Chennai rains : దంచికొడుతున్న వర్షాలు.. చెన్నై ఉక్కిరిబిక్కిరి!

Chennai rains today : ఈశాన్య రుతుపవనాల రాకతో తమిళనాడు వ్యాప్తంగా భారీ వర్షాలు కురుస్తున్నాయి. సోమవారం సాయంత్రం నుంచి ఎడతెరిపి లేకుండా కురుస్తున్న వానలకు.. చెన్నైతో పాటు ఇతర ప్రాంతాలు తడిసి ముద్దయ్యాయి. ఫలితంగా అనేక ప్రాంతాల్లో రోడ్లు జలమయమయ్యాయి. పలు ప్రాంతాల్లో విద్యుత్​ సరఫరాకు తీవ్ర ఆటంకం ఎదురైంది.

స్కూళ్లు మూసివేత..

చెన్నైలో మంగళవారం ఉదయం నుంచి జోరుగా వర్షాలు కురుస్తున్నాయి. పలు ప్రాంతాల్లో ట్రాఫిక్​ నిలిచిపోయింది. జీసీసీ(గ్రేటర్​ చెన్నై కార్పొరేషన్​) అధికారులు.. నగరంలోని అనేక ప్రాంతాలను సమీక్షించి.. తాజా పరిస్థితులను పరిశీలించారు. వరద ముప్పు ప్రాంతాల్లో మానిటరింగ్​ కెమెరాలు ఏర్పాటు చేసి, నిత్యం పరిస్థితులను సమీక్షిస్తున్నారు. చెన్నై మెట్రో రెండో దశ ప్రాజెక్టు పనుల నేపథ్యంలో.. అనేక ప్రాంతాల్లోని రోడ్ల మీద బ్యారికేడ్లను ఏర్పాటు చేశారు.

Tamil Nadu rains latest updates : చెన్నైతో పాటు తిరువల్లూర్​, చెంగల్​పేట్​, తంజావూర్​, తిరువరూర్​, నాగపట్టినం, కంచీపురం ప్రాంతాల్లోని స్కూళ్లకు, విద్యా సంస్థలకు సెలవులు ప్రకటించారు అధికారులు.

తమిళనాడులో భారీ వర్షాలపై మరికొన్ని గంటల్లో సీఎం ఎంకే స్టాలిన్​ ఉన్నత స్థాయి సమీక్షను నిర్వహించనున్నారు. ప్రజలకు ఇబ్బందులు కలగకుండా తీసుకోవాల్సిన జాగ్రత్తలపై చర్చలు జరపనున్నట్టు తెలుస్తోంది.

ఐఎండీ హెచ్చరికలు..

IMD rain alert : ఈ నెల 5వ తేదీ వరకు రాష్ట్రవ్యాప్తంగా భారీ వర్షాలు కురుస్తాయని ఐఎండీ(భారత వాతావరణశాఖ) హెచ్చరించింది. ఈ మేరకు ఈ నెల 4 వరకు రాష్ట్రానికి యెల్లో అలర్ట్​ జారీ చేసింది. పలు జిల్లాలకు మాత్రం ఆరెంజ్​ అలర్ట్​ చేసింది. ఇక మంగళవారం.. పలు ప్రాంతాల్లో భారీ నుంచి అతి భారీ వర్షాలు పడతాయని స్పష్టం చేసింది.

తమిళనాడుతో పాటు కోస్తా ఆంధ్ర, కేరళ-మాహే, దక్షిణ కర్ణాటక ప్రాంతాలకు కూడా ఈ నెల 3 వరకు వర్ష సూచనను ఇచ్చింది భారత వాతావరణ శాఖ. వరదలతో ప్రజలు అప్రమత్తంగా ఉండాలని స్పష్టం చేసింది.