Baaz Electric Bike । తక్కువ ధరకే ఎలక్ట్రిక్ స్కూటర్, అద్దెకు కూడా తీసుకోవచ్చు!

దేశంలో ఎలక్ట్రిక్ వాహనాలు, స్కూటర్‌ల మార్కెట్ ఊపందుకుంటోంది. తాజాగా, బాజ్ బైక్స్ అనే ఎలక్ట్రిక్ వెహికల్ స్టార్టప్ తమ బ్రాండ్ మీద మొట్టమొదటి 'స్మార్ట్-రగ్డ్' ఎలక్ట్రిక్ స్కూటర్‌లను విడుదల చేసింది. ఈ ఎలక్ట్రిక్ బైక్ పూర్తిగా మేడ్-ఇన్-ఇండియా. IIT ఢిల్లీకి చెందిన వ్యవస్థాపక బృందం సొంతంగా డిజైన్ చేసిన, రూపొందించిన ఎలక్ట్రిక్ స్కూటర్ ఇది. బాజ్ ఎలక్ట్రిక్ స్కూటర్ చూడటానికి ఎంతో ఆకర్షణీయంగా ఉండటంతో పాటు, ఎంతో దృఢంగా ఉంది. ఎక్స్-షోరూమ్ వద్ద దీని ధర రూ. 35,000/- గా ఉంది. ఈ ఎలక్ట్రిక్ స్కూటర్ నుండి బ్యాటరీని వేరు చేయవచ్చు.

ద్విచక్ర వాహన లాజిస్టిక్ మార్కెట్‌కు తక్కువ ఖర్చుతో కూడుకున్న, వినూత్నమైన పరిష్కారాలను తీసుకురావాలనే లక్ష్యంతో, తమ బాజ్ స్కూటర్‌ను విడుదల చేసినట్లు కంపెనీ తెలిపింది. ఈ బైక్స్ ప్రత్యేకంగా రోజూవారీ అవసరాలను తీర్చే గిగ్ వర్కర్లు, డెలీవరీ వర్కర్ల కోసం అభివృద్ధి చేసినవి. తేలికపాటి సామాగ్రిని తీసుకెళ్లటానికి ఈ బైక్ సీట్ వెనక భాగంలో ప్రత్యేకంగా స్థలం కేటాయించారు. ఎలక్ట్రిక్ స్కూటర్ నుండి బ్యాటరీని వేరు చేసే వీలు ఉండటంతో ఖర్చును మరింత పొదుపు చేయవచ్చు.

Baaz Electric Bikes అద్దెకు కూడా

ఈ బాజ్ ఎలక్ట్రిక్ స్కూటర్‌తో పాటుగా EV కంపెనీ బాజ్ స్వాపింగ్ నెట్‌వర్క్, అలాగే ఎనర్జీ పాడ్స్ (స్వాప్ చేయగల బ్యాటరీ)ని కూడా లాంచ్ చేసింది.

సరికొత్త బాజ్ బైక్స్ అద్దె ప్రాతిపదికన కూడా అందుబాటులో ఉంటాయి. ఈ ఇ-స్కూటర్‌ను బాజ్ అధికారిక రెంటల్ భాగస్వామి వద్ద నుండి అద్దెకు తీసుకోవచ్చు, Baaz స్వాపింగ్ నెట్‌వర్క్ పే-యాజ్-యు-మూవ్ మోడల్‌లో ఇది పని చేస్తుంది. సూక్ష్మ వ్యాపారవేత్తలకు ఇది సాధికారత కల్పిస్తుంది. ఈ బాజ్ ఈ స్కూటర్‌లను చిన్న తరహా డీలర్‌షిప్‌లకు విక్రయించనున్నారు. (Also Read: టీవీఎస్ సరికొత్త మోటార్‌సైకిల్ TVS Raider 125 SmartXonnect)

Baaz Electric Bike ఫీచర్లు, రేంజ్

బాజ్ స్కూటర్ రోజువారీగా 100 కిమీల కంటే ఎక్కువ పరిధి వరకు వినియోగించవచ్చు. సుదీర్ఘ ప్రయాణాల సమయంలో రైడర్‌ల సౌకర్యం, భద్రత కోసం ఈ బైక్ ఎర్గోనామిక్స్‌ను కలిగి ఉంటుంది.

బాజ్ స్కూటర్ స్లో స్పీడ్ ఎలక్ట్రిక్ వాహనం. దీని గరిష్ట వేగం గంటకు 25 కి.మీ. ఈ బైక్ నడపటానికి రిజిస్ట్రేషన్ అవసరం లేదు. ఇందులో యాంటీ-వాండలిజం, యాంటీ-థెఫ్ట్, కీలెస్ స్టార్ట్, GPS-ట్రాకింగ్, బ్యాటరీ మెకానిజం వంటి ఫీచర్లు ఉన్నాయి.