Naga Chaitanya on Divorce: సమంతతో పెళ్లి విషయంలో నన్ను చాలా బాధ పెట్టింది అదొక్కటే: నాగ చైతన్య

Naga Chaitanya on Divorce: సమంతతో పెళ్లి, విడాకులపై విషయంపై మరోసారి స్పందించాడు నాగ చైతన్య. సమంతతో విడాకులు అత్యంత దురదృష్టకరమని చైతూ అన్నాడు. ఈ మధ్య ఓ ఇంటర్వ్యూలో చైతన్య పెళ్లి, విడాకులపై మాట్లాడాడు. అయితే తన జీవితంలోని ఆ దశకు మాత్రం తాను ఎంతో గౌరవం ఇస్తామని స్పష్టం చేశాడు.

"నా వ్యక్తిగత జీవితంలో పెళ్లి విషయంలో జరిగినది చాలా దురదృష్టకరం. కానీ నా జీవితంలోని ఆ దశకు కూడా నేనెంతో గౌరవం ఇస్తాను. ఈ విషయంలో మీడియా రిపోర్టులు, వాళ్ల పుకార్లు, వాటిని వ్యాప్తి చేసిన తీరు వల్ల అభిమానుల దృష్టిలో ఆ గౌరవం పోయింది. ఇదే నన్ను చాలా బాధ పెట్టే విషయం" అని జర్నలిస్టు ప్రేమకు ఇచ్చిన ఇంటర్వ్యూలో చైతన్య అన్నాడు.

ఇక ఇప్పుడు శోభితా దూళిపాళ్లతో తన డేటింగ్ రూమర్లపై కూడా చైతూ స్పందించాడు. అయితే ఆమె పేరు ఎత్తకుండా అతడు ఈ కామెంట్స్ చేశాడు. ఇవి కూడా కేవలం వాళ్ల హెడ్‌లైన్స్ కోసం క్రియేట్ చేసిన రూమర్లే అని అతడు స్పష్టం చేశాడు. గతంలో జరిగిందంతా మరచిపోవాలని కూడా ఈ సందర్భంగా చైతన్య కోరాడు.

"కేవలం హెడ్‌లైన్స్ కోసం నన్న మరో వ్యక్తితో ముడిపెట్టి రూమర్లు వ్యాప్తి చేస్తున్నారు. ఇది నన్ను చాలా బాధ పెడుతోంది. ఆ మూడో వ్యక్తి ప్రమేయం లేకుండా ఇందులోకి లాగుతున్నారు. జరిగిందేదో జరిగిపోయింది.. గతాన్ని మరచిపోవాలి" అని చైతన్య అన్నాడు. సమంత, తాను అధికారికంగా విడాకులతో విడిపోయినట్లు ఈ మధ్యే చైతూ చెప్పాడు.

2010లో తొలిసారి ఏ మాయ చేసావే సినిమాతో ఈ ఇద్దరి మధ్య పరిచయం ఏర్పడింది. ఎన్నో ఏళ్ల పాటు డేటింగ్ లో ఉన్న చై, సామ్.. 2017లో పెళ్లి చేసుకున్నారు. కానీ నాలుగేళ్లకే వీళ్ల పెళ్లి పెటాకులైంది. 2021, అక్టోబర్ లో తాము విడిపోతున్నట్లు చెప్పారు. ఆ సమయంలో చాలా మంది అక్కినేని అభిమానులు.. సమంతనే నిందించారు. ప్రస్తుతం చైతన్య తన నెక్ట్స్ మూవీ కస్టడీ రిలీజ్ కోసం వేచి చూస్తున్నాడు.