర పాఠాలు

Girl babysitting sister | ఆ బాలిక వయస్సు కేవలం 10ఏళ్లు. సరదాగా ఆడుకుంటూ.. చదువుకుంటూ జీవితాన్ని గడపాల్సిన వయస్సు అది. కానీ పదేళ్లకే పెద్ద బాధ్యతలు చేపట్టింది. కానీ చదువును మాత్రం నిర్లక్ష్యం చేయలేదు. ఓవైపు తన చెల్లిని ఒడిలో పెట్టుకుని లాలిపాటలు పాడుతూనే.. మరోవైపు స్కూల్​లో పాఠాలు వింటోంది.

ఒడిలో చెల్లెలు.. మనసంతా చదువు

తామెంగ్లాంగ్​లో నివాసముంటోంది మీనింగ్సిన్లియు పమీ కుటుంబం. ఆమె తల్లిదండ్రులు పొలం పని మీద బయటకు వెళ్లారు. ఈ క్రమంలోనే చంటిపిల్ల అయిన తన చెల్లిని తీసుకుని స్కూలుకు వెళ్లింది పమీ. పసికందును ఒడిలో పెట్టుకుని.. ఆమెను లాలిస్తూనే.. తానూ పాఠాలు వింది.

ఈ ఫొటోను మణిపూర్​ విద్యుత్​శాఖ మంత్రి బిశ్వజిత్​ థోంగమ్​.. ట్వీట్​ చేశారు.

"చదువుకోవాలన్న ఆ బాలిక అంకితభావం నన్ను కదిలించింది. మణిపూర్​ తామెంగ్లాంగ్​కు చెందిన పమీ.. తన చెల్లికి లాలి పాటలు పాడుతూ.. స్కూల్లో పాఠాలు వింటోంది. ఒడిలో చంటిపిల్లను పెట్టుకుని చదువుకుంటోంది," అని రాసుకొచ్చారు బిశ్వజిత్​.

ఈ క్రమంలోనే పమీ తల్లిదండ్రులతో బిశ్వజిత్​ మాట్లాడారు. బాలికను ఇంపాల్​కు తీసుకురావాలని విజ్ఞప్తి చేశారు. బాలిక గ్రాడ్యుయేషన్​ పూర్తయ్యేంత వరకు తాను చూసుకుంటానని వారికి ఆయన హామీనిచ్చారు.

కొద్ది గంటల్లోనే ఈ ఫొటో సామాజిక మాధ్యమాల్లో వైరల్​గా మారింది. ఫొటోను చూసిన వారందరు ఆశ్చర్యపోతున్నారు. బాలికపై ప్రశంసల వర్షం కురిపిస్తున్నారు. 'ఈ ఒక్క ఫొటో.. వేల మాటలతో సమానం,' అని ఓ నెటిజన్​ కామెంట్​ చేశారు.