“ఆపరేషన్ బ్లాక్‌ ఫారెస్ట్” కర్రెగుట్టల్లో మావోయిస్టులకు భారీ నష్టం.. 21రోజుల్లో లెక్క తేలని స్థాయిలో ప్రాణనష్టం

ఛత్తీస్ గఢ్ -తెలంగాణ సరిహద్దుల్లోని కర్రెగుట్టల్లో 21 రోజులుగా జరుగుతున్న ఆపరేషన్‌లో 31మంది మావోయిస్టులు మృతి చెందారు. మార్చి నాటికి మావోయిస్టులను పూర్తిగా నిర్మూలించేందుకు చేపట్టిన అతిపెద్ద ఆపరేషన్ లో 31 మంది ఉగ్రవాదులను హతమార్చినట్టు భద్రతా దళాలు బుధవారం ప్రకటించాయి.

నక్సల్స్ రహిత భారత్ సంకల్పంలో భాగంగా చారిత్రాత్మక విజయం సాధించినట్టు సీఆర్‌పిఎఫ్‌ బుధవారం ప్రకటించింది. ఛత్తీస్ గఢ్ -తెలంగాణ సరిహద్దులోని కర్రెగుట్టలపై మావోయిస్టులకు వ్యతిరేకంగా జరిగిన 21 రోజుల ఆపరేషన్‌లో భద్రతా దళాలు 31 మంది మావోయిస్టులను హతమార్చాయి.

కర్రెగుట్టల్లో 350మంది మావోయిస్టులు ఆశ్రయం పొందుతుండగా వారిలో చాలామంది తీవ్రంగా గాయపడటమో, మరణించడమో జరిగిందని భావిస్తున్నారు. భౌగోళిక సంక్లిష్టతలతో మృతదేహాలను బయటకు తీసుకు రాలేకపోయినట్టు ప్రకటించారు.

24వేల మందితో భారీ ఆపరేషన్‌

ఆపరేష బ్లాక్‌ఫారెస్ట్‌లో మొత్తం 214 నక్సల్స్ రహస్య స్థావరాలు, బంకర్లను ధ్వంసం చేశామని, మొత్తం 450 ఐఈడీలు, 818 బీజీఎల్ షెల్స్, 899 కట్టల కోడెక్స్, డిటోనేటర్లు, భారీ మొత్తంలో పేలుడు పదార్థాలను స్వాధీనం చేసుకున్నామని సీఆర్‌పిఎఫ్‌ డీజీ తెలిపారు. దాదాపు 12 వేల కిలోల ఆహార పదార్థాలను స్వాధీనం చేసుకున్నారు.

ఈ ఆపరేషన్ లో భాగంగా బీజీఎల్ షెల్స్, హోం మేడ్ వెపన్స్, ఐఈడీలు, ఇతర మారణాయుధాల తయారీకి ఉపయోగించే నాలుగు నక్సల్ టెక్నికల్ యూనిట్లను భద్రతా దళాలు ధ్వంసం చేశాయి.

మావోయిస్టులకు వ్యతిరేకంగా చేపట్టిన ఆపరేషన్లో భాగంగా నక్సల్స్ స్థావరాలు, బంకర్ల నుంచి పెద్ద ఎత్తున రేషన్ సరుకులు, మందులు, నిత్యావసర వస్తువులను స్వాధీనం చేసుకున్నారు.

కర్రెగుట్టల్లో జరిగిన ఆపరేషన్‌లో కమాండో బెటాలియన్ ఫర్ రెసల్యూట్ యాక్షన్ (కోబ్రా), స్పెషల్ టాస్క్ ఫోర్స్ (ఎస్టీఎఫ్), డిస్ట్రిక్ట్ రిజర్వ్ గార్డ్స్ (డీఆర్జీ)లకు చెందిన మొత్తం 18 మంది సిబ్బంది ఐఈడీ పేలుళ్లలో గాయపడ్డారు. క్షతగాత్రులంతా ప్రాణాపాయం నుంచి బయటపడి వివిధ ఆస్పత్రుల్లో మెరుగైన చికిత్స పొందుతున్నారు.

