asia mixed team badminton: 5 కి 5 విజయాలు.. భారత బ్యాడ్మింటన్ జట్టు గ్రాండ్ బోణీ.. చెలరేగిన లక్ష్యసేన్, మాళవిక

ఆసియా మిక్స్ డ్ టీమ్ బ్యాడ్మింటన్ ఛాంపియన్ షిప్ లో భారత్ గ్రాండ్ గా బోణీ కొట్టింది. చైనా లో జరుగుతున్న ఈ టోర్నీలో శుభారంభం చేసింది. గోల్డ్ దిశగా తొలి అడుగు ఘనంగా వేసింది. బుధవారం (ఫిబ్రవరి 12) గ్రూప్-డి మ్యాచ్ లో భారత్ 5-0 తేడాతో మకావును చిత్తుచిత్తుగా ఓడించింది. ఆడిన అన్ని మ్యాచ్ ల్లోనూ విజయాలు సాధించింది.

• ఫస్ట్ మిక్స్ డ్ డబుల్స్ మ్యాచ్ జరిగింది. ఇందులో భారత్ తరపున సతీష్ కుమార్-ఆద్య జోడీ బరిలో దిగింది. సతీష్-ఆద్య జంట 21-10, 21-9 తేడాతో చాంగ్ లియాంగ్-వెంగ్ చి జోడీపై గెలిచింది. చెలరేగిన భారత పెయిర్ కేవలం 31 నిమిషాల్లోనే వరుస గేమ్ ల్లో ప్రత్యర్థిని ఓడించింది.
• పురుషుల సింగిల్స్ మ్యాచ్ లో స్టార్ షట్లర్ లక్ష్యసేన్ విరుచుకుపడ్డాడు. ఈ యువ షట్లర్ 21-16, 21-12తో పాంగ్ ఫాంగ్ పై విజయం సాధించాడు. డ్రాప్ లు, స్మాష్ లతో లక్ష్య ప్రత్యర్థిపై ఆధిపత్యం ప్రదర్శించాడు.
• మహిళల సింగిల్స్ మ్యాచ్ లో ఎన్నో అంచనాలతో బరిలో దిగిన యువ తార మాళవిక బన్సోద్ కూడా బెటర్ ఫర్ ఫార్మెన్స్ చేసింది. ఆమె 21-15, 21-9తో వాయ్ చన్ పై గెలిచింది. స్టార్ షట్లర్ పీవీ సింధు లేకపోవడంతో మహిళల సింగిల్స్ లో ఆశలన్నీ మాళవికపైనే ఉన్నాయి.
• పురుషుల డబుల్స్ లో సాత్విక్-చిరాగ్ జోడీ కాకుండా.. అర్జున్-చిరాగ్ జంట బరిలో దిగింది. ఈ భారత ద్వయం 21-15, 21-9తో చోన్-వెంగ్ పెయిర్ పై విక్టరీని ఖాతాలో వేసుకుంది. ఈ మ్యాచ్ నుంచి తెలుగు స్టార్ షట్లర్ సాత్విక్ సాయిరాజ్ తప్పుకొన్నాడు.
• మహిళల డబుల్స్ లో గాయత్రి గోపీచంద్-ట్రీసా జాలీ కూడా సత్తాచాటింది. ట్రీసాతో కలిసి తెలుగు ప్లేయర్ గాయత్రి మంచి ప్రదర్శన చేసింది. గాయత్రి-ట్రీసా 21-10, 21-5తో వెంగ్ చి-చి వా జోడీపై విజయం సాధించింది.