Virat Kohli Dance: బ్యాట్ పట్టుకొని అదిరిపోయే స్టెప్పులేసిన కోహ్లి.. వీడియో వైరల్

Virat Kohli Dance: విరాట్ కోహ్లిలో వరల్డ్ క్లాస్ బ్యాటరే కాదు.. ఓ అదిరిపోయే డ్యాన్సర్ కూడా ఉన్నాడు. ఈ విషయాన్ని అతడు గతంలోనూ నిరూపించాడు. ఇప్పుడు మరోసారి చేసి చూపించాడు. బోర్డర్ గవాస్కర్ ట్రోఫీ ముగిసిన తర్వాత వన్డే సిరీస్ కోసం ముంబై వెళ్లిన విరాట్.. అక్కడ నార్వేకు చెందిన డ్యాన్స్ గ్రూప్ క్విక్ స్టైల్ తో కలిసి స్టెప్పులేశాడు.

ఈ వీడియోను కోహ్లియే తన ఇన్‌స్టాగ్రామ్ ద్వారా షేర్ చేశాడు. స్టీరియో నేషన్ కు చెందిన ఇష్క్ అనే పాటకు విరాట్ డ్యాన్స్ చేశాడు. ఈ వీడియోలో గ్రూపులోని ఓ డ్యాన్సర్ కింద ఉన్న బ్యాట్ తీసుకొని చూస్తుంటాడు. ఆ తర్వాత సీన్ లోకి ఎంటరవుతాడు విరాట్. వైట్ టీషర్ట్, బ్లాక్ జీన్స్ లో సింపుల్ గా కనిపించిన కోహ్లి స్టెప్పులు మాత్రం ఆ గ్రూపుతో పోటీగా వేశాడు.

బ్యాట్ పట్టుకొని ఎలా బ్యాటింగ్ చేయాలో వాళ్లకు చూపిస్తూనే అతడీ డ్యాన్స్ చేయడం విశేషం. క్లిక్ స్టైల్ ను విరాట్ కలిస్తే ఇలా ఉంటుంది అనే క్యాప్షన్ తో ఈ వీడియోను షేర్ చేశారు. గంటలోనే ఈ వీడియోకు సుమారు 6 లక్షల వరకూ లైక్స్ వచ్చాయి. దీనికి ఫైర్ ఎమోజీలతో రియాక్టయింది అతని భార్య, నటి అనుష్క శర్మ. విరాట్ 76వ సెంచరీ డ్యాన్స్ ముందే లీకైంది అంటూ ఓ యూజర్ కామెంట్ చేశాడు.

ఎంతోమంది బాలీవుడ్ నటుల కంటే బాగా డ్యాన్స్ చేశావంటూ మరో యూజర్ అనడం విశేషం. అంతకుముందు ఈ డ్యాన్స్ గ్రూపు సభ్యులతోనూ విరాట్ ఓ ఫొటో దిగి దానిని ఇన్‌స్టాలో షేర్ చేశాడు. ఇండియన్ పాటలకు డ్యాన్స్ చేస్తూనే నార్వేకు చెందిన ఈ క్విక్ స్టైల్ పాపులర్ అయింది. ఇప్పుడదే ఇండియా టూర్ కు వచ్చారు ఈ గ్రూపు సభ్యులు.