Swiggy platform fee : స్విగ్గీ మాస్టర్​ ప్లాన్​.. కొత్త 'ఫీజ్​'తో రోజుకు రూ. 30లక్షల ఆదాయం!

Swiggy platform fee : ప్రముఖ ఆన్​లైన్​ ఫుడ్​ డెలివరీ సంస్థ స్విగ్గీ.. కస్టమర్లపై అదనపు భారం వేసేందుకు సిద్ధపడింది. యాప్​లో కొత్తగా 'ప్లాట్​ఫార్మ్​ ఫీజ్​'ను ప్రవేశపెట్టింది. ఫలితంగా ప్రతి ఆర్డర్​ మీద రూ. 2ను అదనంగా పొందనుంది. ఈ ఒక్క చర్యతో.. స్విగ్గీ అదనంగా రూ. 30లక్షలు సంపాదించనుంది.

ప్లాట్​ఫార్మ్​ ఫీజ్​..

ఫుడ్​ డెలివరీ బిజినెస్​ నెమ్మదించడం కారణంగా స్విగ్గీకి కష్టాలు కొనసాగుతున్నాయి. ఇన్​వెస్టర్ల నుంచి ఒత్తిడి పెరుగుతున్నట్టు తెలుస్తోంది. ఈ నేపథ్యంలో నష్టాల్లో ఉన్న సంస్థను లాభాల్లోకి తీసుకెళ్లాలని స్విగ్గీ ఫిక్స్​ అయినట్టు సమాచారం. అందుకు తగ్గట్టుగా చర్యలు చేపట్టింది. కాస్ట్​ కటింగ్​ పేరుతో అనేక ఉద్యోగులను తొలగించింది. ఇక ఇప్పుడు కస్టమర్లపై ప్లాట్​ఫార్మ్​ ఫీజ్​తో అదనపు భారాన్ని వేసింది.

Swiggy platform charges : ఈ ప్లాట్​ఫార్మ్​ ఫీజ్​ అనేది కేవలం ఫుడ్​ డెలివరీకే వర్తిస్తోంది. ఇన్​స్టామార్ట్​ ఆర్డర్లకు ప్రస్తుతం ఈ ఛార్జీలు లేవు. ఈ ప్లాట్​ఫార్మ్​ ఫీజ్​ అనేది.. హ్యాండ్లింగ్​ ఫీజ్​కు పూర్తిగా భిన్నం. ప్రస్తుతం ఈ కొత్త ఛార్జీలు బెంగళూరు, హైదరాబాద్​లో అమల్లోకి వచ్చాయి. త్వరలోనే ఢిల్లీ, ముంబైలోనూ ఇవి కనిపిస్తాయని తెలుస్తోంది.

రోజుకు రూ. 30లక్షలు...!

స్విగ్గీ రోజుకు 1.5 మిలియన్​ ఆర్డర్లను డెలివరీ చేస్తుంది. వీటిపై రూ. 2 అదనంగా వసూలు చేసినా.. ఆదాయం రూ. 30లక్షలు పెరుగుతుంది! ఫలితంగా సంస్థ నష్టాలు తగ్గి, లాభాలు పెరుగుతాయని స్విగ్గీ భావిస్తోంది.

Swiggy latest news : ఎఫ్​వై22లో స్విగ్గీ ఆదాయం రూ. 5,704.9కోట్లుగా ఉంది. కాగా.. సంస్థ చేసే ఖర్చులు రూ. 3,900కోట్లకు చేరింది. మరో ఫుడ్​ డెలివరీ సంస్థ జొమాటోతో (రూ. 700కోట్లు) పోల్చుకుంటే.. ఇది చాలా ఎక్కువే.

స్విగ్గీకి గట్టిపోటీనిస్తున్న జొమాటో సైతం.. ఇటీవలే రెస్టారెంట్ల నుంచి వచ్చే కమిషన్​లను పెంచుతామని చెప్పింది.

క్లౌడ్​ కిచెన్​ నుంచి ఔట్​..

క్లౌడ్ కిచెన్ బిజినెస్ నుంచి వైదొలగాలని స్విగ్గీ ఇటీవలే నిర్ణయించుకుంది. తన క్లౌడ్ కిచెన్ బిజినెస్​ను.. ఈ రంగంలో తమకు ప్రధాన పోటీదారుగా ఉన్న ‘కిచెన్స్ ఎట్ (Kitchens@)’ కు విక్రయించేందుకు డీల్ కుదుర్చుకుంది. ఈ డీల్ మార్చి 1 నుంచి అమల్లోకి వచ్చింది. పూర్తి వివరాల కోసం ఇక్కడ క్లిక్​ చేయండి.