కాళేశ్వరంపై ప్రభుత్వం కీలక నిర్ణయం.. మేడిగడ్డ , అన్నారం, సుందిళ్ల బ్యారేజీల పునరుద్ధరణకు చర్యలు!
కాళేశ్వరం బ్యారేజీలపై ప్రభుత్వం కీలక నిర్ణయం తీసుకుంది. మేడిగడ్డ , అన్నారం, సుందిళ్ల బ్యారేజీల పునరుద్ధరణకు చర్యలు మెుదలుపెట్టింది.
కాళేశ్వరం లిఫ్ట్ ఇరిగేషన్ ప్రాజెక్ట్లోని మేడిగడ్డ , అన్నారం, సుందిళ్ల బ్యారేజీల పునరుద్ధరణ కోసం తెలంగాణ ప్రభుత్వం చర్యలు తీసుకుంటోంది. డిజైన్లు, డ్రాయింగ్ల పునరుద్ధరణ కోసం తెలంగాణ ప్రభుత్వం ఆసక్తి వ్యక్తీకరణ (Expression Of Interesting)ని ఆహ్వానించింది.
నేషనల్ డ్యాం సేఫ్టీ అథారిటీ( NDSA ) ఆదేశాల మేరకు నిర్వహించిన దర్యాప్తుల ఆధారంగా మూడు బ్యారేజీల పునరావాసం, పునరుద్ధరణ డిజైన్ల కోసం ప్రసిద్ధ డిజైన్ ఏజెన్సీల ఎంప్యానెల్మెంట్ కోసం నీటిపారుదల, కమాండ్ ఏరియా అభివృద్ధి విభాగం ఈవోఐ(Expression Of Interesting)ని ఆహ్వానించింది .
అక్టోబర్ 15 లోపు ఈవోఐ కోసం ప్రతిపాదనను సమర్పించాలని సెంట్రల్ డిజైన్స్ ఆర్గనైజేషన్ చీఫ్ ఇంజనీర్ ఒక నోటిఫికేషన్లో తెలిపారు. 2023 అక్టోబర్లో మేడిగడ్డ బ్యారేజీలో ఏడో బ్లాక్ కుంగింది. సుందిళ్ల, అన్నారం బ్యారేజీల్లోనూ సీపేజీలు బయటపడ్డాయి. తర్వాత ప్రాజెక్టుపై సమగ్ర దర్యాప్తు నిర్వహించిన నేషనల్ డ్యాం సేఫ్టీ అథారిటీ కమిటీ, 2025 ఏప్రిల్లో తన తుది నివేదికలో మూడు బ్యారేజీలకు పునరావాస డిజైన్ను సిద్ధం చేయాలని సిఫార్సు చేసింది.
'వివిధ పరిశోధనలు, అధ్యయనాల నుండి తీసుకున్న అంచనాల ఆధారంగా, తగిన పునరావాస ప్రణాళికను రూపొందించి అమలు చేయాలి. నీటిపారుదల శాఖ ఈ పనుల కోసం ప్రసిద్ధ సంస్థలు, విభాగాలను నియమించుకోవాలని కమిటీ సిఫార్సు చేస్తుంది. డిజైన్ సంక్లిష్టతలను దృష్టిలో ఉంచుకుని, పునరావాస రూపకల్పనను కేంద్ర జల సంఘం సమీక్షించడం మంచిది.' అని నివేదిక పేర్కొంది.
గత నెలలో నీటిపారుదల మంత్రి ఉత్తమ్ కుమార్ రెడ్డి బ్యారేజీలకు అవసరమైన మరమ్మతుల కోసం డిజైన్ కన్సల్టెంట్లను గుర్తించి ఎంపిక చేయాలని శాఖ అధికారులను ఆదేశించారు. నేషనల్ డ్యాం సేఫ్టీ అథారిటీ నివేదిక బీఆర్ఎస్ ప్రభుత్వం వైఖరికి నిదర్శనం అని, దాని డిజైన్, నిర్మాణం, నిర్వహణలో తీవ్రమైన లోపాలను బయటపెట్టిందని మంత్రి పేర్కొన్నారు.
మరోవైపు కాళేశ్వరం ప్రాజెక్టులో జరిగిన అవకతవకలపై దర్యాప్తు చేసిన పీసీ ఘోష్ కమిషన్ జూలై 31, 2025న రాష్ట్ర ప్రభుత్వానికి తన నివేదికను సమర్పించిన విషయం తెలిసిందే. బీఆర్ఎస్ ప్రభుత్వ హయాంలో నిర్మించిన కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల ప్రణాళిక, డిజైన్, నిర్మాణం, నాణ్యత నియంత్రణ, నిర్వహణలో జరిగిన అవకతవకలను విచారించడానికి సుప్రీంకోర్టు మాజీ న్యాయమూర్తి నేతృత్వంలోని కమిషన్ మార్చి 14, 2024న ఏర్పాటైంది.
ఆగస్టు 31న అసెంబ్లీలో ఈ నివేదికపై సుదీర్ఘ చర్చ జరిగిన తర్వాత, ముఖ్యమంత్రి రేవంత్ రెడ్డి ప్రాజెక్టులో జరిగిన అవకతవకలకు సంబంధించిన కేసును కేంద్ర దర్యాప్తు సంస్థకు అప్పగిస్తున్నట్లు ప్రకటించారు.
