HTC Wildfire E Plus । హెచ్టిసి నుంచి బడ్జెట్ ధరకే స్టైలిష్ స్మార్ట్ఫోన్!
హెచ్టిసి నుంచి HTC Wildfire E Plus అనే బడ్జెట్ స్మార్ట్ఫోన్ విడుదలైంది. దీని ధర, ఫీచర్లు, లభ్యత గురించి ఇక్కడ తెలుసుకోండి.
తైవాన్ టెక్ దిగ్గజం HTC, ప్రస్తుతం గట్టి పోటీ ఉన్న స్మార్ట్ఫోన్ మార్కెట్ నుండి దాదాపు కనుమరుగైంది. అయినప్పటికీ ఈ బ్రాండ్ తమ 'వైల్డ్ఫైర్' సిరీస్ నుంచి తక్కువ బడ్జెట్ స్మార్ట్ఫోన్ మోడల్లను కొన్ని మార్కెట్లలో విడుదల చేస్తోంది. తాజాగా కంపెనీ ఇప్పుడు HTC Wildfire E Plus పేరుతో ఒక సరికొత్త స్మార్ట్ఫోన్ను ఆవిష్కరించింది.
ఇది ఎంట్రీ-లెవెల్ మొబైల్ కాబట్టి ఈ హ్యాండ్సెట్లో ఫీచర్లు తక్కువగానే ఉంటాయి. అందుకు తగినట్లుగా ధర ఉంటుంది. అయితే తాజాగా లాంచ్ చేసిన HTC Wildfire E Plus స్మార్ట్ఫోన్, ఈ ఏడాది జూన్లో గ్లోబల్ మార్కెట్లో విడుదల అయిన UMIDIGI G1 మోడల్కు రీబ్రాండెడ్ వెర్షన్ అని చెబుతున్నారు.
'హెచ్టిసి వైల్డ్ఫైర్ ఇ ప్లస్' బడ్జెట్ స్మార్ట్ఫోన్ అయినప్పటికీ, ఇందులో USB-C పోర్ట్ సపోర్ట్ చేసే పెద్ద బ్యాటరీ, డ్యూయల్ కెమెరా సెటప్, మీడియాటెక్ ప్రాసెసర్, HD+ రిజల్యూషన్ కలిగిన డిస్ప్లే ఉన్నాయి. ఇది 32GB ఇంటర్నల్ స్టోరేజ్ కలిగిన ఏకైక కాన్ఫిగరేషన్లో అందుబాటులో ఉంటుంది. అయితే మైక్రో SD కార్డ్ స్లాట్ను కలిగి ఉండటంతో మెమరీని మరింత పెంచుకోవచ్చు. ఈ పరికరం ఆండ్రాయిడ్ 12 (గో ఎడిషన్)లో నడుస్తుంది. గో ఎడిషన్ అంటే ఆపరేటింగ్ సిస్టంలో తేలికపాటి వెర్షన్.
HTC Wildfire E Plusలో మిగతా ఫీచర్లు, స్పెసిఫికేషన్లు ఎలా ఉన్నాయి, ధర ఎంత? తదితర వివరాలను ఇక్కడ పరిశీలించండి.
HTC Wildfire E Plus స్మార్ట్ఫోన్ ఫీచర్లు, స్పెసిఫికేషన్లు
- 60Hz రిఫ్రెష్ రేట్ కలిగిన 6.52 అంగుళాల HD+ డిస్ప్లే
- 2GB RAM, 32GB స్టోరేజ్ సామర్థ్యం
- క్వాడ్-కోర్ మీడియాటెక్ MT6739 ప్రాసెసర్
- వెనకవైపు 13MP+ 5MP డ్యూయల్ కెమెరా సెటప్
- ముందు భాగంలో 5MP సెల్ఫీ షూటర్
- ఆండ్రాయిడ్ 12 GO ఆపరేటింగ్ సిస్టమ్
- 5150 mAh బ్యాటరీ సామర్థ్యం, 10W ఫాస్ట్ ఛార్జర్
అదనంగా, డ్యూయల్ సిమ్, 4G VoLTE, Wi-Fi 802.11 b/g/n, బ్లూటూత్ 4.2, GPS, USB-C పోర్ట్, 3.5mm ఆడియో జాక్, సైడ్-ఫేసింగ్ ఫింగర్ ప్రింట్ స్కానర్ , ఫేస్ అన్లాక్ వంటి ఇతర ఫీచర్లు ఉన్నాయి.
ప్రస్తుతం రష్యాలో ఈ HTC Wildfire E Plus ఫోన్ అందుబాటులోకి వచ్చింది. అక్కడ దీని ధర RUB 7,990. అంటే భారతీయ కరెన్సీలో సుమారుగా రూ. 10,600/-. ఈ ఫోన్ త్వరలో ఇతర మార్కెట్లలోనూ విడుదల కానుంది. భారతదేశంలో విడుదలైతే, ఈ ఫోన్ రూ. 10 వేల కంటే తక్కువ ధరకే లభించనుంది.
కంపెనీ నుంచి ఇంతకు ముందు మెటావర్స్ సపోర్ట్ చేసే HTC Desire 22 Pro స్మార్ట్ఫోన్, అలాగే HTC A101 టాబ్లెట్ గ్లోబల్ మార్కెట్లో విడుదలయ్యాయి.
సంబంధిత కథనం