Donald Trump : 2024 అమెరికా అధ్యక్ష ఎన్నికల బరిలో డొనాల్డ్ ట్రంప్!
Donald Trump 2024 US presidential election : 2024 అమెరికా అధ్యక్ష ఎన్నికల్లో డొనాల్డ్ ట్రంప్ పోటీ చేయనున్నారు. ఇదే విషయంపై వచ్చే వారం కీలక ప్రకటన చేయనున్నారు!
Donald Trump 2024 US presidential election : వచ్చే వారంలో ఓ కీలక ప్రకటన చేస్తానని అమెరికా మాజీ అధ్యక్షుడు డొనాల్డ్ ట్రంప్ ఇటీవలే తెలిపారు. ఈ నేపథ్యంలో.. 2024 అధ్యక్ష ఎన్నికల్లో ఆయన బరిలో దిగుతారన్న ఊహాగానాలు జోరందుకున్నాయి. తాజాగా.. ఈ విషయంపై ట్రంప్ సన్నిహితుడు క్లారిటీ ఇచ్చేశారు. 2024 అమెరికా అధ్యక్ష ఎన్నికల్లో ట్రంప్ పోటీచేస్తారని, ఈ విషయాన్నే వచ్చే వారం చెబుతారని ఆయన సలహాదారు జేసన్ మిల్లర్ వెల్లడించారు.
ట్రెండింగ్ వార్తలు
అమెరికాలో మధ్యంతర ఎన్నికలు ఇటీవలే ముగిశాయి. ఎన్నికల ప్రచారాల్లో ఉత్సాహంగా పాల్గొన్నారు డొనాల్డ్ ట్రంప్. ఈ క్రమంలోనే కొన్ని రోజుల్లో కీలక ప్రకటన చేస్తానని అన్నారు.
తాజాగా ఈ విషయాన్ని ట్రంప్ దీర్ఘకాలిక సలహాదారు జేసన్ మిల్లర్.. ఓ పాడ్క్యాస్ట్లో ప్రస్తావించారు.
2024 US presidential election : "అధ్యక్ష ఎన్నికల్లో పోటీ చేయనున్నట్టు వచ్చే మంగళవారం డొనాల్డ్ ట్రంప్ ప్రకటించనున్నారు. ఈ ప్రకటన చాలా ప్రొఫెషనల్గా ఉంటుంది. 'ఈ విషయంలో అసలు సందిగ్ధతే వద్దు. నేను పోటీ చేస్తున్నా,' అని ట్రంప్ నాకు చెప్పారు," అని మిల్లర్ వెల్లడించారు.
2024 నాటికి ట్రంప్ వయస్సు 78గా ఉంటుంది. 2024 ఎన్నికల్లో బరిలో దిగితే.. అధ్యక్ష పదవి కోసం ఆయన మూడోసారి పోటీలో నిలిచినట్టు అవుతుంది.
సవాళ్లు ఎన్నో..
2020లో ప్రస్తుత అధ్యక్షుడు జో బైడెన్ చేతిలో ఓటమి పాలయ్యారు డొనాల్డ్ ట్రంప్. అనంతరం జరిగిన యూఎస్ క్యాపిటల్ హింసాకాండలో ఆయన హస్తం ఉందని ఆరోపణలు వెల్లువెత్తాయి. ఈ వ్యవహారంపై ఆయన విచారణ ఎదుర్కొంటున్నారు. 2024 అధ్యక్ష ఎన్నికల్లో పోటీ చేస్తున్నట్టు ట్రంప్ ఇంత త్వరగా ప్రకటించడానికి ఇది కూడా ఓ కారణంగా తెలుస్తోంది. తాను శక్తివంతంగా ఉన్నట్టు ఈ విధంగా ట్రంప్ చెబుతున్నారని రాజకీయ విశ్లేషకులు అభిప్రాయపడుతున్నారు.
Donald trump latest news : మరోవైపు.. మధ్యంతర ఎన్నికల్లో ట్రంప్నకు చెందిన రిపబ్లికెన్ పార్టీ ప్రదర్శన.. అంచనాలను తలకిందులు చేసింది. ప్రతినిధుల సభలో పైచేయి సాధించినప్పటికీ.. ఆశించిన మేర ఫలితాలు రాలేదు. ట్రంప్ స్వయంగా ఎంపిక చేసిన అభ్యర్థులెందరో ఓటమి పాలయ్యారు.
ఇదే సమయంలో.. మధ్యంతర ఎన్నికల్లో రిపబ్లికెన్ పార్టీ తరఫున భారీ మెజారిటీతో గెలిచిన ఫ్లొరిడా గవర్నర్ రాన్ డేసాంటిస్ కూడా 2024 అధ్యక్ష ఎన్నికల్లో పోటీ చేసే అవకాశం ఉందని ఊహాగానాలు వెల్లువెత్తాయి. రాన్ నుంచి పోటీ ఎదురయ్యే అవకాశం ఉందని భావించిన ట్రంప్.. పార్టీలో తన ఆధిపత్యాన్ని నిరూపించుకునేందుకే.. ఇంత తొందరగా అధ్యక్ష ఎన్నికలపై ప్రకటన చేస్తున్నట్టు పలువురు అభిప్రాయపడుతున్నారు.
సంబంధిత కథనం