హోంమంత్రి ట్వీట్‌…

ఒకప్పుడు మావోయిస్టులు రాజ్యమేలిన కర్రెగుట్టలపై ఇప్పుడు సగర్వంగా త్రివర్ణ పతాకాన్ని ఎగురుతోందని కేంద్ర హోం మంత్రి అమిత్ షా ట్వీట్ చేశారు. కర్రెగుట్టలపై పిఎల్జిఏ బెటాలియన్ 1, డికెఎస్జెడ్సి, టిఎస్సి, సీఆర్సీ వంటి ప్రధాన నక్సల్ సంస్థల ఏకీకృత ప్రధాన కార్యాలయంతో పాటు నక్సల్ శిక్షణ, ఆయుధాల తయారీ జరిగేది.

ప్రభుత్వ భద్రతా దళాలు 21 రోజుల్లో అతిపెద్ద నక్సల్స్ వ్యతిరేక ఆపరేషన్ ను పూర్తి చేశాయని, ఈ ఆపరేషన్ లో భద్రతా దళాలకు ఎటువంటి ప్రాణనష్టం జరగకపోవడం చాలా సంతోషకరమైన విషయమని అమిత్ షా పేర్కొన్నారు.

ప్రతికూల వాతావరణం, కఠినమైన కొండ ప్రాంతంలో నక్సలైట్లను ధైర్యంగా ఎదుర్కొన్న సీఆర్పీఎఫ్, ఎస్టీఎఫ్, డీఆర్జీ సిబ్బందిని హోంమంత్రి అమిత్ షా అభినందించారు.

ప్రధాని నరేంద్ర మోడీ నాయకత్వంలో నక్సలిజాన్ని మూలాల నుంచి నిర్మూలించడానికి కృతనిశ్చయంతో ఉన్నామని అమిత్ షా పేర్కొన్నారు. 2026 మార్చి 31 నాటికి భారత్ నక్సల్స్ రహితంగా మారుతుందని చెప్పారు.

బీజాపూర్‌లో, సెంట్రల్ రిజర్వ్ పోలీస్ ఫోర్స్ (సిఆర్పిఎఫ్) డైరెక్టర్ జనరల్ జ్ఞానేంద్ర ప్రతాప్ సింగ్, ఛత్తీస్‌గడ్‌ డీజీపీ అరుణ్ దేవ్ గౌతమ్ ఆపరేషన్‌లో దళాలకు నేతృత్వం వహించిన సీనియర్ అధికారులతో కలిసి సంయుక్త మీడియా సమావేశంలో ఈ ఆపరేషన్ గురించి వివరించారు.

వచ్చే మార్చికి మావోయిస్టుల ఏరివేత లక్ష్యం..

కర్రెగుట్టల్లో 31మంది నక్సలైట్ల మృత దేహాలను స్వాధీనం చేసుకున్నట్టు ప్రకటించారు. కర్రెగుట్టలు 1200 చదరపు కిలోమీటర్ల వైశాల్యం ఉన్నాయని 31 మంది నక్సలైట్లను మట్టుబెట్టగా, వారిలో 28 మందిని గుర్తించినట్టు తెలిపారు.

ఆపరేషన్ బ్లాక్ ఫారెస్ట్ పేరుతో చేపట్టిన ఈ ఆపరేషన్ లో కోబ్రా, సీఆర్పీఎఫ్, ఛత్తీస్ గఢ్ పోలీసుల బృందాలు పాల్గొన్నాయి. ఇంత భారీ రికవరీ ఇంతకు ముందెన్నడూ ఈ తరహా ఆపరేషన్ లోనూ జరగలేదని ఇది సీఆర్‌పిఎఫ్‌కు పెద్ద విజయమని సీఆర్పీఎఫ్ డీజీ తెలిపారు.

చనిపోయిన వారిలో ఇప్పటి వరకు 28 మంది నక్సలైట్లను గుర్తించామని, వారిపై కోటి 72 లక్షల రూపాయల రివార్డు ఉందని డీజీ తెలిపారు. ఏప్రిల్ 21, 2025 నుండి మే 11 వరకు జరిగిన యాంటీ నక్సల్ ఆపరేషన్‌లో మావోయిస్టులకు కోలుకోలేని నష్టం వాటిల్లింది. ఎన్కౌంటర్ ప్రదేశం నుండి స్వాధీనం చేసుకున్న మృతదేహాలు నిషేధిత పిఎల్జిఎ బెటాలియన్, సిఆర్సి కంపెనీలతో పాటు తెలంగాణ రాష్ట్ర కమిటీకి చెందిన వారివిగా గుర్తించారు.

