KTR : ఈ రకమైన గుండాగిరి పదేళ్లలో ఎప్పుడూ లేదు - నగర ప్రజల మీద సీఎం రేవంత్ కక్ష గట్టారు - కేటీఆర్

బీఆర్ఎస్ ఎమ్మెల్యే పాడి కౌశిక్ రెడ్డిని హౌస్ అరెస్ట్ చేసి పోలీసులే దాడి చేయించారని కేటీఆర్ ఆరోపించారు. శనివారం ఎమ్మెల్యే పాడి కౌశిక్ రెడ్డిని పరామర్శించిన అనంతరం మీడియాతో మాట్లాడిన ఆయన.. తొమ్మిదిన్నర నెలలుగా అసమర్థుడి జీవనయాత్రలా రేవంత్ ప్రభుత్వం కొనసాగుతుందని విమర్శించారు.

హైకోర్టు తీర్పుతో భయం…

100 రోజుల్లో ఆరు గ్యారెంటీలు అమలు చేస్తామని చెప్పిన రేవంత్ రెడ్డి సర్కార్ ప్రజలను మోసం చేసిందని దుయ్యబట్టారు. రెండు లక్షల రుణమాఫీ అని చెప్పి, రెండు లక్షల ఉద్యోగాలు అని చెప్పి అన్ని వర్గాలను మోసం చేశారన్నారు. ముఖ్యమంత్రి స్వయంగా ఎమ్మెల్యేల ఇంటికి చేరి… కాళ్లు పట్టుకొని మరి కండువాలు కప్పాడని అన్నారు.

హైకోర్టు తీర్పు తర్వాత కాంగ్రెస్‌లో భయం మొదలైందన్నారు. ఫిరాయింపులపై స్పీకర్‌ను కలిసి సుప్రీంకోర్టు తీర్పులను సైతం ఉటంకిస్తూ ఫిర్యాదు చేశామని కేటీఆర్ గుర్తు చేశారు. దానం నాగేందర్, తెల్లం వెంకట్రావ్, కడియం శ్రీహరి మీద డిస్ క్వాలిఫై పిటిషన్ వేసింది కౌశిక్ రెడ్డినే చెప్పారు.

“పార్టీ ఫిరాయించిన ఎమ్మెల్యేలను రాళ్లతో కొట్టి చంపండి, చావు డప్పులు కొట్టండి అని మాట్లాడింది రేవంత్ రెడ్డి. హైకోర్టు తీర్పు వచ్చిన రోజు అరికెపూడి గాంధీని PAC చైర్మన్‌గా నియమిస్తూ ప్రకటన చేశారు. ప్రజాస్వామ్య విలువలను తుంగలో తొక్కుతూ ఎలా చేస్తారు అని ప్రశ్నిస్తే.. పోలీసుల అండతో ఎమ్మెల్యే ఇంటిపై దాడికి దిగారు. ఈ రకమైన గుండాగిరి పదేళ్లలో ఎప్పుడూ లేదు. ఫ్యాక్షన్ సినిమాలు తలపించేలా వచ్చారు. రేపు జరగబోయేది జరిగితే, ఎవరు బాధ్యత వహిస్తారు..?” అని కేటీఆర్ ప్రశ్నించారు.

పార్టీ మారిన ఎమ్మెల్యేలు ఇప్పటికైనా ఏ పార్టీలో ఉన్నారో చెప్పాలని కేటీఆర్ డిమాండ్ చేశారు. గ్యారెంటీలు అమలు చేయాలని అడిగితే ఇలాంటి హైడ్రామాలు చేస్తున్నారని… గతంలో చాలా ముఖ్యమంత్రులను చూశామన్నారు. పైశాచిక ఆనందం కోసం ఇదంతా రేవంత్ చేస్తున్నారని… ఇవన్నీ తిరిగి రేవంత్‌కు తిరిగి చుట్టుకుంటాయని వ్యాఖ్యానించారు. అధికారం ఎవరికి శాశ్వతం కాదనే విషయాన్ని గుర్తుంచుకోవాలి హితవు పలికారు.

“దాడి జరిగినప్పుడు ఇక్కడ విధుల్లో విఫలం అయిన పోలీసులను సస్పెండ్ చేయాలని డిజిపీని డిమాండ్ చేస్తున్నాము. మా ఎమ్మెల్యేలను అరెస్ట్ చేసి, అర్థరాత్రి వరకు తిప్పితే, తెలంగాణ ప్రజలు మొత్తం మా వెంట నిలిచారు. ముఖ్యమంత్రి సొంత జిల్లాలోనే తెలంగాణ ప్రజల పౌరుషం చాటారు. నిన్న మమ్మల్ని హౌస్ అరెస్ట్ చేసి… గాంధీకి రక్షణ కల్పించారు. గాంధీని హౌస్ అరెస్ట్ చేస్తే ఇలాంటి సంఘటనలు జరిగేవి కావు” అని చెప్పుకొచ్చారు.

అందరూ మావారే - కేటీఆర్

హైదరాబాద్‌లో పదేళ్లలో శాంతి భద్రతలు అద్భుతంగా నిర్వహించామని కేటీఆర్ చెప్పుకొచ్చారు. “హైదరాబాద్‌లో ఉన్న ప్రజలు అందరూ మా వారే. ప్రాంతీయతత్వం మీద దాడులు గతంలో లేవు, ఇప్పుడు ఉండవు. బీఆర్ఎస్ పార్టీకి హైదరాబాద్ ప్రజలు అండగా నిలిచారని, రేవంత్ కక్ష సాధింపు చర్యలు చేపడుతున్నారు” అని ఆగ్రహం వ్యక్తం చేశారు.

ఎమ్మెల్యే గాంధీ భాషపై కేటీఆర్ సీరియస్ అయ్యారు. బజారు భాషలో అసభ్యకరమైన రీతిలో మాట్లాడటమేంటని ప్రశ్నించారు. “కాంగ్రెస్‌లో ఎందుకు చేరావు? దిక్కుమాలిన PAC పదవి కోసం ఇలాంటి మాటలు మాట్లాడిన గాంధీకి సిగ్గు ఉండాలి. ఒక్కసారి నియోజకవర్గ ప్రజలను అడిగితే గాంధీ ఏ పార్టీలో ఉన్నాడో చెబుతారు” అంటూ కేటీఆర్ కామెంట్స్ చేశారు.