New Railway line: భద్రాద్రిలో ఐదేళ్లలో రైలు కూత.. మరింత సులువుగా రవాణా

రైల్వే శాఖ కీలక నిర్ణయం తీసుకుంది. ఒడిశాలోని మల్కన్‌గిరి నుంచి భద్రాచలం మీదుగా పాండురంగాపురం వరకు రైలుమార్గాన్ని నిర్మించాలని సంకల్పించింది. ఈ రైలుమార్గాన్ని 2029-30 వరకు పూర్తి చేయాలని లక్ష్యంగా పెట్టుకుంది. ఈ మొత్తం మార్గంలో ఒక్క లెవల్‌ క్రాసింగ్‌ కూడా లేకుండా నిర్మించేలా ప్లాన్ చేశారు. దాదాపు 200 కిలోమీటర్ల వరకు రైల్వేట్రాక్‌ నిర్మించనున్నారు. 200 కిలోమీటర్లు ఉన్న ఈ మార్గంలో.. 300 వరకు వంతెనలను నిర్మించనున్నారు. 3 భారీ వంతెనలు, 34 పెద్ద వంతెనలు, 254 చిన్న వంతెనలు, 41 ఆర్వోబీలు, 76 ఆర్‌యూబీలు ఈ రైల్వే లైన్‌లో నిర్మాణం కానున్నాయి.

ఈ లైన్ ఎందుకంటే..

ఈ కొత్త రైలుమార్గం నిర్మించే ఏరియాలో బాక్సైట్, అల్యూమినియం, ఐరన్‌ ఓర్, లైమ్‌స్టోన్, బొగ్గు, గ్రానైట్ ఖనిజ నిక్షేపాలు ఉన్నాయి. ఈ ఖనిజాలను రవాణా చేసేందుకు కొత్త రైల్వే మార్గం ఉపయోగపడనుందని అధికారులు చెబుతున్నారు. ముఖ్యంగా సింగరేణి కాలరీస్‌ నుంచి ఒడిశా, ఛత్తీస్‌గఢ్‌లకు అనుసంధానం పెరుగుతుందని వివరిస్తున్నారు. దేశంలో ఖనిజ సంపదలో.. 56 శాతం ఒడిశాలోనే ఉంది. దీని రవాణాకు ఈ కొత్త లైన్ ఉతమివ్వనుంది.

దేశవ్యాప్త రవాణాకు వీలుగా..

ఖనిజ సంపద దేశవ్యాప్త రవాణాకు వీలుగా.. భద్రాచలం పట్టణానికి 20 కిలోమీటర్ల దూరంలో ఉన్న పాండురంగాపురం వరకు ఈ మార్గాన్ని పొడిగించారు. పాండురంగాపురం. ఈ లైన్‌ కాజీపేట- విజయవాడ ప్రధాన రైలు మార్గానికి బ్రాంచి లైన్‌‌గా ఉంది. కొత్త లైన్ పూర్తయితే.. ఒడిశా, ఛత్తీస్‌గఢ్‌లోని ఖనిజ సంపదను భద్రాచలం, పాండురంగాపురం నుంచి కాజీపేట మీదుగా ఉత్తరాది రాష్ట్రాలకు తరలించవచ్చు. విజయవాడ మీదుగా దక్షిణాది రాష్ట్రాలకు రవాణా చేయవచ్చు. అందుకే ఈ లైన్‌ను వీలైనంత త్వరగా పూర్తి చేయాలని రైల్వే శాఖ లక్ష్యంగా పెట్టుకుంది.