Harmful for Bones | మాంసం ఎక్కువగా తినకండి.. లేదంటే ఎముకలు పలుచన అవుతాయట!

కాల్షియంను మన శరీరం అంత సులభంగా గ్రహించలేదు. తీసుకున్న ఆహారంలో కేవలం 20-30% కాల్షియం మాత్రమే శరీరానికి అందుతుంది. అయితే కొన్ని రకాల ఆహరపు అలవాట్లు కూడా కాల్షియం శోషణను అడ్డుకుంటాయి. ఇది ఎముకలకు నష్టాన్ని చేకూరుస్తుంది అని పోషకాహార నిపుణురాలు అంజలి ముఖర్జీ పేర్కొన్నారు.

శీతల పానీయాలలో ఫాస్పోరిక్ యాసిడ్ అనేది ప్రిజర్వేటివ్‌గా ఉంటుంది. ఇది ఎముకలను బలహీనపరుస్తుంది.

జంతు సంబధమైన ప్రోటీన్‌ను ఎక్కువగా తీసుకోవడం వల్ల శరీరంలోని కాల్షియం స్థాయిలు పడిపోతాయి. దీనివల్ల ఎముకల దృఢత్వం దెబ్బతింటుంది.

కెఫిన్ సమ్మేళనం ఉండే టీ, కాఫీలు ఎక్కువగా తాగితే శరీరంలోని కాల్షియం మూత్రం ద్వారా విసర్జన అవుతుంది.

నికోటిన్ కాల్షియం శోషణపై ప్రతికూల ప్రభావాలను కలిగిస్తుంది. ధూమపానం, పొగాకు నమలడం ఎముకల పెరుగుదలకు హానికరం.

ఎక్కువగా ఉప్పు, చక్కెర తినే వారిలో కూడా కాల్షియం తక్కువ అవుతుంది.

బక్కపలుచగా ఉండే వారిలో కూడా కాల్షియం తక్కువ ఉంటుంది. కండ లేకపోవడం వలన కాల్షియం నిల్వ చేయటానికి శరీరానికి స్థలం దొరకదు.

నిశ్చలమైన జీవనశైలి ఎముకల పటుత్వానికి హానికరం. వాకింగ్ లేదా రన్నింగ్ వంటి శారీరక వ్యాయామం చేస్తూ ఉండాలి.