BRS VijayaDiwas: డిసెంబర్ 9న విజయ్ దీవస్ గా నిర్వహించే పనిలో బిఆర్ఎస్ నిమగ్నం.. నవంబర్ 29 దీక్షాదివస్…

BRS VijayaDiwas: మలిదశ తెలంగాణ ఉద్యమంలో కేసీఆర్‌ ఆమరణ దీక్షను ప్రారంభించిన నవంబర్‌ 29వ తేదీని బీఆర్ఎస్ దీక్షా దివస్ గా, తెలంగాణ ప్రకటన వెలువడిన డిసెంబర్ 9న విజయ్ దీవస్ గా నిర్వహించే పనిలో బిఆర్ఎస్ నిమగ్నమైంది.

పదేళ్ళు రాష్ట్రాన్ని పాలించి ప్రస్తుతం ప్రతిపక్షంలో ఉన్న బిఆర్ఎస్ నవంబర్ 29న దీక్షా దీవస్ ను పెద్ద ఎత్తున నిర్వహించేందుకు సన్నాహాలు చేస్తుంది. కెసిఆర్ అరెస్టు అయిన అలుగునూర్ చౌరస్తాలో కేటిఆర్ నేతృత్వంలో దీక్షా దీవస్ బహిరంగ సభ నిర్వహించాలని నిర్ణయించారు. ప్రతిపక్ష హోదాలో తొలిసారి నిర్వహిస్తున్న దీక్షా దీవస్ ను సక్సెస్ చేసేందుకు అసెంబ్లీ నియోజకవర్గాల వారీగా సన్నాహక సమావేశాలు నిర్వహిస్తున్నారు.

సిరిసిల్లలో కేటిఆర్, కరీంనగర్ లో మండలి డిప్యూటీ చైర్మన్ బండ ప్రకాష్, ఎమ్మెల్యే లు గంగుల కమలాకర్, పాడి కౌశిక్ రెడ్డి, పెద్దపల్లిలో మాజీ మంత్రి కొప్పుల ఈశ్వర్ సన్నాహక సమావేశాలు నిర్వహించి పార్టీ శ్రేణులకు దిశానిర్దేశం చేశారు.

అలుగునూర్ లో అనుమతి నిరాకరణ...

దీక్షా దివస్ సందర్భంగా అలుగునూరులో నిర్వహించే సభకు పోలీసులు అనుమతి నిరాకరించారు. కరీంనగర్ హైదరాబాద్, కరీంనగర్ వరంగల్ ప్రదాన రహదారి ముఖ్య కూడలి అలుగునూరు చౌరస్తా కావడంతో ట్రాఫిక్ సమస్య ఏర్పడుతుందని పోలీసులు దీక్షా దీవస్ సభకు అనుమతించడం లేదు. అయితే మరోసారి సిపిని కలిసి అనుమతి కోరుతామని ఎమ్మెల్యే గంగుల కమలాకర్ తెలిపారు.

చారిత్రాత్మకమైన కెసిఆర్ అరెస్టు అయిన అలుగునూరు చౌరస్తా లోనే దీక్షా దివస్ సభ నిర్వహిస్తామని ఒకవేళ పోలీసుల అనుమతి ఇవ్వకుంటే కెసిఆర్ దీక్షకు బయలుదేరిన ఉత్తర తెలంగాణ భవన్ వద్ద నిర్వహిస్తామన్నారు. పోలీసులు అనుమతి ఇచ్చినా, ఇవ్వకపోయినా భారీ ఎత్తున దీక్ష దీవస్ సభ నిర్వహించి తీరుతామని స్పష్టం చేశారు.

కలెక్టర్, పోలీస్ అధికారులపై కేటిఆర్ ఫైర్...

సిరిసిల్ల లో దీక్షా దివస్ పై నిర్వహించిన బిఆర్ఎస్ సన్నాహాక సమావేశంలో అధికారులపై కేటీఆర్ ఫైర్ అయ్యారు. అతిగా ప్రవర్తిస్తున్న కలెక్టర్లు, పోలీస్ అధికారులు రాసిపెట్టుకోండి... కాంగ్రెస్ కార్యకర్తల్లా వ్యవహరిస్తే తాము అధికారంలోకి వచ్చాక వడ్డీతో సహా చెల్లిస్తామని హెచ్చరించారు.‌ నేనే ఆ బాధ్యత తీసుకుని కచ్చితంగా ఆ పని చేసి చూపిస్తానని స్పష్టం చేశారు. సిరిసిల్ల కలెక్టర్ కాంగ్రెస్ కార్యకర్తగా పనిచేస్తున్నాడని ఆరోపించారు.

మా పార్టీ నాయకులను పార్టీ మారాలని అడుగుతున్నాడంట... ఇటువంటి సన్నాసిని కలెక్టర్ గా తీసుకొచ్చారని విమర్శించారు. ఎవ్వరూ భయపడవద్దు.. వాళ్లు టీఆర్ఎస్ వెంట్రుక కూడా పీకలేరన్నారు. రేవంత్ రెడ్డి సహా కాంగ్రెస్ నాయకులు ఎవరూ మనల్ని ఏమీ చేయలేరని తెలిపారు. కాంగ్రెస్ నేతలు ముఖ్యమంత్రి, మంత్రి పదవులు అనుభవిస్తున్నారంటే దానికి కేసీఆర్ అనే నాయకుడే కారణమని కేటిఆర్ స్పష్టం చేశారు.

