FIFA World Cup Eng vs IRN: ఇరాన్‌ను చిత్తుగా ఓడించి ఇంగ్లండ్‌ బోణీ

FIFA World Cup Eng vs IRN: ఫిఫా వరల్డ్‌కప్‌లో మాజీ ఛాంపియన్‌ ఇంగ్లండ్‌ బోణీ చేసింది. ఇరాన్‌తో సోమవారం (నవంబర్ 21) జరిగిన మ్యాచ్‌లో ఏకంగా 6-2 తేడాతో ఘన విజయం సాధించింది. ఫస్ట్‌ హాఫ్‌లోనే మూడు గోల్స్‌ చేసి 3-0 లీడ్‌లోకి దూసుకెళ్లిన ఆ టీమ్‌.. సెకండాఫ్‌లో మరో మూడు గోల్స్ చేసింది. ఇరాన్‌ కూడా సెకండాఫ్‌లో రెండు గోల్స్‌తో సంతృప్తి చెందింది.

మ్యాచ్‌ 35వ నిమిషంలో ఇంగ్లండ్‌ తొలి గోల్‌ చేసింది. జూడ్‌ బెల్లింగ్‌హామ్‌ ఈ గోల్‌ చేశాడు. ఆ తర్వాత 8 నిమిషాలకే ఇంగ్లండ్‌ మరో గోల్‌ చేసింది. ఈసారి పెనాల్టీ కార్నర్‌ను బుకాయో సాకా గోల్‌గా మలిచాడు. మరో మూడు నిమిషాల వ్యవధిలోనే ఇంగ్లండ్‌ తన మూడో గోల్ చేసింది. ఈసారి కెప్టెన్‌ హ్యారీ కేన్‌ ఈ గోల్‌ చేశాడు. దీంతో సగం సమయం ముగిసే సరికి ఇంగ్లండ్‌ 3-0 లీడ్‌లోకి దూసుకెళ్లింది.

సెకండాఫ్‌లోనూ త్రీలయన్స్‌ జోరు కొనసాగింది. 64వ నిమిషంలో సాకా మరో గోల్ చేయడంతో ఇంగ్లండ్‌ 4-0 లీడ్‌లోకి దూసుకెళ్లింది. అయితే ఆ మరుసటి నిమిషంలోనే ఇరాన్ తన తొలి గోల్‌ చేసింది. మెహదీ తరేమీ ఇరాన్‌కు ఈ గోల్‌ చేసి పెట్టాడు. ఇక 71 నిమిషంలో సబ్‌స్టిట్యూట్‌గా వచ్చిన మార్కస్‌ రాష్‌ఫోర్డ్‌ ఇంగ్లండ్‌కు ఐదో గోల్‌ అందించాడు. ఇక 90వ నిమిషంలో ఇంగ్లండ్‌ తరఫున జాక్ గ్రీలిష్ మరో గోల్డ్‌ చేయడంతో ఇంగ్లండ్‌ ఆధిక్యం 6-1కి చేరింది.

ఆ తర్వాత ఇంజురీ టైమ్‌ చివరి నిమిషంలో పెనాల్టీ కిక్‌ అందుకున్న ఇరాన్‌ మరో గోల్ చేయగలిగింది. ఈసారి కూడా మెహదీ తరేమీయే ఇరాన్‌కు రెండో గోల్ అందించాడు. ఆ వెంటనే ఫైనల్‌ విజిల్‌ మోగడంతో ఇంగ్లండ్‌ 6-2తో ఘన విజయం సాధించి ఫిఫా వరల్డ్‌ కప్‌ 2022లో బోణీ చేసింది.