Infosys moonlighting : 'రెండో ఉద్యోగం చేస్తే.. ఇంటికి పంపించేస్తాము'

Infosys moonlighting news : మూన్​లైటింగ్​పై కీలక ప్రకటన చేసింది దిగ్గజ ఐటీ సంస్థ ఇన్ఫోసిస్​. ఉద్యోగులు మూన్​లైటింగ్​ చేయడానికి తాము వ్యతిరేకమని స్పష్టం చేసింది. ఇలాంటి చర్యలకు పాల్పడే వారి కాంట్రాక్టులు కూడా రద్దు చేస్తామని తేల్చిచెప్పింది. ఇన్ఫోసిస్​ కోడ్​ ఆఫ్​ కాండక్ట్​ ప్రకారం.. ఒకేసారి రెండు ఉద్యోగాలు చేయడం కుదరదని పేర్కొంది.

ఓ కంపెనీ వ్యక్తి.. తన ఉద్యోగం అయిపోయిన తర్వాత వేరే సంస్థకు పనిచేసి రెండో ఆదాయ వనరును పొందడాన్ని ఇంగ్లీష్​లో మూన్​లైటింగ్​ అంటారు. సాధారణంగా.. రెండు కంపెనీల్లో పని చేస్తున్న విషయాన్ని ఉద్యోగులు రహస్యంగా ఉంచుతారు.

ఐటీ కంపెనీల్లో ఇటీవలి కాలంలో మూన్​లైటింగ్​ ఘటనలు ఎక్కువగా వినిపిస్తున్నాయి. సంస్థ ఆమోదం పొందకుండానే అటు ఇటు హడావుడిగా పనులు చేసేస్తున్నారు ఉద్యోగులు. మూన్​లైటింగ్​ వల్ల ప్రొడక్టివిటీ దెబ్బతింటుందని, డేటా బ్రీచ్​ జరిగే అవకాశం ఉందని ఐటీ సంస్థలు ఆందోళన వ్యక్తం చేస్తున్నాయి. ఫలితంగా మూన్​లైటింగ్​ చర్యలకు చెక్​ పెట్టేందుకు ఐటీ సంస్థలు కృషిచేస్తున్నాయి.

"ఇన్ఫోసిస్​లో రెండో ఉద్యోగం చేసేందుకు ఎంప్లాయీస్​ హ్యాండ్​బుక్​ అండ్​ కోడ్​ ఆఫ్​ కాండక్ట్​ అంగీకరించదు. మేము దీనికి వ్యతిరేకం," అని ఉద్యోగులకు పంపిణీ చేసిన అంతర్గత సర్క్యూలర్​లో పేర్కొంది ఇన్ఫోసిస్​. ఫలితంగా ఐటీలో మూన్​లైటింగ్​ వ్యవహారంపై మళ్లీ హాట్​టాపిక్​గా మారింది.

IT moonlighting : మూన్​లైటింగ్​కి పాల్పడటం 'చీటింగ్​'తో సమానం అని.. కొన్ని వారాల క్రితం విప్రో ఎగ్జిక్యూటివ్​ ఛైర్మన్​ రిషద్​ ప్రేమ్​జీ పేర్కొన్నారు. "ఐటీలో మూన్​లైటింగ్​ గురించి చాలా మంది మాట్లాడుకుంటున్నారు. ఇది ఇప్పుడు హాట్​టాపిక్​. కానీ ఇది చాలా సింపుల్​ విషయం. ఇది చీటింగ్​తో సమానం," అని అన్నారు.

"మూన్​లైటింగ్​ ఎక్కువ రోజులు పనిచేయదు. ఉద్యోగులు ఎథిక్స్​ని దృష్టిలో పెట్టుకుని ప్రవర్తించాలి. స్వల్పకాలిక లాభాల కోసం ఇలాంటి  పనులు చేస్తే దీర్ఘకాలంపై ప్రతికూల ప్రభావం పడుతుంది. మీరు చాలా కోల్పోతారు," అని టీసీఎస్​ సీఓఓ ఎన్​. గణపతి సుబ్రమణియం వెల్లడించారు.

మరో ఐటీ సంస్థ ఎంఫసిస్​.. 36వేలకుపైగా ఉద్యోగులపై నిఘా పెట్టినట్టు వెల్లడించింది. మూన్​లైటింగ్​ చేస్తే సహించమని స్పష్టం చేసింది.

అయితే.. మూన్​లైటింగ్​కి అనుకూలంగా ఉన్న వారు కూడా ఉన్నారు.

"కాంట్రాక్టుల పేరు చెప్పి ఉద్యోగులను ఇన్ఫోసిస్​ నియంత్రించలేదు. కోర్టులో ఆ కాంట్రాక్టులు చెల్లవు. ఉద్యోగులు 9గంటల పాటు పనిచేయాల్సి ఉంటుంది. ఆ తర్వాత వాళ్లు ఏం చేస్తారనేది సంస్థలకు అనవసరం," అని ఎన్​ఐటీఈఎస్​(నాసెంట్​ ఇన్ఫర్​మేషన్​ టెక్నాలజీ ఎంప్లాయీస్​ సెనేట్​) అధ్యక్షురాలు హర్​ప్రీత సింగ్​ సలుజ పేర్కొన్నారు.