Mint Paratha: పుదీనాతో పరాటాలు.. హెల్తీ, టేస్టీ అల్పాహారం..

అల్పాహారంలోకి, లంచ్ లోకి రకరకాల పరాటాలు ప్రయత్నిస్తాం. ఒకసారి ఈ పుదీనా పరాటాలు కూడా చేసుకుని చూడండి. చాలా సింపుల్‌గా, తక్కువ పదార్థాలతో రెడీ అయిపోతాయి. తయారీ కూడా సులభమే. వీటిని ఎలా చేయాలో వివరంగా చూసేయండి.

పుదీనా పరాటా కోసం కావాల్సిన పదార్థాలు:

1 కప్పు పుదీనా ఆకులు

2 కప్పుల గోదుమపిండి

3 చెంచాల నెయ్యి లేదా వెన్న

తగినంత ఉప్పు

సగం చెంచా వాము

సగం చెంచా సోంపు గింజలు

2 ఎండుమిర్చి

1 చెంచా చాట్ మసాలా

పుదీనా పరాటా తయారీ విధానం:

1. ముందుగా పుదీనా ఆకుల్ని శుభ్రంగా కడుక్కుని పక్కన పెట్టుకోవాలి.
2. ఈ ఆకుల్లో సగం పిండి కలుపుకోవడంలో, మిగతా సగం మసాలా తయారీకి వాడుకోవాలి.
3. పిండి తడుపుకోవడం కోసం ఒక పెద్ద బౌల్‌లో గోదుమపిండి, కొద్దిగా నూనె లేదా నెయ్యి, ఉప్పు వేసుకోవాలి. బాగా కలుపుకుని పుదీనా ఆకుల్ని కూడా వీలైనంత సన్నగా తరుగుకుని వేసుకోవాలి.
4. కొద్దికొద్దిగా నీళ్లు పోసుకుంటూ చపాతీ పిండిలాగా కలుపుకోవాలి. దీన్ని పావుగంట పక్కన పెట్టుకోవాలి.
5. ఇప్పుడు ఒక ప్యాన్ లో పుదీనా ఆకులు తీసుకుని నూనె లేకుండా వేయించాలి. కాస్త పొడిగా అయ్యాక బయటకు తీసుకోవాలి. అదే కడాయిలో సోంపు, వాము వేసుకుని వేయించుకోవాలి. ఎండుమిర్చి కూడా వేసుకొని వేయించాలి.
6. వీటన్నింటినీ పొడిగా మిక్సీ పట్టుకుని పొడిలాగా చేసుకోవాలి. ఇదే పొడిలో చాట్ మసాలా కూడా కలుపుకోవాలి.
7. ఇప్పుడు ముందుగా కలుపుకున్న పిండితో చపాతీల్లాగా ఒత్తుకోవాలి. తర్వాత మీద కొద్దిగా నెయ్యి రాసుకుని మసాలా పొడి చల్లుకోవాలి. మసాలా చల్లుకున్నాక చపాతీని దగ్గరికి అనుకుంటూ ఉండలా చేసుకోవాలి.
8. మళ్లీ సన్నగా చపాతీల్లాగా ఒత్తుకొని పెనం మీద నెయ్యి వేసుకుని రెండు వైపులా కాల్చుకోవాలి. అంతే.. పుదీనా పరాటా రెడీ.