New Parliament building inauguration : నూతన పార్లమెంట్​ భవనంలో మోదీ పూజలు..

New Parliament building inauguration : దేశ చరిత్రలో మరో కీలక ఘట్టానికి సమయం ఆసన్నమైంది! ఢిల్లీలో నూతన పార్లమెంట్​ భవనం ప్రారంభోత్స వేడుకలు ఆదివారం ఉదయం ప్రారంభమయ్యాయి. నూతన పార్లమెంట్​ భవనం వద్దకు ఉదయాన్నే చేరుకున్న ప్రధానమంత్రి నరేంద్ర మోదీ.. అక్కడ ప్రత్యేక పూజలు నిర్వహించారు.

పార్లమెంట్​లోని గాంధీ విగ్రహం వద్ద ఏర్పాటు చేసిన పందిరిలో పూజా కార్యక్రమాలు జరిగాయి. పండితుల వేద మంత్రాల మధ్య ఆ ప్రాంతం ఆధ్యాత్మిక శోభతో నిండిపోయింది. పూజా కార్యక్రమంలో ప్రధాని మోదీతో పాటు లోక్​సభ స్పీకర్​ ఓం బిర్లా సైతం పాల్గొన్నారు.

ప్రత్యేక పూజల అనంతరం రాజదండం వద్ద సాష్టాంగ నమస్కారం చేశారు ప్రధానమంత్రి. అనంతరం అథీనం మఠాధిపతుల ఆశీర్వాదాలతో రాజదండాన్ని అందుకున్నారు. వేద మంత్రాల మధ్య లోక్​సభలోకి అడుగుపెట్టి.. స్పీకర్​ కుర్చీ వద్ద ఆ రాజదండాన్ని ప్రతిష్టించారు.

ఈ సందర్భంగా.. నూతన పార్లమెంట్​ భవనాన్ని శరవేగంగా పూర్తి చేసిన కార్మికులను ప్రధాని మోదీ సత్కరించారు.

అనంతరం పార్లమెంట్​ ప్రాంగణంలో 'సర్వ ధర్మ' ప్రార్థనలు జరిగాయి. ఇందులో ప్రధాని, స్పీకర్​తో పాటు వివిధ రాష్ట్రాల ముఖ్యమంత్రులు పాల్గొన్నారు.

ఢిల్లీలో హైఅలర్ట్​..!

Parliament building news : నూతన పార్లమెంట్​ భవనం ప్రారంభోత్సవ వేడుకలో పాల్గొనేందుకు వివిధ పార్టీల నేతలు, అతిథులు హాజరవుతారు. ఇదే సమయంలో.. కొత్త పార్లమెంట్​ భవనం వద్దకు మార్చ్​ నిర్వహించాలని ఢిల్లీలో నిరసనలు చేస్తున్న రెజ్లర్లు నిర్ణయించారు. ఈ నేపథ్యంలో ఢిల్లీవ్యాప్తంగా పటిష్ఠ భద్రతను ఏర్పాటు చేశారు అధికారులు. ఎలాంటి అవాంఛనీయ ఘటనలు జరగకుండా చర్యలు చేపట్టారు.