‘Uber One’ subscription: భారత్ లో ‘ఉబర్ వన్’ సబ్స్క్రిప్షన్ సర్వీస్ ప్రారంభించిన ఉబర్; క్రెడిట్స్ తో చాలా బెనిఫిట్స్

‘Uber One’ subscription: ఉబర్ తన గ్లోబల్ సబ్ స్క్రిప్షన్ ప్రోగ్రామ్ ఉబర్ వన్ ను భారతదేశంలో కూడా ఆవిష్కరించింది. కస్టమర్ల లాయల్టీని మరింత పెంచుకునే లక్ష్యంతో ఈ ప్రొగ్రామ్ ను ప్రారంభించింది. ఇప్పటికే ఉబర్ వన్ సర్వీస్ కు ప్రపంచవ్యాప్తంగా 25 మిలియన్లకు పైగా చందాదారులు ఉన్నారు. ఇందులో ఉబర్ తరచుగా వినియోగదారులను ఆకర్షించడానికి ప్రత్యేక ప్రోత్సాహకాలను ప్రకటిస్తుంటుంది.

ధరల ప్రణాళికలు

ఉబర్ వన్ మూడు అంచెల ద్వారా అందుబాటులో ఉంటుంది. వైవిధ్యమైన బడ్జెట్ ప్లాన్స్ తో అన్ని కేటగిరీల వినియోగదారులకు ఉపయోగపడేలా ఉంటుంది. ఉబర్ వన్ నెలవారీ సబ్ స్క్రిప్షన్ ధర రూ.149 కాగా, త్రైమాసిక, వార్షిక ప్లాన్లు వరుసగా రూ.349, రూ.1,499 గా ఉంది.

మెంబర్ షిప్ బెనిఫిట్స్

ఉబర్ వన్ సబ్ స్క్రైబర్లు యూబర్ క్రెడిట్స్ కు యాక్సెస్ పొందుతారు. ఇది ట్రిప్పుకు గరిష్టంగా రూ .150 వరకు ఉంటుంది. ఇది తరచుగా ప్రయాణించేవారికి చాలా ప్రయోజనకరంగా ఉంటుంది. ఈ సభ్యత్వంలో జొమాటో గోల్డ్ కు కాంప్లిమెంటరీ మూడు నెలల సబ్స్క్రిప్షన్ వంటి అదనపు ప్రయోజనాలు కూడా ఉన్నాయి. ఇది తరచుగా రైడ్-హెయిలింగ్, ఫుడ్-డెలివరీ సేవలను ఉపయోగించేవారికి ఆకర్షణీయమైన ఎంపిక.

క్యాన్సిలేషన్ కుదరదు

వార్షిక చందాదారులు మాత్రమే వారి ఉబర్ వన్ సభ్యత్వాన్ని రద్దు చేయడానికి వీలు ఉంటుంది. ఉబర్ వన్ సర్వీస్ ను రద్దు చేసిన తరువాత, ఉబెర్ క్రెడిట్స్ తో సహా అన్ని అనుబంధ ప్రయోజనాలు వెంటనే ఉపసంహరించబడతాయి. ఈ నెల ప్రారంభంలో ఉబర్ తన డ్రైవర్ల భద్రత, సౌలభ్యాన్ని మెరుగుపరచడానికి రూపొందించిన అనేక కొత్త యాప్ ఫీచర్లను విడుదల చేసింది. మహిళా డ్రైవర్లు తమ ప్రయాణీకులు మహిళలే ఉండేలా ఎంచుకోవడానికి అనుమతించడం, యాప్ ద్వారా ఆడియో రికార్డింగ్ ను ప్రారంభించడం, ముందస్తు టిప్పింగ్ ఎంపికలను ప్రవేశపెట్టడం, సంపాదన కోసం తక్షణ క్యాష్ అవుట్ ను అందించడం వంటి కీలక అప్ డేట్స్ అందులో ఉన్నాయి.

డ్రైవర్ల భద్రత కోసం..

క్యాబ్ అగ్రిగేటర్ డ్రైవర్లు తమ భద్రత గురించి అసౌకర్యంగా లేదా ఆందోళన చెందితే ట్రిప్పుల సమయంలో ఆడియోను రికార్డ్ చేయడానికి అనుమతిస్తుంది. ఈ రికార్డింగ్ లు సురక్షితంగా ఎన్ క్రిప్ట్ అవుతాయి. డ్రైవర్ లు వాటిని యాక్సెస్ చేయలేరు. డ్రైవర్ సరైన రిపోర్టు ఇస్తేనే రికార్డింగ్స్ ను సమీక్షిస్తామని ఉబర్ (uber) తెలిపింది. అంతేకాకుండా 15 రోజుల తర్వాత ఆడియో ఫైల్స్ అన్నీ ఆటోమేటిక్ గా తమ సిస్టమ్ నుంచి తుడిచివేయబడతాయని కంపెనీ స్పష్టం చేసింది.