ఆర్టికల్ 3 ద్వారానే తెలంగాణ సాధ్యమయింది..

బాబా సాహెబ్ అంబేడ్కర్ రాసిన రాజ్యాంగంలోని ఆర్టికల్ 3 ద్వారానే తెలంగాణ సాధ్యమైందని కేటిఆర్ తెలిపారు. అందుకే తెలంగాణ ప్రజలంతా ఆయనకు రుణపడి ఉంటారని చెప్పారు. బాబా సాహెబ్ చూపిన బాటలోనే బోధించు, పోరాడు, సమీకరించు అన్న విధానంలోనే కేసీఆర్ పోరాటం చేసి తెలంగాణ సాధించారని తెలిపారు.

2009 నవంబర్ 29న కేసీఆర్ అనే బక్క మనిషి, ఉక్కు సంకల్పంతో చేపట్టిన దీక్ష కారణంగానే తెలంగాణ సాధ్యమయిందన్నారు. కేసీఆర్ పోరాటాన్ని ఎన్ని రకాలుగా చిన్నగా చూపే ప్రయత్నం చేసినప్పటికీ... తెలంగాణ ప్రజలు ఆయనను ఎన్నటికీ మరవరని రాజకీయంగా కావాలనే తప్పుడు ప్రచారాలు చేస్తున్నారని అన్నారు. కాంగ్రెస్ అరచేతిలో స్వర్గం చూపటంతో కొన్ని చోట్ల ప్రజలు నమ్మి వాళ్లను గెలిపించి, ఇప్పుడు మోసపోయామని బాధపడుతున్నారని తెలిపారు.

అరెస్ట్ చేయాలని రేవంత్ రెడ్డి చూస్తుండు...

నేను ఏదీ మాట్లాడినా సరే...నన్ను ఎందులోనైనా పట్టుకొని అరెస్ట్ చేయాలని రేవంత్ రెడ్డి చూస్తున్నాడని కేటిఆర్ తెలిపారు. మా అక్క చెల్లెలు, అన్నదమ్ముల అండ ఉన్నంత వరకు ఎవ్వని అయ్యకు భయపడకుండా ప్రజల కోసం పోరాటం చేస్తానని స్పష్టం చేశారు.‌ రేవంత్ రెడ్డి సీఎం పదవి తుమ్మితే ఊడిపోయే ముక్కు లాంటిది... ఢిల్లీ వాళ్లకు కోపం వస్తే ఆయన పదవి ఊడుతదన్నారు.

ఎప్పుడు ఏం జరుగుతుందో చెప్పలేం... కానీ నాలుగేళ్లు వేచి చూడాల్సిందేనని తెలిపారు. దేవుళ్ల మీద ఒట్లు, హామీలకు తూట్లు, కేసీఆర్ కు తిట్లు...ఇవి తప్ప రేవంత్ రెడ్డి పీకింది ఏమి లేదని విమర్శించారు. ఈ ముఖ్యమంత్రి కేవలం అదానీ, తన అన్న, అల్లుడు, బావమరిదికి అమృతం పంచేందుకు మాత్రమే పని చేస్తుండు తప్ప ప్రజల కోసం ఏమీ చేయలేదన్నారు. ప్రజలందరూ కాంగ్రెస్, బీజేపీ చేస్తున్న పనులను గమనిస్తున్నారని తెలిపారు.

గుండుకు దెబ్బ తాకితే మోకాలి మందు...

రాష్ట్రంలోనే అత్యధికంగా సిరిసిల్లలో నేతన్నలు ఉన్నారు. మరి ఇక్కడ పెట్టాల్సిన నూలు డిపోను వేములవాడ లో పెట్టారని కేటిఆర్ తెలిపారు. గుండుకు దెబ్బ తాకితే మోకాలి మందు పెట్టినట్లు ఉంది రేవంత్ రెడ్డి పని తీరు అని వ్యంగ్యంగా విమర్శించారు. ఏడాది పాలనలో ముఖ్యమంత్రిని ప్రజలు ఇన్ని తిట్లు తిట్టటం నేను ఎప్పుడు చూడలేదని తెలిపారు. ఆ తిట్లు విన్నాక రేషం ఉన్నోడైతే బిల్డింగ్ మీది నుంచి దూకి చస్తాడు...కానీ రేవంత్ రెడ్డి కాబట్టి నడిచిపోతోందన్నారు.

ఏడాది లోపే ప్రభుత్వంపై ఇంత వ్యతిరేకత ఊహించలేదని, మనం పిలుపునిస్తే ఈ ప్రభుత్వానికి ప్రజలే సంవత్సరీకం పెట్టే పరిస్థితి ఉందన్నారు. మనుషులుగా మనం కూడా తప్పులు, పొరపాట్లు చేసి ఉండవచ్చు. వాటి నుంచి ఏం నేర్చుకున్నామన్నదే ముఖ్యమని తెలిపారు. కేసీఆర్ స్ఫూర్తితో కాంగ్రెస్, బీజేపీకి వ్యతిరేకంగా మహా సంకల్ప దీక్ష చేయాల్సి ఉందన్నారు.

(రిపోర్టింగ్ కె వి రెడ్డి ఉమ్మడి కరీంనగర్ జిల్లా కరస్పాండెంట్ హిందుస్థాన్ టైమ్స్ తెలుగు)