'ఎల్ఆర్ఎస్' గడువు దగ్గరపడింది..! ఈలోపు ఫీజు చెల్లిస్తేనే 'రాయితీ' వర్తింపు

తెలంగాణ ప్రభుత్వం అనధికార లేఅవుట్లకు రెగ్యులరైజేషన్ కు ఎల్ఆర్ఎస్ అమలు చేస్తున్న సంగతి తెలిసిందే. ప్రస్తుతం రాయితీతో ఫీజు చెల్లించే అవకాశం కల్పించింది. మార్చి 31వ తేదీతోనే గడవు ముగియగా… ఏప్రిల్ 30వ తేదీ వరకు పొడిగించింది. అయితే ఈ గడువు కూడా దగ్గరపడింది. మరో మూడు రోజుల్లో ఈ అవకాశం ముగియనున్న నేపథ్యంలో… దరఖాస్తుదారులు వెంటనే ఫీజులు చెల్లించుకోవాలని అధికారులు సూచిస్తున్నారు.

25 శాతం రాయితీ…

ఏప్రిల్ 30 లోగా ఫీజు చెల్లించిన వారికి 25 శాతం రాయితీ అవకాశం ఉంటుంది. ఈ గడువు ముగిసిన తర్వాత అలాంటి అవకాశం ఉండదు. ప్రభుత్వం నిర్ణయించిన ఫీజును చెల్లించాల్సి ఉంటుంది. ఇప్పటికే ఓసారి గడువు పొడిగించగా.. మరోసారి పెంచే అవకాశం లేదని అధికారిక వర్గాలు చెబుతున్నాయి. ఇటీవలే రెవెన్యూ శాఖ మంత్రి పొంగులేటి శ్రీనివాస్ రెడ్డి కూడా ఇదే విషయాన్ని చెప్పారు. ఎల్ఆర్ఎస్ దరఖాస్తులు ఏప్రిల్ 30 లోపు ఫీజు చెల్లించుకోవాలని… మరోసారి గడువు పెంచే అవకాశం లేదని క్లారిటీ ఇచ్చారు.

లే అవుట్ల రెగ్యులరేషన్ పథకం ద్వారా రాష్ట్ర ప్రభుత్వానికి సుమారుగా రూ.వెయ్యి కోట్ల పైగా ఆదాయం సమకూరింది. ఈ పథకం ద్వారా అనధికార లే అవుట్లను క్రమబద్ధీకరించనున్నారు. ఇప్పటికే పరిశీలించిన దరఖాస్తులను క్లియర్ చేశారు. అర్హత ఉన్న వారికి ప్రోసిడింగ్స్ కాపీలను కూడా అందజేశారు.ఎల్ 1, ఎల్2, ఎల్ 3 దశల్లో పరిశీలన పూర్తి అయిన వాటికి మాత్రమే ప్రోసిడింగ్ కాపీలను ఇస్తున్నట్లు అధికారులు చెబుతున్నారు.

పురపాలక శాఖ జారీ చేసిన జీవో 28 ప్రకారం ఏప్రిల్ 30 లోగా ఎల్‌ఆర్‌ఎస్‌ ఫీజు, ఓపెన్‌ స్పేస్‌ ఛార్జీలు చెల్లిస్తే 25 శాతం రాయితీ పొందవచ్చు. 26 ఆగస్టు 2020కు ముందు అక్రమ లేఅవుట్లను ఎల్ఆర్ఎస్ కింద క్రమబద్ధీకరిస్తారు. లేఅవుట్‌లోని ప్లాట్లలో కనీసం 10 శాతం ఇప్పటికే విక్రయించాలి. ఇప్పటికే రూ.1000 చెల్లించి దరఖాస్తు చేసుకున్నవారు అర్హులు.

LRS ఫీజు చెల్లింపు ప్రాసెస్:

1. ఎల్ఆర్ఎస్ కోసం దరఖాస్తు చేసుకున్న వాళ్ల ఎల్ఆర్ఎస్ తెలంగాణ వెబ్ సైట్ లోకి వెళ్లాలి.
2. ఈ వెబ్ సైట్ లోకి వెళ్లగానే ఆఫీసియల్ లాగిన్, సిటిజన్ లాగిన్ కనిపిస్తుంది. ఇందులో మీరు సిటిజన్ లాగిన్ పై నొక్కాలి.
3. ఇక్కడ మీరు దరఖాస్తు చేసుకున్న సమయంలో ఇచ్చిన మొబైల్ నెంబర్ ను నమోదు చేయాలి. మీకు ఓటీపీ వస్తుంది.ఆ నెంబరును ఎంట్రీ చేయాలి.
4. వెరిఫైయిడ్ ఓటీపీపై క్లిక్ చేస్తే మీకు మరో పేజీ ఓపెన్ అవుతుంది.
5. ఇక్కడ హోం పేజీలో LRS Plot Fee Payment, LRS Layout Fee Payment ఆప్షన్లు ఉంటాయి. మీరు దేనికైతే దరఖాస్తు చేశారో అందుకు అనుగుణంగా... ఆప్షన్ పై క్లిక్ చేస్తే మీ అప్లికేషన్ వివరాలు కనిపిస్తాయి.
6. దీంట్లోనే చివర్లో ఫీజు వివరాల ఆప్షన్ ఉంటుంది. దీనిపై క్లిక్ చేస్తే పీడీఎఫ్ ఓపెన్ అవుతుంది. ఇందులో రెగ్యులరైజేషన్ ఛార్జీలు, ఓపెన్ స్పెస్ ఛార్జీల వివరాలు కనిపిస్తాయి.
7. పీడీఎఫ్ పక్కనే Fee Payment అనే ఆప్షన్ కూడా ఉంది. దీనిపై క్లిక్ చేసి మీ క్రమబద్ధీకరణ ఛార్జీలను చెల్లించవచ్చు. క్యూఆర్ కోడ్ స్కాన్ చేయటమే కాకుండా... ఇతర మార్గాల ద్వారా ఈ ప్రాసెస్ పూర్తి చేయవచ్చు.
8. పేమెంట్ ప్రాసెస్ పూర్తి కాగానే మీ చెల్లింపులకు సంబంధించి మరో డాక్యుమెంట్ జనరేట్ అవుతుంది. దీన్ని ప్రింట్ లేదా డౌన్లోడ్ ఆప్షన్ ద్వారా పొందవచ్చు.
9. పేమెంట్ వివరాలను జాగ్రత్తగా ఉంచుకోవటం మంచింది. ఇతర అవసరాలకు ఉపయోగపడుతుంది.

ఇక దరఖాస్తుదారులు తమ దరఖాస్తు వివరాలు మర్చిపోతే...దరఖాస్తు వివరాలు తిరిగి పొందడానికి 'యూనివర్సల్ సెర్చ్' ఫీచర్‌ను అందుబాటులోకి తీసుకువచ్చింది. ఈ ఆప్షన్ తో దరఖాస్తు రసీదులను తప్పుగా ఉంచిన లేదా రిజిస్టర్డ్ మొబైల్ నంబర్‌లను మార్పు వంటి సమస్యలను పరిష్కరించుకోవచ్చు. యూనివర్సల్ సెర్చ్ ఆప్షన్ ద్వారా నిర్దిష్ట వివరాలను నమోదు చేసి అప్లికేషన్ నంబర్, ఇతర సంబంధిత సమాచారం వివరాలను తెలుసుకోవచ్చు.