Petrol price cut : త్వరలోనే ప్రజలకు గుడ్​ న్యూస్​.. తగ్గనున్న పెట్రోల్​ ధరలు!

Petrol price cut news today : దేశ ప్రజలకు త్వరలోనే గుడ్​ న్యూస్​ అందనుంది! దేశంలో త్వరలోనే పెట్రోల్​ ధరలు తగ్గే అవకాశం ఉంది. గతంలో ఏర్పడిన నష్టాల నుంచి తేరుకున్న వెంటనే.. ప్రభుత్వ ఆధారిత చమురు సంస్థలు పెట్రోల్​ ధరలను తగ్గిస్తాయని ఆశాభావం వ్యక్తం చేశారు పెట్రోలియంశాఖ మంత్రి హర్దీప్​ సింగ్​ పూరి.

ఇండియన్​ ఆయిల్​ కార్పొరేషన్​ (ఐఓసీ), భారత్​ పెట్రోలియం కార్పొరేషన్​ లిమిటెడ్​ (బీపీసీఎల్​), హిందుస్థాన్​ పెట్రోలియం కార్పొరేషన్​ లిమిటెడ్​ (బీపీసీఎల్​) వంటి ప్రభుత్వ ఆధారిత చమురు సంస్థలు.. దేశంలో పెట్రోల్​, డీజిల్​ ధరలను సవరించి 15 నెలలు గడిచిపోయింది. ఇలా జరగడం చాలా అరుదు! ఈ నేపథ్యంలో.. పెట్రోల్​ ధరలు తగ్గే అవకాశం ఉందని కేంద్రమంత్రి చెప్పడం ప్రాధాన్యత సంచరించుకుంది.

పెరిగాయి.. తగ్గాయి.. కానీ!

Petrol price cut in India : ద్రవ్యోల్బణం కారణంగా గతేడాది అంతర్జాతీయంగా పెట్రోల్​ ధరలు భారీగా పెరిగాయి. ముడిసరకు ధరలు సైతం పెరగడంతో దేశీయ చమురు సంస్థలపై ప్రభావం పడింది. అయితే.. అంతర్జాతీయంగా పెరిగిన ధరల కారణంగా పెట్రోల్​ విషయంలో చమురు సంస్థలకు లాభాలే వచ్చినప్పటికి, డీజిల్​ విషయంలో భారీ నష్టాన్ని చూశాయి. ఆ తర్వాత అంతర్జాతీయంగా ధరలు తగ్గినా.. నష్టాలను కవర్​ చేసుకునేందుకు ఇంకా ప్రైజ్​ కట్​ ప్రకటించలేదు.

"నష్టాల నుంచి బయటపడితే.. ధరలు దిగిరావాలి. పెట్రోల్​, డీజిల్​ ధరలను సవరించకుండా ఉండాలని చమురు సంస్థలకు ప్రభుత్వం చెప్పలేదు. వారి సొంతంగానే అలా చేశారు," అని హర్దీప్​ సింగ్​ పూరి వెల్లడించారు.

పెట్రోల్​పై రూ. 10 లాభం..!

చమురు సంస్థలు ప్రస్తుతం లీటరు పెట్రోల్​పై రూ. 10 లాభాన్ని అర్జిస్తున్నట్టు తెలుస్తోంది. లీటరు డీజిల్​పై రూ. 6.5 నష్టపోతున్నట్టు సమాచారం.

Petrol Diesel price in Hyderabad : "2022 జూన్​ 24తో ముగిసిన వారంలో.. చమురు సంస్థలు రికార్డు నష్టాన్ని చూశాయి. లీటరు పెట్రోల్​పై రూ. 17.4, లీటరు డీజిల్​పై రూ. 27.7 నష్టపోయాయి. ఇప్పుడు పరిస్థితుల్లో మార్పులు కనిపిస్తున్నాయి. 2022 అక్టోబర్​- డిసెంబర్​ త్రైమాసికంలో లీటరు పెట్రోల్​పై చమురు సంస్థలు రూ. 10 లాభాన్ని అర్జించాయి. డీజిల్​పై నష్టాలు కూడా దిగొచ్చాయి. డిసెంబర్​తో ముగిసిన త్రైమాసికంలో లీటరు డీజిల్​పై రూ. 6.5 నష్టాన్ని నమోదు చేశాయి," అని ఇటీవలే బయటకొచ్చిన ఓ నివేదిక వెల్లడించింది.

ప్రస్తుతం హైదరాబాద్​లో లీటరు పెట్రోల్​ ధర రూ. 109.6గా ఉంది. ఇక లీటరు డీజిల్​ ధర రూ. 97.82గా ఉంది. ఢిల్లీలో లీటరు డీజిల్​ ధర రూ. 89.62గాను, లీటరు పెట్రోల్​ ధర రూ. 96.72గా కొనసాగుతోంది.