Crime : 300మంది మహిళలను మోసం చేసిన ఘనుడు!
Man dupes women : పైలట్ అని చెప్పి మహిళలను మోసం చేస్తున్న ఓ వ్యక్తిని గురుగ్రామ్ పోలీసులు అరెస్ట్ చేశారు. అతడు ఇప్పటివరకు 300మందికిపైగా మహిళలను మోసం చేసి.. రూ .25లక్షలు దోచుకున్నాడు.
Man dupes women : సులభంగా డబ్బు సంపాదించడం అతడి ధ్యేయం. విమానాశ్రయాల్లో పనిచేసే మహిళలే అతడి టార్గెట్. సామాజిక మాధ్యమాలే అతడి ఆయుధాలు. ఫేక్ ఖాతాలా ద్వారా పరిచయం పెంచుకుని.. మహిళలను మోసం చేయడమే అతడి ప్లాన్. ఇలా ఇప్పటివరకు 300మంది మహిళలను మోసం చేసిన అతడు.. చివరికి గురుగ్రామ్ పోలీసులకు చిక్కాడు.
ట్రెండింగ్ వార్తలు
ఇలా ప్లాన్ చేసి.. పడేసి!
నిందితుడు హేమంత్ శర్మ.. సిక్కింలోని గ్యాంగ్టక్ వాసి. కాగా.. బెంగళూరు విమానాశ్రయంలో సిబ్బందిగా పనిచేసిన అనుభవం అతడికి ఉంది. అంతేకాకుండా.. ఓ 5స్టార్ హోటల్లో ఎగ్జిక్యూటివ్ ఆఫిసర్గానూ పనిచేశాడు. కానీ.. సులభంగా డబ్బు సంపాదించాలని భావించి.. నేరాలు చేయడం మొదలుపెట్టాడు. ఇందుకోసం మహిళలను మోసం చేస్తూ వచ్చాడు. విమానాశ్రయాలు, విమానాల్లో పనిచేసే మహిళా సిబ్బందే అతని టార్గెట్.
చాలా కాలం బెంగళూరు కేంద్రంగానే అతడి కార్యకలాపాలు సాగాయి. సామాజిక మాధ్యమాల్లో 150కిపైగా ఫేక్ ఖాతాలు తెరిచాడు. తనని తాను పైలట్గా చెప్పుకుని మహిళా సిబ్బందికి ఫ్రెండ్ రిక్వెస్ట్లు పంపించడం మొదలుపెట్టాడు.
ముందు మహిళలతో పరిచయం ఏర్పరచుకుంటాడు హేమంత్. కొంతకాలం బాగానే మాట్లాడతాడు. కానీ వాళ్లని కలవడు. రెండు, మూడు నెలలు గడిచేసరికి. వివిధ కారణాలు చెప్పి ఆ మహిళలను డబ్బులు అడుగుతాడు. క్రెడిట్ కార్డ్ పనిచేయడం లేదని, బ్యాంక్ ఖాతా బ్లాక్ అయ్యిందని చెప్పి డబ్బులు ఇవ్వమన్ని రిక్వెస్ట్ చేస్తాడు. ఎవరైనా డబ్బులు ఇస్తే.. మోసపోయినట్టే! ఆ తర్వాత వాళ్లతో ఇక టచ్లో ఉండడు. వెంటనే సిమ్ తీసి మార్చేస్తాడు.
ఇలా బెంగళూరులోనే 100కుపైగా ఫోన్లు మార్చాడు హేమంత్. 50కిపైగా సిమ్ కార్డ్లను వినియోగించాడు.
రెండేళ్ల క్రితం.. గురుగ్రామ్కు తన మకాం మార్చాడు 25ఏళ్ల హేమంత్. పైలట్ అని చెప్పి, అక్కడ కూడా మోసాలు చేయడం మొదలుపెట్టాడు. ఆ విధంగా.. ఇప్పటివరకు 300మంది మహిళలను అతను మోసం చేసి రూ. 25లక్షలు కన్నా ఎక్కువ డబ్బులను దోచుకున్నాడు.
కాగా.. గల్ఫ్ కోర్స్ రోడ్డులోని ఓ మహిళ.. హేమంత్ చేతిలో మోసపోయింది. కొన్ని రోజులకు అతడిపై పోలీసులకు ఫిర్యాదు చేసింది. అప్పుడే ఈ వ్యవహారం బయటపడింది. పోలీసులు ఒక్కో క్లూ పట్టుకుని కేసును పరిష్కరించారు. అప్పుడే.. హేమంత్ చేస్తున్న మోసాల విషయం బయటపడింది.
ఇక బుధవారం.. హేమంత్ను పోలీసులు అరెస్ట్ చేశారు. కేసు నమోదు చేసుకుని విచారణ జరిపారు. విచారణలో భాగంగా హేమంత్.. తన నేరాన్ని అంగీకరించాడు.
సంబంధిత కథనం