Immunity Boosting Soups । మెరుగైన ఇమ్యూనిటీ కోసం న్యూట్రిషనిస్టులు సిఫారసు చేసిన సూప్‌లు ఇవే!

Immunity Boosting Soups: ఇంట్లో తయారుచేసిన సూప్ డిన్నర్ సమయంలో, భోజనాల మధ్య తీసుకునే ఒక ఆరోగ్యకరమైన అల్పాహారం. ముఖ్యంగా చలికాలంలో, ఈ సూప్‌లు శరీరాన్ని వెచ్చగా ఉంచడమే కాకుండా కాలానుగుణంగా వచ్చే దగ్గు, జలుబు, ఇతర శ్వాసకోశ వ్యాధులను ఎదుర్కొనేలా రోగనిరోధక శక్తిని పెంచుతాయి. చలికాలంలో దాహం తక్కువగా వేస్తుంది కాబట్టి, మనం తక్కువ నీరు తాగుతాం. అయితే ఈ సూప్‌లు మీ శరీరానికి అవసరమయ్యే నీటి శాతాన్ని భర్తీ చేస్తాయి. ఆకలని తీర్చి అతి ఆకలిని నిరోధిస్తాయి, తద్వారా ఆరోగ్యకరమైన బరువును కలిగి ఉంటాం, జీర్ణక్రియకు కూడా సూప్‌లు చాలా మంచివి. వివిధ కూరగాయలు, మూలికలు, సుగంధ ద్రవ్యాలతో తయారు చేసే ఈ సూప్‌లు మంచి పోషకాలను శరీరానికి అందిస్తాయి.

సూప్‌లు చాలా రకాలు ఉంటాయి, వీటిలో ఉపయోగించే పదార్థాలను బట్టి ఇవి మీ శరీరానికి కావలసిన అవసరాలను తీరుస్తాయి. ఈ చలికాలంలో సాధారణంగా రోగనిరోధక శక్తి తక్కువగా ఉంటుంది, ప్రస్తుతం కోవిడ్ మహమ్మారి మళ్లీ విజృంభిస్తుంది. వీటన్నింటిని తట్టుకునేలా మీకు శక్తిని అందించే కొన్ని అద్భుతమైన సూప్‌లను పూణేలోని క్లౌడ్‌నైన్ గ్రూప్ ఆఫ్ హాస్పిటల్స్, ఎగ్జిక్యూటివ్ న్యూట్రిషనిస్ట్ శ్రుతి కేలుస్కర్ తెలియజేశారు. ఆ సూప్ వెరైటీలు ఏంటి? వాటి రెసిపీలను ఇక్కడ అందిస్తున్నాం చూడండి.

Roasted Red Pepper Tomato Soup Recipe- కోసం కావలసినవి

• 290 గ్రా కాల్చిన రెడ్ క్యాప్సికమ్
• 270 గ్రా చెర్రీ టమోటాలు (అందుబాటులో లేకపోతే సాధారణ టమోటాలు )
• 1 వెల్లుల్లి
• 1 వెజెటెబుల్ స్టాక్ క్యూబ్
• 1 టేబుల్ స్పూన్ ఆలివ్ నూనె
• 4 టేబుల్ స్పూన్లు బాదం పొడి

రోస్టెడ్ రెడ్ పెప్పర్ టొమాటో సూప్ తయారీ విధానం

1. బ్లెండర్లో టొమాటోలతో పాటు, కాల్చిన రెడ్ క్యాప్సికమ్ వేయండి.
2. ఆపైన వెల్లుల్లి, కూరగాయల స్టాక్ క్యూబ్, 100 ml నీరు, ఆలివ్ నూనె, బాదం పొడి వేసి బాగా నునుపుగా మ్మారేంత వరకు రుబ్బండి.
3. ఇప్పుడు ఈ ద్రావణాన్ని పొగలు వచ్చేంత వరకు వేడి చేయండి. రోస్టెడ్ రెడ్ పెప్పర్ టొమాటో సూప్ రెడీ.

Broccoli Vegan Cream Soup Recipe కోసం కావలసినవి

2 చిన్న ఉల్లిపాయల ముక్కలు

4 లవంగాలు తరిగిన

1 క్యారెట్ ముక్కలు

4 కప్పుల బ్రోకలీ ముక్కలు

2 కప్పుల కూరగాయల స్టాక్

1 కప్పు బాదం పాలు

1 స్పూన్ నూనె

బ్రోకలీ వేగన్ క్రీమ్ తయారీ విధానం

1. బాణలిలో తరిగిన క్యారెట్, ఉల్లిపాయ, వెల్లుల్లిని వేసి వేయించాలి.
2. ఇప్పుడు కొన్ని చెంచాల కూరగాయల స్టాక్ వేసి, కూరగాయలు మెత్తబడే వరకు ఉడికించాలి
3. ఉడికేటపుడు బ్రోకలీ, బాదం పాలు, మిగిలిన కూరగాయల స్టాక్ వేసి మీడియం మంట మీద ఉడకనివ్వండి
4. కూరగాయలు మెత్తబడే వరకు ఉడికించి, ఆపైన చల్లబరిచి ఈ సూప్‌ను బ్లెండర్‌లో పోసి మృదువుగా వచ్చేంత వరకు మిక్స్ చేయండి.
5. వేడి పాన్‌లో సూప్‌ను తిరిగి పోసి నిమిషం పాటు ఉడికించాలి
6. కారం, ఉప్పు వేస్తే బ్రోకలీ వేగన్ క్రీమ్ సూప్ రెడీ. వేడి వేడిగా సర్వ్ చేసుకోండి.

Tangy Carrot- Beetroot Soup- కోసం కావలసినవి

• 1 స్పూన్ నెయ్యి
• 1 క్యారెట్
• 1 బీట్‌రూట్
• 2 కప్పుల నీరు
• 1 స్పూన్ నిమ్మరసం
• 1/2 టీస్పూన్ అల్లం
• చిటికెడు పసుపు
• 2-3 మిరియాలు
• 2- ఏలకులు
• కొన్ని సోంఫ్ విత్తనాలు

టాంగీ క్యారెట్- బీట్‌రూట్ సూప్ తయారీ విధానం

1. ముందుగా ఒక పాన్‌లో నెయ్యి వేసి, అల్లం సహా మిగతా అన్ని మసాలా దినుసులను వేసి 1 నిమిషం పాటు వేయించాలి.
2. ఇప్పుడు దీనిలో నీళ్లు పోసి క్యారెట్, బీట్‌రూట్ ముక్కలు వేసి మీడియం మంట మీద 5-7 నిమిషాలు ఉడికించాలి.
3. అనంతరం చల్లబరిచి, మిక్సర్ లో ఈ సూప్‌ను ప్యూరీలాగా తయారు చేయండి.
4. చివర్లో ఈ బ్లెండెడ్ సూప్‌ను మళ్లీ వేడి చేసి నిమ్మకాయ రసం పిండి వేడిగా సర్వ్ చేయండి.