Warangal Police : ఆసిఫాబాద్ సమత కేసు ఛేదన..! వరంగల్ ఇంటెలిజెన్స్ డీఎస్పీకి ‘హోం మినిస్టర్‌ మెడల్’
వరంగల్ ఇంటెలిజెన్స్ డీఎస్పీ సత్యనారాయణకు అరుదైన గుర్తింపు దక్కింది. ఆసిఫాబాద్ సమత కేసు ఛేదించినందుకు కేంద్ర ప్రభుత్వం ఇచ్చే హోమ్ మినిస్టర్స్ అవార్డు వరించింది. విధి నిర్వహణలో ఉత్తమ ప్రతిభ కనబరిచిన వారికి ఈ అవార్డులను ప్రకటిస్తారు. ఈసారి తెలంగాణ నుంచి 26 మందికి దక్కాయి.
దాదాపు ఐదేళ్ల కిందట కుమ్రంభీమ్ ఆసిఫాబాద్ జిల్లాలో కలకలం రేపిన ‘సమత’ హత్యాచారం కేసును ఛేదించిన అప్పటి డీఎస్పీ సత్యనారాయణకు కేంద్ర ప్రభుత్వం హోం మినిస్టర్స్ అవార్డు ప్రకటించింది. కేసును అతి తక్కువ సమయంలో సాల్వ్ చేయడంతో పాటు దోషులకు మరణ శిక్ష పడేలా సాక్ష్యాధారాలు సమర్పించడంలో ప్రతిభ చూపినందుకు ఈ మేరకు కేంద్రం ‘యూనియన్ హోం మినిస్టర్స్ మెడల్ ఫర్ ఎక్స్ లెన్స్ ఇన్ ఇన్వెస్టిగేషన్’ అవార్డుకు ఎంపిక చేసింది.
అప్పట్లో ఆసిఫాబాద్ జిల్లాలో విధులు నిర్వర్తించిన డీఎస్పీ ఆడెపు సత్యనారాయణ.. ప్రస్తుతం వరంగల్ ఇంటెలిజెన్స్ డీఎస్పీగా పని చేస్తున్నారు. ఆయనకు కేంద్ర ప్రభుత్వం అవార్డు ప్రకటించడంతో పాటు తోటి ఆఫీసర్లు, సిబ్బంది హర్షం వ్యక్తం చేస్తున్నారు.
19 రోజుల్లోనే ఛార్జ్ షీట్
నిర్మల్ జిల్లా ఖానాపూర్ మండలం మస్తాన్ ఎల్లాపూర్ గ్రామానికి చెందిన సమత(టేకు లక్ష్మీ), గోపి దంపతులు. వీరికి ఇద్దరు కుమారులు సంతానం. ఊరూరు తిరిగి బెలూన్స్ అమ్ముతూ చిరు వ్యాపారం చేసుకునే ఈ దంపతులు.. ఆసిఫాబాద్ జిల్లా జైనూరు మండల కేంద్రంలో ఓ ఇంటిని అద్దెకు తీసుకుని ఉండేవారు. ఈ క్రమంలో 2019 నవంబర్ 24న ఎప్పటిలాగే బెలూన్స్ అమ్ముకునేందుకు ఇద్దరూ చెరో గ్రామానికి వెళ్లారు. భార్యను ఎల్లపటార్ గ్రామంలో దింపిన గోపి.. ఆయన ఖానాపూర్ వైపు వెళ్లాడు.
బెలూన్స్ అమ్ముకున్న అనంతరం లక్ష్మిని స్థానిక లింగాపూర్ జంక్షన్ వద్ద ఉండాల్సిందిగా చెప్పాడు. ఆయన పని ముగించుకుని లింగాపూర్ జంక్షన్ వెళ్లగా.. ఎంతసేపు చూసినా తన భార్య మాత్రం అక్కడికి రాలేదు. దీంతో ఆ పక్కనే ఉన్న గ్రామాల్లో వాకబు చేశాడు. అయినా ఆచూకీ లభ్యం కాకపోవడంతో చివరకు లింగాపూర్ పోలీసులకు ఫిర్యాదు చేశాడు. ఇదిలాఉంటే 25వ తేదీన ఉదయం సమీపంలోని రాములు నాయక్ తండా శివారు చెట్ల పొదల్లో ఓ మహిళ మృతదేహం రక్తపు మడుగులో ఉన్నట్టు గుర్తించిన స్థానికులు పోలీసులకు సమాచారం ఇచ్చారు. దీంతో ఘటనా స్థలానికి చేరుకున్న పోలీసులు ఆ డెడ్ బాడీ లక్ష్మీదేనని గుర్తించారు. అనంతరం జైనూరు సీఐ జువ్వాజీ సురేష్, డీఎస్పీ సత్యనారాయణ విచారణ చేపట్టి, షేక్ బాబు, షేక్ షాబొద్దీన్, షేక్ ముఖ్దూం అనే ముగ్గురు నిందితులను నవంబర్ 27వ తేదీన అదుపులోకి తీసుకున్నారు.
వారిని విచారించగా.. ఆమెను అత్యాచారం చేయడంతో పాటు గొంతు కోసి హత్య చేసినట్లు ఒప్పుకున్నారు. అనంతరం 24వ తేదీన కేసు నమోదు చేయగా.. డిసెంబర్ 13న కోర్టులో ఛార్జ్ షీట్ దాఖలు చేశారు. కేవలం 19 రోజుల్లోనే ఛార్జ్ షీట్ దాఖలు చేయడంలో డీఎస్పీ సత్యనారాయణ సఫలీకృతం కాగా, ఆ తరువాత వాదోపవాదాలు విన్న ఆదిలాబాద్ కోర్టు ముగ్గురు నిందితులకు మరణశిక్ష, మూడేళ్ల కఠిన కారాగార శిక్ష, రూ.5 వేల ఫైన్ కూడా విధించింది. తక్కువ సమయంలోనే దోషులకు శిక్ష పడేలా కేసును ఇన్వెస్టిగేషన్ చేసిన డీఎస్పీ సత్యనారాయణను కోర్టు అభినందించగా.. దోషులకు శిక్ష పడటంతో స్థానికులు కూడా సంబరాలు చేసుకున్నారు.
ప్రత్యేక అవార్డుతో గుర్తింపు
దేశంలో వివిధ రాష్ట్రాల్లో సంచలనం కలిగించిన కేసులను సాల్వ్ చేయడం, విధి నిర్వహణలో ఉత్తమ ప్రతిభ కనబరిచిన పోలీస్ ఆఫీసర్లకు కేంద్ర ప్రభుత్వం హోం మినిస్టర్స్ అవార్డ్స్ ను గురువారం ప్రకటించింది. ఇందులో తెలంగాణకు చెందిన దాదాపు 26 మందికి అవార్డులు దక్కాయి. ఇన్వెస్టిగేషన్ ఫీల్డ్ విభాగంలో మొత్తంగా నలుగురు ఆఫీసర్లకు యూనియన్ హోం మినిస్టర్స్ మెడల్ ఫర్ ఎక్స్ లెన్స్ ఇన్ ఇన్వెస్టిగేషన్ అవార్డు దక్కగా.. అందులో వరంగల్ ఇంటెలిజెన్స్ డీఎస్పీ సత్యనారాయణ ఒకరు కావడం గమనార్హం. ఇక స్పెషల్ ఆపరేషన్స్ ఫీల్డ్ విభాగంలో తెలంగాణకు చెందిన మరో 22 మందికి యూనియన్ హోం మినిస్టర్స్ అవార్డ్స్ ప్రకటించడం విశేషం.