నక్సలైట్లకు కంచుకోటలాంటి ప్రాంతాలు..

నక్సలైట్లకు కంచుకోటలుగా ఉన్న సుక్మా, బీజాపూర్ సరిహద్దు ప్రాంతాల్లో పీఎల్జీఏ బెటాలియన్, సీఆర్సీ కంపెనీ, తెలంగాణ రాష్ట్ర కమిటీ వంటి సాయుధ సంస్థలకు చెందిన అగ్రశ్రేణి నాయకులు, కార్యకర్తలకు సురక్షిత స్థావరంగా ఉంది. ఈ ప్రాంతంలో, సవాలుతో కూడిన పరిస్థితులలో ఆపరేషన్ నిర్వహించాయి.

నక్సలైట్లు ఏకీకృత కమాండ్ ను ఏర్పాటు చేసుకుని తెలంగాణలోని బీజాపూర్, ఛత్తీస్ గఢ్, ములుగు సరిహద్దులో ఉన్న కర్రేగుట్ట కొండలపై (కేజీహెచ్)లో ఆశ్రయం పొందారు.

భౌగోళికంగా సంక్లిష్ట పరిస్థితులు..

కెజిహెచ్ కఠినమైన కొండ ప్రాంతం కావడం సుమారు 60 కిలోమీటర్ల పొడవున మరియు 5 నుండి 20 కిలోమీటర్ల వెడల్పుతో కఠినమైన సవాళ్ళతో కూడిన భౌగోళిక భూభాగం కావడంతో ఆపరేషన్ సంక్లిష్టంగా మారింది. గత రెండున్నర సంవత్సరాలుగా నక్సలైట్లు ఈ ప్రాంతంలో తమ స్థావరాలను ఏర్పాటు చేసుకున్నట్టు గుర్తించారు. పిఎల్జీఎ బెటాలియన్ సాంకేతిక విభాగం- టిడి యూనిట్‌తో పాటు ఇతర ముఖ్యమైన సంస్థలతో సహా సుమారు 300-350 మంది సాయుధ కేడర్లు ఆశ్రయం పొందారు.

సమగ్ర సమాచారం ఆధారంగా సమన్వయంతో కూడిన ప్రణాళికతో ఏప్రిల్ 21న ఛత్తీస్గఢ్ పోలీసులు, కేంద్ర సాయుధ పోలీసు బలగాలు పెద్ద ఎత్తున సంయుక్త ఆపరేషన్ ప్రారంభించాయి.

కేజీహెచ్ లో జరిగిన ఈ ఆపరేషన్ లో వివిధ నిఘా సంస్థల నుంచి అందిన సాంకేతిక, మానవ మేధస్సు, ఫీల్డ్ ఇన్ పుట్స్ నుంచి సమాచార సేకరణ, విశ్లేషణ కోసం మల్టీ ఏజెన్సీ నిపుణులతో కూడిన ప్రత్యేక బృందాన్ని ఏర్పాటు చేశారు.

భారీగా ప్రాణ నష్టం..

21 రోజుల పాటు సాగిన ఈ చారిత్రాత్మక నక్సల్స్ వ్యతిరేక ఆపరేషన్ లో పలువురు సీనియర్ నక్సల్స్ మరణించారనిచ కొందరు తీవ్రంగా గాయపడ్డారని అధికారులు తెలిపారు. క్లిష్టమైన భౌగోళిక పరిస్థితుల కారణంగా, గాయపడిననక్సలైట్లందరి మృతదేహాలను భద్రతా దళాలు ఇంకా వెలికి తీయలేకపోయాయి..

కర్రెగుట్టలు కొండ వద్ద పరిస్థితులు చాలా క్లిష్టంగా ఉన్నాయని, పగటి ఉష్ణోగ్రతలు 45 డిగ్రీల సెల్సియస్ దాటడంతో చాలా మంది సైనికులు డీహైడ్రేషన్ కు గురయ్యారని సీఆర్‌పిఎఫ్ అధికారులు వివరించారు.

గణనీయంగా తగ్గిపోయిన మావోయిస్టుల ప్రాబల్యం..

