Veg Kurma Recipe: ఫంక్షన్ల లాంటి రుచితో వెజ్ కూర్మా రెసిపీ.. ఇంట్లో ఎలా చేయాలంటే..

రెస్టరెంట్లలో, ఫంక్షన్లలో చాలా సార్లు వెజ్ కూర్మా తింటూ ఉంటాం. అయితే ఇంట్లో అలాంటి రుచి రావాలంటే ఒక కూర్మా మసాలాతో ఈ కూర వండాలి. ఇప్పుడు కూర్మా మసాలాతో సహా వెజ్ కూర్మా ఎలా చేసుకోవాలో వివరంగా చూసేయండి.

వెజ్ కూర్మా తయారీకి కావాల్సిన పదార్థాలు:

మసాలా కోసం:

4 చెంచాల కొబ్బరి తురుము

గుప్పెడు జీడిపప్పు (నానబెట్టినవి)

2 చెంచాల గసగసాలు

చెంచా పుట్నాలు

సగం చెంచా ధనియాలు

పావు చెంచా సోంపు

పావు చెంచా జీలకర్ర

2 లవంగాలు

2 యాలకులు

4 మిరియాలు

1 మరాఠీ మొగ్గ

2 పచ్చిమిర్చి, తరుగు

2 వెల్లుల్లి రెబ్బలు

చిన్న అల్లం ముక్క

కూరగాయలు:

1 కప్పు క్యాలీఫ్లవర్ ముక్కలు

సగం కప్పు బంగాళదుంప ముక్కలు

సగం కప్పు బటానీ

సగం కప్పు బీన్స్ ముక్కలు

సగం కప్పు క్యారట్ ముక్కలు

2 చెంచాల నూనె

1 ఉల్లిపాయ, తరుగు

1 టమాటా, ముక్కలు

కరివేపాకు రెబ్బ

పావు చెంచా పసుపు

సగం చెంచా కారం

2 చెంచాల పెరుగు

వెజ్ కూర్మా తయారీ విధానం:

1. ముందుగా కూరగాయలన్నీ శుభ్రంగా కడుక్కుని పక్కన పెట్టుకోవాలి. క్యాలీఫ్లవర్ కూడా కాస్త వేడినీళ్లలో మరిగించి శుభ్రం చేయాలి.
2. ఇప్పుడు మిక్సీలో మసాలా కోసం అని ఇచ్చిన లిస్టులో ఉన్న పదార్థాలన్నీ వేసుకుని కొద్దిగా నీళ్లు పోసుకుని మిక్సీ పట్టుకోవాలి.
3. ఒక ప్రెజర్ కుక్కర్లో నూనె వేసుకుని వేడెక్కాక ఉల్లిపాయ ముక్కలు వేసుకుని వేగనివ్వాలి. అవి రంగు మారాక కరివేపాకు, టమాటాలు, పసుపు, కారం వేసుకుని కలియబెట్టాలి.
4. ఇప్పుడు ముక్కలు కాస్త మెత్తబడ్డాక కూర్మా కోసం మిక్సీ పట్టుకున్న మసాలా వేసుకుని కలుపుకోవాలి. ఒక అయిదు నిమిషాల పాటూ సన్నం మంట మీద మసాలా బాగా వేగనివ్వాలి.
5. నూనె తేలడం గమనిస్తే ఇప్పుడు పెరుగు వేసుకుని బాగా కలపాలి. అందులోనే తరుగుకున్న కూరగాయ ముక్కలన్నీ వేసుకుని కలుపుకోవాలి. 2 కప్పులు నీళ్లు పోసుకుని కలపాలి.
6. మూత పెట్టుకుని 2 విజిల్స్ వచ్చేదాకా ఆగాలి. అంతే వేడివేడిగా వెజిటేబుల్ కూర్మా సర్వ్ చేసుకోవడమే.