Pushpa 2 Stampede : పుష్ప2 తొక్కిసలాట ఘటన, సంధ్య థియేటర్ ఓనర్ సహా ముగ్గురి అరెస్ట్

పుష్ప2 బెనిఫిట్ షో సందర్భంగా హైదరాబాద్ లోని సంధ్య థియేటర్ వద్ద తొక్కిసలాట జరిగిన విషయం తెలిసిందే. ఈ ఘటనపై చిక్కడపల్లి పోలీసులు కేసు నమోదు చేశారు. ఈ కేసులో ముగ్గురిని పోలీసులు అరెస్ట్ చేశారు. ఆర్టీసీ క్రాస్ రోడ్స్ లోని సంధ్య థియేటర్ యజమానితో పాటు, మేనేజర్, సెక్యూరిటీ మేనేజర్ ను పోలీసులు అరెస్టు చేసి రిమాండ్ కు తరలించారు. ఆర్టీసీ క్రాస్‌ రోడ్స్‌లోని సంధ్య థియేటర్ వద్ద ఈ నెల 4న పుష్ప2 సినిమా బెనిఫిట్ షో సమయంలో తొక్కిసలాట జరిగింది. ఈ తొక్కిసలాటలో రేవతి అనే మహిళ మృతి చెందగా....ఓ బాలుడు తీవ్రంగా గాయపడ్డాడు. రేవతి కుటుంబ సభ్యుల ఫిర్యాదుతో హీరో అల్లు అర్జున్‌తో పాటు సంధ్య థియేటర్ యాజమాన్యంపై వివిధ సెక్షన్ల కింద పోలీసులు కేసు నమోదు చేశారు. ఈ కేసులో తాజాగా ముగ్గురిని అరెస్ట్ చేశారు.

పుష్ప 2 సినిమా చూసేందుకు తన టీమ్ తో కలిసి సంధ్య థియేటర్‌కు వచ్చిన నటుడు అల్లు అర్జున్ పోలీసులకు ఎలాంటి ముందస్తు సమాచారం అందించలేదని సెంట్రల్ జోన్ డీసీపీ ఆకాన్ష్ యాదవ్ తెలిపారు. థియేటర్ యాజమాన్యం ప్రేక్షకులను కంట్రోల్ చేసేందుకు తగిన భద్రత ఏర్పాట్లు చేయలేదన్నారు. హీరో అల్లు అర్జున్ వచ్చారని తెలుసుకుని లోయర్ బాల్కనీలోకి పెద్ద సంఖ్యలో ఫ్యాన్స్ రావడంతో తొక్కిసలాట జరిగి మహిళ మరణించిందని డీసీపీ ఆకాన్ష్ యాదవ్ అన్నారు.

తొక్కిసలాట ఘటనతో హీరో అల్లు అర్జున్, అతని ప్రైవేట్ సెక్యూరిటీ టీమ్, సంధ్య థియేటర్ యాజమాన్యంపై పోలీసులు కేసు నమోదు చేశారు. ఈ తొక్కిసలాటలో రేవతి(32) అనే మహిళ మృతి చెందగా, ఆమె కుమారుడు సాయి తేజ ఓ ప్రైవేట్ ఆసుపత్రిలో ప్రాణాలతో పోరాడుతున్నాడు. రేవతి భర్త భాస్కర్, ఇద్దరు పిల్లలు సాయి తేజ, సాంగ్వికతో కలిసి సంధ్య థియేటర్‌కి వెళ్లింది. అల్లు అర్జున్ థియేటర్ వద్దకు రాగానే తొక్కిసలాట జరిగి రేవతి, సాయి తేజ జనంలో చిక్కుకున్నారు. ఊపిరాడక రేవతి మృతి చెందారు. సాయి తేజను పోలీసులు జనాల నుంచి బయటకు తీసుకొచ్చి సీపీఆర్ చేశారు. అనంతరం ప్రైవేట్ ఆసుపత్రికి తరలించి చికిత్స అందిస్తున్నారు. బాలుడి పరిస్థితి విషమంగా ఉందని సమాచారం. ఈ ఘటనపై చిక్కడపల్లి పోలీసులు BNS సెక్షన్ 105, 118 (1) కింద కేసు నమోదు చేశారు.

పుష్ప 2 ప్రీమియర్ షో సమయంలో అభిమాని మరణంపై అల్లు అర్జున్ ఇటీవల ఓ వీడియో రిలీజ్ చేసిన విషయం తెలిసిందే. తనకు చాలా బాధగా ఉందంటూ.. రూ.25 లక్షల ఆర్థిక సాయం కూడా ప్రకటించారు. అనంతరం మరో సందర్భంలో అల్లు అర్జున్ ఈ ఘటనపై సారీ చెప్పారు.

డిసెంబర్ 5న ప్రపంచ వ్యాప్తంగా రిలీజైన పుష్ప2 మంచి టాక్ తో దూసుకుపోతున్న విషయం తెలిసిందే. డిసెంబర్ 4న ప్రీమియర్ షోలు వేశారు. ఈ మూవీ ఇప్పటికే రూ.500 కోట్లకు పైగా వసూళ్లు సాధించింది. ఇప్పటికే బాహుబలి, ఆర్ఆర్ఆర్ రికార్డులను పుష్పరాజ్ బీట్ చేశాడు.