Team India home season schedule: హైదరాబాద్‌లో ఆస్ట్రేలియాతో టీ20, ఇంగ్లండ్‌తో టెస్టు.. వైజాగ్‌లోనూ టీమిండియా మ్యాచ్‌లు

Team India home season schedule: టీమిండియా బ్లాక్‌బస్టర్ హోమ్ సీజన్ షెడ్యూల్ రిలీజ్ చేసింది బీసీసీఐ. ఇందులో భాగంగా హైదరాబాద్, వైజాగ్ లకు కీలకమైన మ్యాచ్ ల ఆతిథ్యం దక్కింది. మంగళవారం (జులై 25) సాయంత్రం ఇండియా ఆడబోయే సిరీస్ లు, వేదికలను అనౌన్స్ చేసింది. 2023-24 సీజన్ కు సంబంధించిన షెడ్యూల్ ను బోర్డు రిలీజ్ చేసింది. ఈ హోమ్ సీజన్ లో భాగంగా టీమిండియా మొత్తం 16 మ్యాచ్ లు ఆడనుంది.

ఆస్ట్రేలియాతో వన్డేలు.. ఇంగ్లండ్‌తో టెస్టులు

ఈ మొత్తం 16 అంతర్జాతీయ మ్యాచ్ లలో ఇండియా 5 టెస్టులు, 3 వన్డేలు, 8 టీ20లు ఆడనుంది. ఐదుసార్లు వన్డే వరల్డ్ కప్ విజేత అయిన ఆస్ట్రేలియాతో మూడు వన్డేల సిరీస్ తో ఇండియా హోమ్ సీజన్ ప్రారంభమవుతుంది. ఐసీసీ వన్డే వరల్డ్ కప్ కు ముందు ఈ సిరీస్ జరగనుంది. ఇండియాలోనే అక్టోబర్, నవంబర్ లలో వరల్డ్ కప్ జరగనున్న విషయం తెలిసిందే.

వరల్డ్ కప్ కు ముందు ఆస్ట్రేలియాతో మూడు వన్డేలు జరుగుతాయి. వరల్డ్ కప్ ముగిసిన తర్వాత అదే ఆసీస్ తో ఐదు టీ20ల సిరీస్ జరుగుతుంది. ఈ టీ20 సిరీస్ నవంబర్ 23న వైజాగ్ లో ప్రారంభం కానుండగా.. డిసెంబర్ 3న హైదరాబాద్ లో ముగుస్తుంది. ఇక 2024 ప్రారంభంలో ఆఫ్ఘనిస్థాన్ తో ఇండియా హోమ్ సిరీస్ ఆడనుంది.

ఆ టీమ్ తొలిసారి వైట్ బాల్ టోర్నమెంట్ కోసం ఇండియా రానుంది. ఇండియా, ఆఫ్ఘనిస్థాన్ మ్యాచ్ మూడు టీ20ల సిరీస్ జరుగుతుంది. ఈ మూడు మ్యాచ్ లు మొహాలి, ఇండోర్, బెంగళూరులలో జరుగుతాయి.

ఇక ఆఫ్ఘన్ సిరీస్ ముగిసిన వెంటనే ఇంగ్లండ్ తో ఐదు టెస్టుల సిరీస్ ప్రారంభమవుతుంది. ఈ సిరీస్ జనవరి 25, 2024 నుంచి జరుగుతుంది. ఈ ఐదు టెస్టుల్లో భాగంగా తొలి టెస్టుకు హైదరాబాద్ ఆతిథ్యమివ్వనుండటం విశేషం. ఆ తర్వాత వైజాగ్, రాజ్‌కోట్, రాంచీ, ధర్మశాలల్లో మిగిలిన నాలుగు టెస్టులు జరుగుతాయి.

ఇంగ్లండ్‌తో ఐదు టెస్ట్‌ల షెడ్యూల్

తొలి టెస్ట్ - జనవరి 25 నుంచి 29 (హైదరాబాద్)

రెండో టెస్ట్ - ఫిబ్రవరి 2 నుంచి 6 (వైజాగ్)

మూడో టెస్ట్ - ఫిబ్రవరి 16 నుంచి 20 (రాజ్‌కోట్)

నాలుగో టెస్ట్ - ఫిబ్రవరి 23 నుంచి 27 (రాంచీ)

ఐదో టెస్ట్ - మార్చి 7 నుంచి 11 (ధర్మశాల)

ఆస్ట్రేలియాతో వన్డే సిరీస్ షెడ్యూల్

తొలి వన్డే - సెప్టెంబర్ 22 (మొహాలీ)

రెండో వన్డే - సెప్టెంబర్ 24 (ఇండోర్)

మూడో వన్డే - సెప్టెంబర్ 27 (రాజ్‌కోట్)

ఆస్ట్రేలియాతో టీ20 సిరీస్ షెడ్యూల్

తొలి టీ20 - నవంబర్ 23 (వైజాగ్)

రెండో టీ20 - నవంబర్ 26 (తిరువనంతపురం)

మూడో టీ20 - నవంబర్ 28 (గువాహటి)

నాలుగో టీ20 - డిసెంబర్ 1 (నాగ్‌పూర్)

ఐదో టీ20 - డిసెంబర్ 3 (హైదరాబాద్)