Warangal IT Raids : ఓరుగల్లును తాకిన ఐటీ దాడుల సెగ, కాటన్ జిన్నింగ్ మిల్లులో సోదాలు

Warangal IT Raids : ఐటీ దాడుల ప్రకంపనలు ఓరుగల్లునూ తాకాయి. ఇప్పటికే మంచిర్యాల జిల్లా చెన్నూరు నియోజకవర్గ కాంగ్రెస్​ అభ్యర్థి, మాజీ ఎంపీ వివేక్​ వెంకటస్వామి ఇళ్లు, ఆఫీసులపై ఐటీ దాడులు కలకలం రేపుతుండగా.. ఆ ఎఫెక్ట్ ఉమ్మడి వరంగల్ జిల్లాలో కూడా కనిపిస్తోంది. అసెంబ్లీ ఎన్నికల నేపథ్యంలో బ్యాంక్​ల నుంచి అధిక లావాదేవీలు జరుపుతున్న ఖాతాలపై ఐటీ అధికారులు దృష్టి పెట్టిన విషయం తెలిసిందే. ఈ క్రమంలోనే జనగామ జిల్లా రఘునాథపల్లిలోని ఓ కాటన్​ జిన్నింగ్ మిల్లులో ఐటీ అధికారులు సోదాలు చేశారు. మంగళవారం ఉదయం 5 గంటల నుంచి దాదాపు నాలుగు గంటల పాటు తనిఖీ నిర్వహించి, రికార్డులన్నింటినీ పరిశీలించారు. కాగా జిన్నింగ్​ మిల్లు ఓనర్​కు ఏఏ రాజకీయ నాయకులతో సంబంధాలు ఉన్నాయనే కోణంలో కూడా అధికారులు దర్యాప్తు చేస్తున్నారు. ఒకేరోజు రాష్ట్రంలోని వివిధ ప్రాంతాల్లో సోదాలు జరగడం.. ఆ వేడి కాస్త ఉమ్మడి వరంగల్ ను తాకడంతో జిల్లాలోని కొందరు నేతల్లో కంగారు మొదలైనట్లు తెలుస్తోంది. కాగా కాంగ్రెస్​ నేతల ఇండ్లపై ఐటీ దాడులను ఆ పార్టీ శ్రేణులు ఖండిస్తున్నారు. కాంగ్రెస్​ నేతలను టార్గెట్​ చేసి దాడులతో ఇబ్బందులకు గురి చేస్తున్నారని మండిపడుతున్నారు. ఓటమి భయంతోనే అధికార పార్టీ నాయకులు ఐటీ దాడులకు ఉసిగోల్పుతున్నారని ఆరోపిస్తున్నారు.

బీఆర్ఎస్, బీజేపీ కుట్రలో భాగమే ఐటీ దాడులు : పొన్నం

రాష్ట్రంలో కాంగ్రెస్​అభ్యర్థుల మీద బీఆర్ఎస్, బీజేపీ చేస్తున్న కుట్రలో భాగంగానే ఐటీ దాడులు జరుగుతున్నాయని మాజీ ఎంపీ, హుస్నాబాద్​ కాంగ్రెస్​ అభ్యర్థి పొన్నం ప్రభాకర్ మండిపడ్డారు. హనుమకొండ జిల్లా భీమదేవరపల్లి మండలం ముత్తారంలో ఆయన మంగళవారం ఎన్నికల ప్రచారం నిర్వహించారు. అనంతరం చెన్నూరు కాంగ్రెస్​అభ్యర్థి వివేక్​వెంకటస్వామి ఇండ్లలో ఐటీ సోదాల విషయమై స్పందించారు. బీజేపీ, బీఆర్ఎస్​కుమ్మక్కై కాంగ్రెస్​నేతలపై ఐటీ దాడులు చేయిస్తున్నారని మండిపడ్డారు. చెన్నూరు వివేక్​ వెంకటస్వామి గెలుపును ఓర్వలేక రెండు పార్టీలు కలిసి కుట్ర చేస్తున్నాయని ఆరోపించారు. ఇందులో భాగంగానే రెండు పార్టీలు కలిసి ఐటీ దాడుల నాటకమాడుతున్నాయని విమర్శించారు. కాంగ్రెస్​ పార్టీ నాయకత్వాన్ని వేధింపులు, భయభ్రాంతులకు గురిచేసి అధికారంలోకి రాకుండా అడ్డుకోవాలని చూస్తున్నారని మండిపడ్డారు. ఎన్ని అడ్డంకులు సృష్టించినా రాష్ట్రంలో అధికారంలోకి వచ్చేది కాంగ్రెస్​ప్రభుత్వమేనని పొన్నం ప్రభాకర్​ ఆశాభావం వ్యక్తం చేశారు.

ములుగులో ఫ్లయింగ్​ స్క్వాడ్ తనిఖీలు

ములుగు ఎమ్మెల్యే సీతక్క తరఫున పంచేందుకు కాంగ్రెస్​ నేతలు భారీగా డబ్బు తీసుకొచ్చారనే సమాచారం నియోజకవర్గంలో కలకలం రేపింది. ములుగులో ప్రచారానికి కర్ణాటక నుంచి వచ్చిన కొందరు కాంగ్రెస్​ నేతలు రామప్ప గెస్ట్​ హౌజ్​లో ఉండగా.. వారు పెద్ద మొత్తంలో డబ్బులు తెచ్చినట్లు ఎలక్షన్​ఆఫీసర్లు, ఫ్లయింగ్​ స్క్వాడ్​బృందాలకు సమాచారం అందింది. దీంతో మంగళవారం తెల్లవారుజామున మూడు గంటల ప్రాంతంలో ఎలక్షన్​ ఆఫీసర్లు, ఫ్లయింగ్​స్క్వాడ్​ టీమ్స్​, బీఆర్ఎస్​ నాయకులు, పలువులు మీడియా ప్రతినిధులు హుటాహుటిన అక్కడకు చేరుకున్నారు. ఆఫీసర్లంతా గెస్ట్​ హౌజ్​లో సోదాలు నిర్వహించారు. రూములతో పాటు బ్యాగులన్నింటినీ తనిఖీ చేశారు. ఎన్నికలకు సంబంధించిన డబ్బులుగానీ, ఇతర వస్తువులేమీ లభించకపోవడంతో తప్పుడు సమాచారమని భావించి అధికారులంతా వెనుదిరిగారు.

రిపోర్టింగ్ : హెచ్.టి.తెలుగు ప్రతినిధి, వరంగల్