2024లో నక్సల్స్ వ్యతిరేక ఆపరేషన్లు విజయవంతం కావడంతో 2025లో కొనసాగుతున్న నక్సల్స్ వ్యతిరేక ఆపరేషన్లలో భాగంగా గత 4 నెలల్లో భద్రతా దళాలు 197 మంది న నక్సలైట్లను మట్టుబెట్టాయి. 2014లో 35 జిల్లాలు నక్సలిజం ప్రభావానికి లోనవగా, 2025 నాటికి ఈ సంఖ్య 6కు తగ్గింది.

అదేవిధంగా నక్సల్స్ ప్రభావిత జిల్లాల సంఖ్య 126 నుంచి 18కి తగ్గింది. 2014లో 76 జిల్లాల్లోని 330 పోలీస్ స్టేషన్లలో 1080 నక్సల్స్ ఘటనలు నమోదు కాగా, 2024లో 42 జిల్లాల్లోని 151 పోలీస్ స్టేషన్లలో కేవలం 374 ఘటనలు మాత్రమే నమోదయ్యాయి. 2014లో నక్సల్స్ హింసలో 88 మంది భద్రతా సిబ్బంది మరణించగా, 2024 నాటికి ఆ సంఖ్య 19కి తగ్గింది. ఎన్ కౌంటర్లలో మరణించిన నక్సలైట్ల సంఖ్య 63 నుంచి 2089కి పెరిగింది.

2024లో 928 మంది నక్సలైట్లు లొంగిపోగా, 2025 మొదటి నాలుగు నెలల్లో 718 మంది లొంగిపోయారు. 2019 నుంచి 2025 వరకు కేంద్ర బలగాలు రాష్ట్ర పోలీసుల సహకారంతో నక్సల్స్ ప్రభావిత రాష్ట్రాల్లో 68 నైట్ ల్యాండింగ్ హెలిప్యాడ్లతో సహా మొత్తం 320 శిబిరాలను ఏర్పాటు చేశాయి. 2014లో 66గా ఉన్న ఫోర్టిఫైడ్ పోలీస్ స్టేషన్ల సంఖ్య ఇప్పుడు 555కు పెరిగింది.

ముగిసిన ఆపరేషన్‌…

దేశంలో అత్యధిక నక్సల్స్ ప్రభావిత ఆరు జిల్లాల్లో బీజాపూర్ ఒకటి. ఆపరేషన్‌ బ్లాక్‌ ఫారెస్ట్‌ తర్వాత అక్కడ మావోయిస్టుల ప్రాబల్యం గణనీయంగా తగ్గిపోతుందని భావిస్తున్నారు. ఏప్రిల్ 21న 'బ్లాక్ ఫారెస్ట్' పేరుతో ప్రారంభమైన 21 రోజుల ఆపరేషన్ 21 రోజుల తర్వాత మే 11న ముగిసిందని, 16 మంది మహిళలు సహా 31 మంది మావోయిస్టులను హతమార్చామని, 450 ఐఈడీలను స్వాధీనం చేసుకున్నామని, రెండు టన్నుల పేలుడు పదార్థాలు, పలు రైఫిల్స్, మందుగుండు సామాగ్రిని స్వాధీనం చేసుకున్నామని తెలిపారు. ఈ దాడిలో 18 మంది భద్రతా దళాల సిబ్బంది గాయపడ్డారు.

ఆయుధాలు, మందుగుండు సామగ్రిని దాచడానికి, నిల్వ చేయడానికి మావోయిస్టులు ఉపయోగించే కొండల వద్ద 250 గుహలను భద్రతా దళాలు గుర్తించాయి.

కెజిహెచ్ చాలా కాలంగా నో గో ఏరియా అని, సైనికులకు ఎక్కువ గాయాలు అయ్యేలా ఐఈడీలను బీర్ బాటిళ్లతో నింపినట్లు బలగాలు గుర్తించాయని సీఆర్పీఎఫ్ చీఫ్ తెలిపారు. కేజీహెచ్ లో 350 మంది సాయుధ మావోయిస్టులు ఆశ్రయం పొందుతున్నారని, వారు రెండున్నర సంవత్సరాలుగా అక్కడే ఉన్నారని అధికారులు తెలిపారు.

ఉమ్మడి భద్రతా దళాలు 45 డిగ్రీల ఉష్ణోగ్రతలో పనిచేశాయని, ఎలుగుబంట్లు, కీటకాలు, కఠినమైన అటవీ ప్రాంతం వంటి వన్యప్రాణులను ఎదుర్కొన్నాయని అధికారులు తెలిపారు.