రాష్ట్రంలో భారీగా భూ సమస్యలు...! 8 లక్షలకు పైగా దరఖాస్తులు, ఆగస్టు 15 డెడ్ లైన్

రెవెన్యూ సదస్సుల్లో భూ సమస్యలకు సంబంధించిన దరఖాస్తులు భారీగా వెల్లువెత్తాయి. కొత్త రెవెన్యూ చట్టం భూభారతి అమల్లోకి వచ్చాక తెలంగాణ సర్కార్… చేపట్టిన మూడు విడతల సదస్సుల్లో 8 ల‌‌‌‌‌‌‌‌క్షలకుపైగా దరఖాస్తులు అందాయి. ఏప్రిల్ 17 నుంచి 30 వరకు నాలుగు మండలాల్లో ముందుగా రెవెన్యూ సదస్సులు నిర్వహించారు. ఆ తర్వాత రెండో దశ కింద మరో 28 మండలాల్లో దరఖాస్తులను స్వీకరించారు. మూడో విడతగా మిగిలిన మండలాల్లో నిర్వహించారు.

రాష్ట్రంలో రెవెన్యూ సదస్సులు - ముఖ్య వివరాలు..

• ఏప్రిల్ 14వ తేదీన భూ భారతి చ‌ట్టాన్ని ముఖ్య‌మంత్రి రేవంత్ రెడ్డి చేతుల మీదుగా ఆవిష్కరించారు. ఆరోజు నుంచే రెవెన్యూ వ్య‌వ‌స్ద‌లో కీలక మార్పులకు శ్రీకారం చుట్టారు.
• ఈ చ‌ట్టాన్ని ద‌శ‌ల వారీగా అమ‌లులోకి తీసుకువచ్చారు. మొద‌టి ద‌శ‌లో ఏప్రిల్ 17 నుంచి 30వ తేదీ వ‌ర‌కు 4మండ‌లాల్లో నిర్వ‌హించిన 72 రెవెన్యూ స‌ద‌స్సుల్లో 12వేల ద‌ర‌ఖాస్తులు అందాయి.
• ఆ త‌ర్వాత రెండ‌వ‌ ద‌శ‌లో మే 5వ తేదీ నుంచి 28 మండ‌లాల్లో నిర్వ‌హించిన 414 స‌ద‌స్సుల్లో 46 వేల ద‌ర‌ఖాస్తులు అందాయి. సాదాబైనామాల అంశం మిన‌హా సుమారు 60 శాతంపైగా స‌మ‌స్యల‌కు పరిష్కారం చూపారు.
• జూన్ 3వ తేదీ నుంచి 20వ తేదీ వ‌ర‌కు 561 మండ‌లాల్లో 10,239 గ్రామాల్లో రెవెన్యూ స‌ద‌స్సులను నిర్వ‌హించారు. ఈ స‌ద‌స్సుల్లో భూ స‌మ‌స్య‌ల‌కు సంబంధించి 8 ల‌క్ష‌లకుపైగా ద‌ర‌ఖాస్తులు వ‌చ్చాయి.
• మొత్తంగా మూడు విడ‌తల్లో 593 మండలాల్లో 10,725 రెవెన్యూ సదస్సులు నిర్వహించారు. ఇందులో 8.58 ల‌క్ష‌ల ద‌ర‌ఖాస్తులు వ‌చ్చాయ‌ని రాష్ట్ర రెవెన్యూ శాఖ మంత్రి పొంగులేటి శ్రీనివాస్ రెడ్డి వివ‌రించారు.
• అత్య‌ధికంగా ఖ‌మ్మం జిల్లాలో 67 వేలు, భ‌ద్రాద్రి కొత్త‌గూడెం 61వేలు, వ‌రంగ‌ల్ 54 వేలు, జ‌య‌శంక‌ర్ భూపాల‌ప‌ల్లి 48వేలు, నల్గొండ 42 వేల ద‌ర‌ఖాస్తులు అందాయి.
• రెవెన్యూ స‌ద‌స్సుల‌కు ముందురోజే ఆయా గ్రామాల్లో రైతుల‌కు ఉచితంగా ద‌ర‌ఖాస్తుల‌ను పంపిణీ చేశారు. స్వీక‌రించిన‌ వాటికి ర‌శీదుల‌ను అంద‌జేశారు.
• వ‌చ్చిన ద‌ర‌ఖాస్తుల్లో ఇప్ప‌టివ‌ర‌కు 3.27 ల‌క్ష‌ల ద‌రఖాస్తుల‌ను ఆన్‌లైన్‌లో న‌మోదు చేశారు. మిగిలిన వాటిని కూడా త్వ‌రిత‌గ‌తిన న‌మోదు చేయాలని మంత్రి పొంగులేటి అధికారులను ఆదేశించారు.