Pawan Kalyan : రేపు పిఠాపురంలో పవన్ కల్యాణ్ నామినేషన్-తాడేపల్లిగూడెం, ఉంగుటూరు సభలు వాయిదా

జనసేన అధినేత పవన్ కల్యాణ్ రేపు(ఏప్రిల్ 23) పిఠాపురంలో నామినేషన్ దాఖలు చేయనున్నారు. భారీ ర్యాలీగా వెళ్లి మంగళవారం ఉదయం 9.30 గంటలకు పవన్ నామినేషన్ వేయనున్నారు. 

పవన్ కల్యాణ్ నామినేషన్ ర్యాలీలో టీడీపీ, బీజేపీ, జనసేన నేతలు పాల్గొనున్నారు. పవన్ కల్యాణ్ ర్యాలీ గొల్లప్రోలు టౌన్ ఎంట్రీ నుంచి మొదలై పాద గయ క్షేత్రం వరకు సాగనుంది. అనంతరం పిఠాపురం ఎంపీడీవో ఆఫీసులో పవన్ నామినేషన్ వేయనున్నారు. 

గత ఎన్నికల్లో భీమవరం, గాజువాక నుంచి పోటీ చేసిన పవన్ కల్యాణ్.. ఈసారి పిఠాపురం బరిలో నిలబడ్డారు. పొత్తుల్లో భాగంగా ఉమ్మడి అభ్యర్థిగా పవన్ పోటీ చేస్తున్నారు. 

 పవన్ కల్యాణ్ వారాహి విజయ భేరి ప్రచార సభలు నిర్వహిస్తున్నారు. ఇందులో భాగంగా ఆదివారం భీమవరం సభలో పాల్గొన్నారు. సోమవారం తాడేపల్లిగూడెం, ఉంగుటూరు సభల్లో పాల్గొనాల్సి ఉండగా అవి వాయిదా పడ్డాయి. 

జనసేన అధ్యక్షుడు పవన్ కల్యాణ్ తాడేపల్లిగూడెం, ఉంగుటూరు పర్యటన వాయిదా పడింది.  పవన్ కల్యాణ్ ప్రయాణించాల్సిన హెలికాప్టర్ లో సాంకేతికత సమస్య తలెత్తింది. హెలికాప్టర్ టేకాఫ్ సమయంలో ఇంజిన్ లో సమస్య తలెత్తింది. 

పిఠాపురం నియోజక వర్గం నుంచి పవన్ ...తాడేపల్లిగూడెం సభకు రావల్సి ఉండగా ఈ అవాంతరం ఏర్పడింది. ఫలితంగా తాడేపల్లిగూడెం, ఉంగుటూరు సభలు వాయిదా పడినట్లు జనసేన ప్రకటించింది.   తాడేపల్లిగూడెం, ఉంగుటూరు నియోజక వర్గాలలో సభలను మరొక రోజు నిర్వహిస్తామని జనసేన ప్రకటించింది.