Elon Musk Twitter : ఎలాన్​ మస్క్​- ట్విట్టర్​ డీల్​ రద్దు.. అసలేం జరిగింది?

Elon Musk Twitter deal: అపర కుబేరుడు, టెస్లా సీఈఓ ఎలాన్​ మస్క్​.. ట్విట్టర్ డీల్​ ముగిసింది. డీల్​ను పూర్తిగా రద్దు చేసుకుంటున్నట్టు ప్రకటించారు మస్క్​. ఫేక్​ అకౌంట్లపై ట్విట్టర్​ సంస్థ సమాచారం ఇవ్వనందుకే ఈ నిర్ణయం తీసుకున్నట్టు వెల్లడించారు.

ఎలాన్​ మస్క్​ ట్విట్టర్​ డీల్​

ట్విట్టర్​పై దాదాపు ఏడాది కాలంగా మస్క్​ తన అసంతృప్తి వ్యక్తం చేస్తూనే ఉన్నారు. భావప్రకటనా స్వేచ్ఛకు ట్విట్టర్​లో అవకాశాలు ఉండటం లేదని అభిప్రాయపడ్డారు. అనంతరం ఈ ఏడాది తొలినాళ్లల్లో.. ట్విట్టర్​లో దాదాపు 9శాతం వాటాను కొనుగోలు చేశారు. ఆ తర్వాత కొన్ని రోజులకే.. ట్విట్టర్ మొత్తాన్ని​ కొనుగోలు చేసేందుకు ఆఫర్​ ఇచ్చారు. ఎలాన్​ మస్క్​తో డీల్​పై షేర్​ హోల్డర్లు తెగ సంబర పడిపోయారు. ట్విట్టర్​ను వెంటనే మస్క్​ చేతిలో పెట్టాలని నిర్ణయించారు. ఫలితంగా ఎలాన్​ మస్క్​ ట్విట్టర్​ మధ్య 44బిలియన్​ డాలర్ల డీల్​ కుదిరింది.

అంతా సాఫీగా సాగిపోతోంది అనుకున్న సమయంలో.. ట్విట్టర్​కు ఎదురుదెబ్బ తగలింది. ఫేక్​ అకౌంట్లకు సంబంధించి సమస్య మొదలైంది. ట్విట్టర్​ చెబుతున్న దాని కన్నా ఎక్కువ ఫేక్​ అకౌంట్లు ఉన్నాయని, వాటికి సంబంధించిన వివరాలు వెల్లడించాలని మస్క్​ పట్టుబట్టారు. అందుకు ట్విట్టర్​ నిరాకరించింది. ఈ వ్యవహారం దాదాపు రెండు నెలలు సాగింది.

చివరికి.. ట్విట్టర్​తో డీల్​ను రద్దు చేసుకుంటున్నట్టు ఎలాన్​ మస్క్​ ప్రకటించారు.

న్యాయ పోరాటం..

Elon Musk twitter deal cancelled : తాజా పరిణామాలు ఇరు వర్గాల మధ్య న్యాయ పోరాటానికి తెరతీశాయి. ఎలాన్​ మస్క్​ చర్యలకు వ్యతిరేకంగా కోర్టులో పోరాడుతామని ట్విట్టర్​ సంస్థ ఇప్పటికే తేల్చిచెప్పింది. తాము కూడా కోర్టుకు వెళ్లి ట్విట్టర్​ చర్యలను ప్రతిఘటిస్తామని ఎలాన్​ మస్క్​ వర్గం చెబుతోంది. వీరి మధ్య సుదీర్ఘంగా న్యాయ పోరాటం జరిగే అవకాశం ఉంది.

వాస్తవానికి.. ట్విట్టర్​తో ఒప్పందం నుంచి తప్పుకుంటే సంస్థకు ఎలాన్​ మస్క్​ 1 బిలియన్​ డాలర్లు చెల్లించాలని ముందే డీల్​లో ఫిక్స్​ అయ్యింది. దాదాపు 248 బిలియన్​ డాలర్ల సంపద ఉన్న మస్క్​.. 1 బిలియన్​ చెల్లించడం పెద్ద కష్టమేమీ కాదు!

కాగా.. ఎలాన్​ మస్క్​ ట్విట్టర్​ డీల్​ రద్దు అవడంతో ఆ సంస్థ షేర్లు దాదాపు 5శాతం పతనమయ్యాయి.

వాస్తవానికి ఎలాన్​ మస్క్​ ట్విట్టర్​ డీల్​పై విశ్లేషకులు ముందు నుంచే అనుమానాలు వ్యక్తం చేస్తూ వచ్చారు. ట్విట్టర్​ను మస్క్​ అసలు ఎందుకు కొనుగోలు చేసేందుకు ప్రయత్నిస్తున్నారు? అని సందేహాలు వ్యక్తం చేశారు. ఎలాన్​ మస్క్​ ట్విట్టర్​ డీల్​ మధ్యలోనే ఆగిపోతుందని అనేక మంది జోస్యం చెప్పారు. చివరికి వారు అనుకున్నదే జరిగింది!