Mlc Kavitha : దిల్లీ లిక్కర్ కేసులో కవితకు మళ్లీ షాక్, బెయిల్ పిటిషన్ కొట్టివేసిన హైకోర్టు

దిల్లీ లిక్కర్ కేసులో కేంద్ర దర్యాప్తు సంస్థ (సీబీఐ), ఎన్ఫోర్స్మెంట్ డైరెక్టరేట్ (ఈడీ) నమోదు చేసిన కేసుల్లో బీఆర్ఎస్ ఎమ్మెల్సీ కల్వకుంట్ల కవితకు బెయిల్ మంజూరు చేయాలని కోరుతూ దాఖలైన పిటిషన్ ను దిల్లీ హైకోర్టు సోమవారం కొట్టివేసింది.కవిత దాఖలు చేసిన రెండు బెయిల్ పిటిషన్లపై మే 28న తీర్పును రిజర్వ్ చేసిన జస్టిస్ స్వరణ కాంత శర్మ పిటిషన్లను తిరస్కరించారు. సీబీఐ అవినీతి కేసు, ఈడీ మనీలాండరింగ్ కేసులో కవిత బెయిల్ పిటిషన్లను కొట్టివేస్తూ ట్రయల్ కోర్టు మే 6న ఇచ్చిన ఉత్తర్వులను సవాల్ చేస్తూ హైకోర్టులో పిటిషన్ దాఖలు చేశారు.

ఎక్సైజ్ కేసులో 50 మంది నిందితుల్లో ఆమె ఒక్కరే మహిళ అని, చట్టం మహిళలకు అందిస్తున్న హక్కులను పరిశీలించాలని కవిత తరఫు న్యాయవాది కోర్టును కోరారు. కవితకు బెయిల్ ఇస్తే సాక్షులను ప్రభావితం చేస్తారని బెయిల్ పిటిషన్లను సీబీఐ, ఈడీ వ్యతిరేకించాయి. కవిత బెయిల్ పిటిషన్లపై వాదనను తోసిపుచ్చిన దర్యాప్తు సంస్థలు, ఈ స్కామ్ లో ప్రధాన పాత్ర పోషించింది కవితేనని వాదించాయి. చురుకైన రాజకీయ నాయకురాలిగా, శాసనమండలి సభ్యురాలిగా ఉన్న ఆమె నిస్సహాయ మహిళలతో సమానం కాదన్నారు.

కవిత కేవలం మహిళ మాత్రమే కాదని, చాలా పలుకుబడి ఉన్న మహిళ అని, సాక్షులను ప్రభావితం చేసేంత శక్తివంతురాలు అని సీబీఐ తరఫు న్యాయవాది వాదించారు. కవిత ఎక్సైజ్ కుంభకోణానికి సహ కుట్రదారు, లబ్దిదారు అని, నేరం ద్వారా వచ్చిన ఆదాయం నేరుగా ఆమెకే వెళ్తోందని ఈడీ తరఫు న్యాయవాది వాదించారు.

కవితను విడుదల చేస్తే ఈ కేసులో లోతైన దర్యాప్తుపై ప్రతికూల ప్రభావం పడుతుందని బెయిల్ పిటిషన్ పై ఈడీ వాదనలు వినిపించింది. తెలంగాణ ఎమ్మెల్సీ ఉన్న కవిత అత్యంత పలుకుబడి కలిగిన మహిళ అని, తీవ్రమైన ఆర్థిక నేరానికి పాల్పడ్డారని ఆరోపించింది. సాక్ష్యాలను తారుమారు చేయడం, సాక్షులను ప్రభావితం చేసే సామర్థ్యం ఆమెకు ఉందని పేర్కొంది.

కవిత ఇతరులతో కుమ్మక్కై రూ.100 కోట్ల ముడుపులు చెల్లించడంలో క్రియాశీలకంగా వ్యవహరించారని, ఆ తర్వాత తన ప్రాక్సీ ద్వారా మెసర్స్ ఇండో స్పిరిట్స్ ద్వారా రూ.192.8 కోట్ల మేర అక్రమాలకు పాల్పడ్డారని ఆరోపించారు. ఇలాంటి చర్యల ద్వారా కవిత రూ.292.8 కోట్ల మేర నేరాలకు (పీవోసీ) సంబంధించిన వివిధ ప్రక్రియలు, కార్యకలాపాల్లో పాలుపంచుకున్నారని'దర్యాప్తు సంస్థ తన కౌంటర్ అఫిడవిట్లో పేర్కొంది.

మనీలాండరింగ్ నేరంతో ఆమెను సంబంధం ఉన్నట్లు తగిన ఆధారాలు ఉన్నాయని ఈడీ తెలిపింది. ఈ కుంభకోణంలో ఈడీ, సీబీఐ నమోదు చేసిన రెండు కేసుల్లో కవిత జ్యుడీషియల్ కస్టడీలో ఉన్నారు. 2021-22 సంవత్సరానికి దిల్లీ ప్రభుత్వ ఎక్సైజ్ పాలసీని రూపొందించడంలో, అమలు చేయడంలో అవినీతి, మనీలాండరింగ్ కు సంబంధించిన కుంభకోణం ఇది.

కవిత (46)ను మార్చి నెల 15న హైదరాబాద్ బంజారాహిల్స్ లోని ఆమె నివాసంలో ఈడీ అరెస్టు చేయగా, తీహార్ జైలులో సీబీఐ ఆమెను అరెస్టు చేసింది.

ఎక్సైజ్ పాలసీతో తనకు ఎలాంటి సంబంధం లేదని, ఈడీ సహకారంతో కేంద్రంలోని అధికార పార్టీ తనపై నేరపూరిత కుట్ర చేస్తోందని ఈడీ కేసులో తన బెయిల్ పిటిషన్లో బీఆర్ఎస్ నేత కవిత పేర్కొన్నారు.