ఎంఎంటీఎస్‌లో అత్యాచార ఘటన.. ఊహించని ట్విస్ట్ ఇచ్చిన యువతి.. అసలు కథ ఇదీ!
హైదరాబాద్ ఎంఎంటీఎస్‌లో అత్యాచార ఘటనపై పోలీసులు క్లారిటీ ఇచ్చారు. అత్యాచారమే జరగలేదని కేస్ క్లోజ్ చేసే యోచనలో ఉన్నారు. ఇన్‌స్టా రీల్స్‌ చేస్తూ రైలు నుంచి యువతి జారిపడిందని స్పష్టం చేశారు. దాన్ని కప్పిపుచ్చేందుకు అత్యాచారం కట్టుకథ అల్లినట్టు రైల్వే పోలీసులు వెల్లడించారు. పూర్తి వివరాలు ఇలా ఉన్నాయి.
హైదరాబాద్‌లో ఎంఎంటీఎస్‌ రైల్లో యువతిపై అత్యాచారయత్నం కేసులో ఊహించని ట్విస్ట్ వెలుగులోకి వచ్చింది. యువతి పోలీసులను తప్పుదోవ పట్టించింది. ఈ విషయాన్ని స్వయంగా రైల్వే ఎస్పీ చందనా దీప్తి వెల్లడించారు. సదరు యువతి సెల్‌ఫోన్‌తో ఇన్‌స్టాగ్రామ్‌ రీల్స్‌ చేస్తుండగా.. ప్రమాదవశాత్తు జారిపడినట్లు ఎస్పీ వివరించారు.
కట్టుకథ చెప్పి..
ఈ ఘటనపై పోలీసులకు కట్టుకథ చెప్పి.. తనపై అత్యాచారం జరిగినట్లు ఆ యువతి పోలీసులను నమ్మించినట్లు చందనా దీప్తి నిర్ధారించారు. దర్యాప్తులో భాగంగా సుమారు 300కుపైగా సీసీ కెమెరాలను రైల్వే పోలీసులు పరిశీలించారు. దాదాపు 120 మంది అనుమానితులను ప్రశ్నించారు. ఆ తర్వాత యువతిపై అత్యాచారం జరగలేదని తేల్చారు. న్యాయపరమైన అంశాలను పరిశీలించి.. కేసును మూసివేసే యోచనలో రైల్వే పోలీసులు ఉన్నట్టు తెలుస్తోంది.
కోలుకున్న యువతి..
మేడ్చల్‌ జిల్లాలోని ఓ ప్రైవేటు సంస్థలో ఉద్యోగం చేస్తున్న అనంతపురం జిల్లాకు చెందిన యువతిపై.. ఓ యువకుడు ఎంఎంటీఎస్‌ రైల్లో అత్యాచారానికి పాల్పడినట్లు వార్తలు వచ్చాయి. కొంపల్లి సమీప ప్రాంతంలోని రైలు బ్రిడ్జి వద్ద కిందపడి గాయపడిన ఆమెను తొలుత గాంధీ ఆసుపత్రికి, ఆ తర్వాత ఓ ప్రైవేటు ఆస్పత్రికి తరలించి చికిత్స అందించారు. ప్రస్తుతం ఆమె పూర్తిగా కోలుకున్నట్లు తెలుస్తోంది.
అసలు విషయం ఒప్పుకుంది..
ఈ ఘటన దేశవ్యాప్తంగా చర్చనీయాంశంగా మారింది. దీనిపై ప్రభుత్వం సీరియస్ అయ్యింది. రైల్వే పోలీసులు ఈ ఘటనను తీవ్రంగా పరిగణించి ముమ్మరంగా దర్యాప్తు చేశారు. ఎంతకూ యువతి చెప్పిన విషయాలకు సరైన ఆధారాలు లభించలేదు. దీంతో పోలీసులకు యువతిపై అనుమానం వచ్చింది. ఆమెను విచారించగా.. అసలు విషయం ఒప్పుకుంది. ఆ యువతి తీరుపై సర్వత్రా విమర్శలు వ్యక్తమవుతున్నాయి.
సంబంధిత కథనం