TGSRTC Drivers Posts : టీజీఎస్ఆర్టీసీలో 1201 డ్రైవర్ పోస్టులు-మాజీ సైనికుల నుంచి దరఖాస్తులు ఆహ్వానం

తెలంగాణ సైనిక సంక్షేమశాఖ...టీజీఎస్ఆర్టీసీలో డ్రైవర్ పోస్టులకు మాజీ సైనికుల నుంచి దరఖాస్తులు ఆహ్వానించింది. కాంట్రాక్ట్ ప్రాతిపదికన రాష్ట్రంలోని 1201 డ్రైవర్ పోస్టులకు సైనిక సంక్షేమ శాఖ నోటిఫికేషన్ జారీ చేసింది. ఎంపికైనా వారికి నెలకు రూ.26 వేల వేతనం, రోజు వారి అలవెన్స్ రూ.150 చెల్లిస్తారు.

అర్హతలు

మాజీ సైనికుల్లో హెవీ డ్యూటీ లైసెన్స్ కలిగి, 18 నెలల డ్రైవింగ్ అనుభవం ఉన్న వారు దరఖాస్తులకు అర్హులు. వయస్సు 58 కంటే తక్కువ ఉండాలి. ఎత్తు 160 సెం.మీ కంటే తక్కువ ఉండకూడదు. ఆసక్తి గల మాజీ సైనికులు దరఖాస్తును నింపి నవంబర్ 30వ తేదీ లోపు porsb-ts@nic.in & emprsb-ts@nic.in మెయిల్ చేయాలని డైరెక్టర్ సైనిక్ వెల్ఫేర్ ప్లేస్‌మెంట్ ఆఫీసర్ తెలిపారు. వీలైనంతవరకు అభ్యర్థులు కోరుకున్న డిపోలో ఉద్యోగం ఇవ్వటానికి ప్రయత్నం చేయనున్నట్లు తెలిపారు.

తెలంగాణ హైకోర్టులో లా క్లర్క్ ఉద్యోగాలు

తెలంగాణ హైకోర్టులో లా క్లర్క్ ల భర్తీకి దరఖాస్తులను స్వీకరిస్తున్నారు. ఈ గడువు ఇవాళ్టితో(నవంబర్ 23) పూర్తి కానుంది. మొత్తం 33 పోస్టులను ఒప్పంద ప్రాతిపదికన భర్తీ చేయనున్నారు. క్లర్క్ పోస్టులకు 3 లేదా 5 సంవత్సరాల లా డిగ్రీని కలిగిన అభ్యర్థులు అర్హులవుతారు.

తెలంగాణహైకోర్టులో పనిచేసేందుకు 31 లా క్లర్క్‌లు, సికింద్రాబాద్ లోని స్టేట్ జ్యుడీషియల్ అకాడమీలో పనిచేసేందుకు 2 లా క్లర్క్‌ల పోస్టులు భర్తీ చేసేందుకు దరఖాస్తులను స్వీకరిస్తున్నారు. ఈ పోస్టులను కాంట్రాక్ట్ ప్రాతిపదికన ఒక సంవత్సరం వ్యవధికి భర్తీ చేస్తారు.

లా క్లర్క్ పోస్టులు - ముఖ్య వివరాలు

• దరఖాస్తుదారుడు తప్పనిసరిగా భారత పౌరుడై ఉండాలి.
• అభ్యర్థికి జులై 1 నాటికి 30 సంవత్సరాల వయస్సు మించకూడదు. ఓబీసీలకు మూడేళ్లు, ఎస్సీ, ఎస్టీలు ఐదేళ్లు, దివ్యాంగులకు పదేళ్ల వయోపరిమితి సడలింపు ఉంటుంది.
• దరఖాస్తు దారుడు గుర్తింపు పొందిన విశ్వవిద్యాలయం నుంచి న్యాయశాస్త్రంలో డిగ్రీని పొంది ఉండాలి. 10+2 పూర్తి చేసిన తర్వాత 5 ఏళ్లు రెగ్యులర్ లా అభ్యసించాలి. లేదా 10+2 పాఠశాల విద్య తర్వాత మూడేళ్ల డిగ్రీ కోర్సు, ఆ తర్వాత 3 సంవత్సరాల రెగ్యులర్ లా డిగ్రీ పూర్తిచేయాలి.
• లా క్లర్క్ నోటిఫికేషన్ విడుదల తేదీకి రెండేళ్ల ముందుగా అభ్యర్థి న్యాయశాస్త్రంలో ఉత్తీర్ణులై ఉండాలి.
• అభ్యర్థి ఏ ఇతర అధ్యయన కోర్సు లేదా ఏదైనా ఇతర వృత్తి కొనసాగించకూడదు.
• లా క్లర్క్ గా విధులు నిర్వహించే సమయంలో తమ చదువు, ఇతర వృత్తులకు దూరంగా ఉండాలి.
• అభ్యర్థులు రిట్రీవల్‌తో సహా కంప్యూటర్ పరిజ్ఞానం కలిగి ఉండాలి. మనుపత్ర, ఎస్సీసీ ఆన్‌లైన్, లెక్సిస్‌నెక్సిస్, వెస్ట్‌లాపై అవగాహన కలిగి ఉండాలి.
• దరఖాస్తుకు సంబంధించిన ప్రోఫార్మా అధికారిక వెబ్‌సైట్‌ https://tshc.gov.in/ లో ఉంచారు.
• ఆఫ్ లైన్ లో దరఖాస్తులను స్వీకరిస్తారు.
• పూర్తి చేసిన దరఖాస్తులను "ది రిజిస్ట్రార్ జనరల్, తెలంగాణ హైకోర్టు, హైదరాబాద్" చిరునామాకు పంపించాలి. వయస్సు, వర్గం, విద్యార్హత రుజువుకు సంబంధిత పత్రాల కాపీలు జోడించాలి.