Dakshayani Pandey : భళా 'దాక్షాయణి'.. 100శాతం స్కాలర్​షిప్​తో స్టాన్​ఫర్డ్​ వర్సిటీకి..!

Dakshayani Pandey : ఉత్తర్​ ప్రదేశ్​లోని ఓ మారుమూల గ్రామానికి చెందిన ఓ బాలిక.. అద్భుతం చేసింది! మనం తలుచుకుంటే.. ఎన్ని కష్టాలు ఎదురైనా, అనుకున్నది సాధించి తీరుతామని నిరూపించింది! తన ప్రతిభతో.. ప్రఖ్యాత అంతర్జాతీయ విశ్వవిద్యాలయం స్టాన్​ఫర్డ్​లో 100శాతం స్కాలర్​షిప్​ను సంపాదించుకుంది. త్వరలో.. మౌ గ్రామం నుంచి అమెరికాలోని కాలిఫోర్నియాకు వెళ్లనున్న ఆమె పేరు.. 'దాక్షాయణి పాండే'.

భళా దాక్షాయణి..

2023 సెప్టెంబర్​ ఇంటేక్​తో ప్రఖ్యాత స్టాన్​ఫర్డ్​ వర్సిటీలో చేరనుంది దాక్షాయణి. బయోఇంజినీరింగ్​లో మేజర్స్​, ఎంటర్​ప్రెన్యుర్​షిప్​లో మైనర్స్​ చేయనుంది. ప్రస్తుతం ఆమె 12వ తరగతి చదువుకుంటోంది.

Dakshayani Pandey Standford University : ఉత్తర్​ ప్రదేశ్​లోని మారుమూల గ్రామమైన మౌలో జీవిస్తున్నప్పటికీ.. దాక్షాయణి పాండే తల్లిదండ్రులకు చదువు విలువ తెలుసు. ఈ క్రమంలోనే వారు దాక్షాయణి ప్రతిభను గుర్తించి, ప్రోత్సహించారు. ఎన్ని కష్టాలొచ్చినా.. తనకు అండగా నిలిచారు. 10వ తరగతిలో ఉన్నప్పుడు.. విద్యాజ్ఞాన్​లో చేరింది దాక్షాయణి. అక్కడ.. ఆమెకు మంచి విద్య లభించింది. అన్నింట్లోనూ రాణించే దాక్షాయణిని చూసి పొగడని వారంటూ ఎవరూ లేరు! ప్రతి విషయంలోనూ టాప్​-10 స్టూడెంట్స్​లో ఒకరిగా ఉంటూ వస్తోంది.

2021లో జరిగిన ఇండియా@75 నేషనల్​ యూత్​ ఐడియాథాన్​లో పాల్గొని విజేతగా నిలిచింది దాక్షాయణి పాండే. దేశీయంగా రూపొందించిన ఓ ఆటోమోటివ్​ ప్రోటోటైప్​తో.. విజేతగా నిలిచింది. కారులో ఉండిపోయి ప్రాణాలు కోల్పోతున్న పసికందుల జీవితాలను రక్షించే విధంగా ఉన్న ఈ ఆటోమోటివ్​ ప్రోటోటైప్​ ఎంతగానో ఉపయోగపడనుంది. ఫలితంగా అందరి మన్ననలు పొందింది. చదువులోనే కాదు.. స్వచ్ఛంద కార్యక్రమాల్లోనూ ముందుంటుంది. నలుగురు సాయం చేయాలనే భావనలు ఆమెలో ఉంటాయి.

Dakshayani Pandey Uttar Pradesh : స్టాన్​ఫర్డ్​లో ఇన్నోవేటివ్​ ఎంటర్​ప్రెన్యూర్​షిప్​లో పని చేయాలని కలలుకంటోంది దాక్షాయణి. భారత దేశ యువతలో.. ఎంటర్​ప్రెన్యూర్​షిప్​వైపు అడుగులు వేసేందుకు తాను ఉపయోగపడతానని చెబుతోంది. భవిష్యత్తులో.. భారత దేశంలో చిన్నారుల విద్యను మెరుగుపరిచేందుకు కృషిచేస్తానని అంటోంది దాక్షాయణి. ఫలితంగా వారి జీవితాలు అభివృద్ధి చెందుతాయని భావిస్తోంది.

దాక్షాయణి పాండే.. అనుకున్న సాధించి, నలుగురికి ఉపయోగపడాలని మనం కూడా కోరుకుందాము.