KBKJ Collections: భారీగా తగ్గిన 'కిసీ కా భాయ్ కిసీ కా జాన్' వసూళ్లు.. 'దసరా'లో సగం కూడా రాలేదు..!

KBKJ Collections: సల్మాన్ ఖాన్ హీరోగా, పూజా హెగ్డే హీరోయిన్‌గా నటించిన సరికొత్త చిత్రం కిసీ కా భాయ్ కిసీ కా జాన్. ఈ మూవీలో వెంకటేష్, భూమికా చావ్లా కీలక పాత్రలు పోషించారు. తమిళంలో సూపర్ హిట్టయిన అజిక్ వీరమ్ సినిమాకు రీమేక్‌గా ఇది తెరకెక్కింది. సల్మాన్ ఇందులో సరికొత్త రూపంలో దర్శనమిచ్చాడు. రంజాన్ కానుకగా ప్రేక్షకుల ముందుకు వచ్చిన ఈ మూవీ మిక్స్‌డ్ టాక్ తెచ్చుకుంది. అంతేకాకుండా వసూళ్లపై కూడా భారీగా ప్రభావం పడింది. ఆడియెన్స్‌ను పెద్దగా ఆకట్టులేకపోవడంతో బాక్సాఫీస్ వద్ద కలెక్షన్లు ఆశించిన స్థాయిలో రావట్లేదు.

ఏప్రిల్ 21న విడుదలైన ఈ మూవీకి తొలి రోజు ఓపెనింగ్స్ కేవలం రూ.15.82 కోట్లు మాత్రమే వచ్చాయి. ఇది గత 10 సంవత్సరాల్లో సల్మాన్ నటించి ఈద్‌కు విడుదల చేసిన సినిమాల వసూళ్ల కంటే అతి తక్కువగా వచ్చాయి. దశాబ్దా కాలంలో సల్మాన్ ఓపెనింగ్స్ భారీగా డ్రాప్ అవడం ఇదే తొలిసారి. చివరగా 2010 దబాంగ్ చిత్రానికి మొదటి రోజు రూ.14.50 కోట్లు వచ్చాయి. ఆ తర్వాత బాడీగార్డ్ చిత్రానికి రూ.21.60 కోట్లు లభించాయి.

ఈ పదేళ్లలో సల్మాన్‌కు వచ్చిన అతి తక్కువ కలెక్షన్లు కిసీ కా భాయ్ కిసీ కా జాన్‌కే వచ్చాయి. ఈ పదేళ్లలో ఆయన నటించిన ఏక్ థా టైగర్, బజరంగీ భాయ్ జాన్, రేస్-2, భారత్ లాంటి మూవీస్‌కు కూడా కనీసం రూ.20 కోట్ల వసూళ్లు వచ్చాయి. భారీగా వసూళ్లు డ్రాప్ అవుతుండటంతో మూవీ మేకర్స్ ఆందోళన చెందుతున్నారు.

ఇక్కడ ఆసక్తికరమైన విషయమేమంటే తెలుగులో ఇటీవల సూపర్ హిట్టయిన నేచురల్ స్టార్ నాని నటించిన దసరా ఓపెనింగ్స్ కంటే కూడా సల్మాన్ మూవీ తక్కువగా వచ్చాయి. దసరాకు రెండో రోజు దాదాపు రూ.38 కోట్లు రాగా.. అందులో సగం కూడా ఇప్పుడు సల్మాన్ మూవీకి రాకపోవడం గమనార్హం.

కిసీ కా భాయ్ కిసీ కా జాన్ మూవీకి రివ్యూస్ అన్నీ బిలో యావరేజ్ రేటింగ్సే వచ్చాయి. లాజిక్ లెస్ సీన్లు, బోరింగ్ డ్రామాతో సినిమా ఆసక్తికరంగా లేదని రివ్యూస్‌లో తేలింది. అంతేకాకుండా ఆడియెన్స్ కూడా మొదటి నుంచి ఈ మూవీపై సానుకూల స్పందనను తెలియజేయలేదు. దీంతో మూవీకి డిజాస్టర్ టాక్ వచ్చింది.